آئینِ اسلامی جمہوریہ پاکستان 1973ء (بمع ترامیم)

آرٹیکل 47: صدر کی برطرفی یا مواخذہ

1. (1)

   آئین میں مذکور کسی امر کے باوجود، صدر کو اس آرٹیکل کے احکام کے مطابق جسمانی یا ذہنی معذوری کی بنا پر عہدے سے ہٹایا جا سکتا ہے یا آئین کی خلاف ورزی یا سنگین بدرفتاری کے الزام پر اس کا مواخذہ (impeachment) کیا جا سکتا ہے۔

2. (2)

   کسی بھی ایوان کی کل رکنیت کا کم از کم نصف سپیکر قومی اسمبلی یا، جیسی بھی صورت ہو، چیئرمین کو صدر کی برطرفی یا، جیسی بھی صورت ہو، اس کے مواخذے کی قرارداد پیش کرنے کے ارادے کا تحریری نوٹس دے سکتا ہے؛ اور ایسے نوٹس میں اس کی معذوری کی تفصیلات یا اس کے خلاف الزام کی تفصیلات درج ہوں گی۔

3. (3)

   اگر شق (2) کے تحت نوٹس چیئرمین کو موصول ہو تو وہ اسے فوراً سپیکر کو بھیج دے گا۔

4. (4)

   سپیکر شق (2) یا شق (3) کے تحت نوٹس کی وصولی کے تین دن کے اندر نوٹس کی ایک نقل صدر کو بھجوائے گا۔

5. (5)

   سپیکر نوٹس کی وصولی کے بعد سات دن سے پہلے اور چودہ دن کے بعد نہیں، دونوں ایوانوں کا مشترکہ اجلاس طلب کرے گا۔

6. (6)

   مشترکہ اجلاس اس بنیاد یا الزام کی، جس پر نوٹس مبنی ہو، تحقیقات کر سکتا ہے یا کروا سکتا ہے۔

7. (7)

   صدر کو تحقیقات کے دوران، اگر کوئی ہو، اور مشترکہ اجلاس کے روبرو پیش ہونے اور اپنی نمائندگی کرانے کا حق ہوگا۔

8. (8)

   اگر تحقیقات کے نتیجے پر، اگر کوئی ہو، غور کرنے کے بعد مشترکہ اجلاس میں مجلسِ شوریٰ (پارلیمنٹ) کی کل رکنیت کے کم از کم دو تہائی ارکان کے ووٹوں سے ایسی قرارداد منظور ہو جائے جس میں یہ اعلان کیا گیا ہو کہ صدر معذوری کی وجہ سے عہدے پر فائز رہنے کے قابل نہیں یا آئین کی خلاف ورزی یا سنگین بدرفتاری کا مجرم ہے، تو قرارداد منظور ہوتے ہی صدر اپنے عہدے پر فائز نہیں رہے گا۔