آئینِ اسلامی جمہوریہ پاکستان 1973ء (بمع ترامیم)

آرٹیکل 73: مالی بل کے بارے میں طریقِ کار

1. (1)

   آرٹیکل 70 میں مذکور کسی امر کے باوجود، مالی بل (Money Bill) قومی اسمبلی میں پیش ہوگا: بشرطیکہ جب مالی بل، بشمول سالانہ میزانیے کے بیان پر مشتمل فنانس بل، قومی اسمبلی میں پیش کیا جائے تو اسی وقت اس کی ایک نقل سینیٹ کو بھیجی جائے گی جو چودہ دن کے اندر اس پر قومی اسمبلی کو سفارشات پیش کر سکتی ہے۔

2. (1A)

   قومی اسمبلی سینیٹ کی سفارشات پر غور کرے گی اور اسمبلی کے بل منظور کر لینے کے بعد، خواہ سینیٹ کی سفارشات شامل کی جائیں یا نہ کی جائیں، وہ صدر کی منظوری کے لیے پیش کیا جائے گا۔

3. (2)

   اس باب کے مقصد کے لیے کوئی بل یا ترمیم مالی بل سمجھی جائے گی اگر اس میں درج ذیل تمام یا کسی امر سے متعلق احکام ہوں، یعنی:-

   1. (a)

      کسی محصول کا عائد کرنا، ختم کرنا، معاف کرنا، تبدیل کرنا یا اس کی ضابطہ بندی کرنا؛

   2. (b)

      وفاقی حکومت کی جانب سے قرض لینا یا کوئی ضمانت دینا، یا اس حکومت کی مالی ذمہ داریوں سے متعلق قانون میں ترمیم کرنا؛

   3. (c)

      وفاقی مجموعی فنڈ (Federal Consolidated Fund) کی تحویل، اس فنڈ میں رقوم کی ادائیگی یا اس سے رقوم کا اجرا؛

   4. (d)

      وفاقی مجموعی فنڈ پر کوئی بار (charge) عائد کرنا، یا ایسے کسی بار کو ختم کرنا یا تبدیل کرنا؛

   5. (e)

      وفاق کے پبلک اکاؤنٹ کے حساب میں رقوم کی وصولی، ایسی رقوم کی تحویل یا اجرا؛

   6. (f)

      وفاقی حکومت یا کسی صوبائی حکومت کے حسابات کا آڈٹ؛ اور

   7. (g)

      سابقہ فقرات میں مذکور کسی امر کا ضمنی کوئی معاملہ۔

4. (3)

   کوئی بل صرف اس بنا پر مالی بل نہیں سمجھا جائے گا کہ اس میں یہ بندوبست ہو:-

   1. (a)

      کوئی جرمانہ یا دیگر مالی سزا عائد کرنے یا تبدیل کرنے کے لیے، یا لائسنس فیس یا کسی خدمت کی فراہمی پر فیس یا چارج کے مطالبے یا ادائیگی کے لیے؛ یا

   2. (b)

      کسی مقامی ادارے یا اتھارٹی کی جانب سے مقامی مقاصد کے لیے کسی محصول کے عائد کرنے، ختم کرنے، معاف کرنے، تبدیل کرنے یا ضابطہ بندی کرنے کے لیے۔

5. (4)

   اگر کوئی سوال اٹھے کہ کوئی بل مالی بل ہے یا نہیں تو اس بارے میں سپیکر قومی اسمبلی کا فیصلہ حتمی ہوگا۔

6. (5)

   صدر کی منظوری کے لیے پیش کیے جانے والے ہر مالی بل پر سپیکر قومی اسمبلی کے دستخط سے ایک سرٹیفکیٹ ہوگا کہ یہ مالی بل ہے، اور ایسا سرٹیفکیٹ تمام مقاصد کے لیے حتمی ہوگا اور اس کے بارے میں سوال نہیں اٹھایا جائے گا۔