آئینِ اسلامی جمہوریہ پاکستان 1973ء (بمع ترامیم)

آرٹیکل 95: وزیراعظم کے خلاف عدمِ اعتماد کا ووٹ

1. (1)

   قومی اسمبلی کی کل رکنیت کے کم از کم بیس فیصد کی جانب سے پیش کردہ عدمِ اعتماد کے ووٹ کی قرارداد قومی اسمبلی وزیراعظم کے خلاف منظور کر سکتی ہے۔

2. (2)

   شق (1) میں مذکور قرارداد پر اس دن سے جس دن وہ قومی اسمبلی میں پیش کی جائے، تین دن گزرنے سے پہلے یا سات دن کے بعد رائے شماری نہیں ہوگی۔

3. (3)

   شق (1) میں مذکور قرارداد قومی اسمبلی میں پیش نہیں کی جائے گی جب قومی اسمبلی سالانہ میزانیے کے بیان میں اسے پیش کیے گئے مطالباتِ زر پر غور کر رہی ہو۔

4. (4)

   اگر شق (1) میں مذکور قرارداد قومی اسمبلی کی کل رکنیت کی اکثریت سے منظور ہو جائے تو وزیراعظم عہدے پر فائز نہیں رہے گا۔