آئینِ اسلامی جمہوریہ پاکستان 1973ء (بمع ترامیم)

آرٹیکل 123: مجاز اخراجات کے شیڈول کی توثیق

1. (1)

   وزیراعلیٰ اپنے دستخط سے ایک شیڈول کی توثیق کرے گا جو ظاہر کرے:-

   1. (a)

      وہ گرانٹیں جو آرٹیکل 122 کے تحت صوبائی اسمبلی نے منظور کیں یا جن کے بارے میں سمجھا جائے کہ منظور کی گئی ہیں، اور

   2. (b)

      وہ مختلف رقوم جو صوبائی مجموعی فنڈ پر بار اخراجات کو پورا کرنے کے لیے مطلوب ہوں، لیکن کسی رقم کی صورت میں اس رقم سے زیادہ نہ ہوں جو اسمبلی کے سامنے پہلے رکھے گئے بیان میں ظاہر کی گئی ہو۔

2. (2)

   اس طرح توثیق شدہ شیڈول صوبائی اسمبلی کے سامنے رکھا جائے گا، لیکن اس پر بحث یا رائے شماری نہیں ہو سکے گی۔

3. (3)

   آئین کے تابع، صوبائی مجموعی فنڈ سے کوئی خرچ باقاعدہ مجاز نہیں سمجھا جائے گا الا یہ کہ وہ اس طرح توثیق شدہ شیڈول میں مذکور ہو اور ایسا شیڈول شق (2) کے تقاضے کے مطابق صوبائی اسمبلی کے سامنے رکھا گیا ہو۔