آئینِ اسلامی جمہوریہ پاکستان 1973ء (بمع ترامیم)

آرٹیکل 239: آئین ترمیمی بل

1. (1)

   آئین میں ترمیم کا بل کسی بھی ایوان میں پیش ہو سکتا ہے اور، جب بل ایوان کی کل رکنیت کے کم از کم دو تہائی کے ووٹوں سے منظور ہو جائے، تو وہ دوسرے ایوان کو بھیجا جائے گا۔

2. (2)

   اگر بل اس ایوان کی کل رکنیت کے کم از کم دو تہائی کے ووٹوں سے، جسے وہ شق (1) کے تحت بھیجا گیا ہو، بغیر ترمیم کے منظور ہو جائے تو وہ، شق (4) کے احکام کے تابع، صدر کی منظوری کے لیے پیش کیا جائے گا۔

3. (3)

   اگر بل اس ایوان کی کل رکنیت کے کم از کم دو تہائی کے ووٹوں سے، جسے وہ شق (1) کے تحت بھیجا گیا ہو، ترمیم کے ساتھ منظور ہو جائے تو اس ایوان کی جانب سے جس میں وہ پیش ہوا تھا اس پر دوبارہ غور کیا جائے گا، اور اگر پہلے ایوان کی ترمیم شدہ صورت میں بل بعد والے ایوان کی جانب سے اس کی کل رکنیت کے کم از کم دو تہائی کے ووٹوں سے منظور ہو جائے تو وہ، شق (4) کے احکام کے تابع، صدر کی منظوری کے لیے پیش کیا جائے گا۔

4. (4)

   آئین میں ترمیم کا کوئی ایسا بل جس کا اثر کسی صوبے کی حدود کو تبدیل کرنا ہو، صدر کی منظوری کے لیے پیش نہیں کیا جائے گا جب تک وہ اس صوبے کی صوبائی اسمبلی کی جانب سے اس کی کل رکنیت کے کم از کم دو تہائی کے ووٹوں سے منظور نہ ہو چکا ہو۔

5. (5)

   آئین میں مذکور کسی امر اور کسی عدالت کے کسی فیصلے کے باوجود، کسی عدالت کو یہ دائرۂ اختیار حاصل نہیں ہوگا کہ وہ آئین میں کسی ترمیم کے بارے میں کسی بنا پر بھی سوال اٹھائے۔

6. (6)

   شکوک دور کرنے کے لیے، بذریعہ ہذا اعلان کیا جاتا ہے کہ آئین کے کسی بھی حکم میں ترمیم کرنے کے مجلسِ شوریٰ (پارلیمنٹ) کے اختیار پر کوئی حد نہیں ہے۔