آئینِ اسلامی جمہوریہ پاکستان 1973ء (بمع ترامیم)

آرٹیکل 161: قدرتی گیس اور پن بجلی

1. (1)

   آرٹیکل 78 کے احکام کے باوجود،-

   1. (a)

      کنویں (well-head) پر عائد کردہ اور وفاقی حکومت کی وصول کردہ قدرتی گیس پر وفاقی ایکسائز ڈیوٹی کی خالص آمدنی اور وفاقی حکومت کی وصول کردہ رائلٹی وفاقی مجموعی فنڈ کا حصہ نہیں ہوگی اور اس صوبے کو ادا کی جائے گی جس میں قدرتی گیس کا کنواں واقع ہو؛

   2. (b)

      کنویں پر عائد کردہ اور وفاقی حکومت کی وصول کردہ تیل پر وفاقی ایکسائز ڈیوٹی کی خالص آمدنی وفاقی مجموعی فنڈ کا حصہ نہیں ہوگی اور اس صوبے کو ادا کی جائے گی جس میں تیل کا کنواں واقع ہو۔

2. (2)

   وفاقی حکومت یا وفاقی حکومت کے قائم کردہ یا زیرِ انتظام کسی ادارے کو پن بجلی گھر میں بجلی کی بڑی مقدار میں پیداوار سے حاصل ہونے والا خالص منافع اس صوبے کو ادا کیا جائے گا جس میں پن بجلی گھر واقع ہو۔ توضیح - اس شق کے مقاصد کے لیے “خالص منافع” کا حساب پن بجلی گھر کے بس بارز (bus-bars) سے بجلی کی بڑی مقدار میں فراہمی سے حاصل ہونے والی آمدنی سے، جو مشترکہ مفادات کی کونسل کے مقرر کردہ نرخ پر ہو، بجلی گھر کے آپریٹنگ اخراجات منہا کر کے لگایا جائے گا، جن میں محصولات، ڈیوٹیوں، سود یا سرمایہ کاری پر منافع کے طور پر قابلِ ادا کوئی رقوم، اور فرسودگی (depreciation) اور متروکیت (obsolescence) کا عنصر، اور بالائی اخراجات (over-heads)، اور ریزروز کا بندوبست شامل ہوں گے۔