آئینِ اسلامی جمہوریہ پاکستان 1973ء (بمع ترامیم)
اشاعت: 1973ءمجموعہ: آئینِ پاکستان 1973ء اور اس کی ترامیم
· دو لسانی (انگریزی/اردو)
پاکستان کا موجودہ نافذ العمل آئین، ستائیسویں ترمیم (2025ء) تک کی تمام ترامیم سمیت۔
آرٹیکل 27: ملازمتوں میں امتیاز کے خلاف تحفظ
- (1)
کسی ایسے شہری کے خلاف جو دوسرے لحاظ سے پاکستان کی ملازمت میں تقرر کا اہل ہو، ایسے کسی تقرر کے سلسلے میں صرف نسل، مذہب، ذات، جنس، سکونت یا جائے پیدائش کی بنا پر امتیاز روا نہیں رکھا جائے گا: بشرطیکہ یومِ آغاز سے چالیس سال سے زیادہ مدت تک نہیں، کسی طبقے یا علاقے سے تعلق رکھنے والے اشخاص کے لیے پاکستان کی ملازمت میں ان کی مناسب نمائندگی کو یقینی بنانے کے لیے آسامیاں مخصوص کی جا سکیں گی: مزید بشرطیکہ مذکورہ ملازمت کے مفاد میں، مخصوص آسامیاں یا ملازمتیں کسی ایک جنس کے ارکان کے لیے مخصوص کی جا سکیں گی اگر ایسی آسامیوں یا ملازمتوں میں ایسے فرائض اور کام انجام دینے ہوں جو دوسری جنس کے ارکان مناسب طور پر انجام نہ دے سکتے ہوں: نیز بشرطیکہ پاکستان کی ملازمت میں کسی طبقے یا علاقے کی کم نمائندگی کا ازالہ ایسے طریقے سے کیا جا سکے گا جو مجلسِ شوریٰ (پارلیمنٹ) کے ایکٹ کے ذریعے مقرر کیا جائے۔
- (2)
شق (1) کی کوئی بات کسی صوبائی حکومت، یا صوبے میں کسی مقامی یا دیگر ادارے کو، اس حکومت یا ادارے کے تحت کسی آسامی یا ملازمت کے طبقے کے سلسلے میں، اس حکومت یا ادارے کے تحت تقرر سے پہلے تین سال سے زائد نہ ہونے والی مدت کے لیے صوبے میں سکونت کی شرائط مقرر کرنے سے نہیں روکے گی۔