آئینِ اسلامی جمہوریہ پاکستان 1973ء (بمع ترامیم)

آرٹیکل 29: اصولِ پالیسی

1. (1)

   اس باب میں بیان کردہ اصول اصولِ پالیسی کہلائیں گے، اور مملکت کے ہر شعبے اور ادارے کی، اور ہر اس شخص کی جو مملکت کے کسی شعبے یا ادارے کی جانب سے کام انجام دے رہا ہو، یہ ذمہ داری ہے کہ وہ ان اصولوں کے مطابق عمل کرے جہاں تک ان کا تعلق اس شعبے یا ادارے کے کاموں سے ہو۔

2. (2)

   جہاں تک کسی خاص اصولِ پالیسی کی پابندی اس غرض کے لیے وسائل کی دستیابی پر منحصر ہو، وہاں یہ اصول وسائل کی دستیابی کے تابع سمجھا جائے گا۔

3. (3)

   ہر سال کے لیے، صدر وفاق کے امور کے بارے میں، اور ہر صوبے کا گورنر اپنے صوبے کے امور کے بارے میں، اصولِ پالیسی کی پابندی اور ان پر عمل درآمد کے بارے میں ایک رپورٹ تیار کرائے گا اور اسے مجلسِ شوریٰ (پارلیمنٹ) کے ہر ایوان یا، جیسی بھی صورت ہو، صوبائی اسمبلی کے سامنے پیش کرے گا، اور قومی اسمبلی اور سینیٹ یا، جیسی بھی صورت ہو، صوبائی اسمبلی کے قواعدِ کار میں اس رپورٹ پر بحث کے لیے بندوبست کیا جائے گا۔