آئینِ اسلامی جمہوریہ پاکستان 1973ء (بمع ترامیم)

آرٹیکل 224A: کمیٹی یا الیکشن کمیشن کی جانب سے تصفیہ

1. (1)

   اگر وزیراعظم اور سبکدوش ہونے والی قومی اسمبلی میں قائدِ حزبِ اختلاف نگران وزیراعظم کے طور پر مقرر کیے جانے والے کسی شخص پر قومی اسمبلی کی تحلیل کے تین دن کے اندر متفق نہ ہوں، تو وہ ایک ایسی کمیٹی کو، جو سپیکر قومی اسمبلی فوراً تشکیل دے گا اور جو سبکدوش ہونے والی قومی اسمبلی یا سینیٹ یا دونوں کے آٹھ ارکان پر مشتمل ہوگی جن میں خزانہ بنچوں اور حزبِ اختلاف کی مساوی نمائندگی ہوگی، جنہیں بالترتیب وزیراعظم اور قائدِ حزبِ اختلاف نامزد کریں گے، دو دو نامزد کردہ نام بھیجیں گے۔

2. (2)

   اگر وزیراعلیٰ اور سبکدوش ہونے والی صوبائی اسمبلی میں قائدِ حزبِ اختلاف نگران وزیراعلیٰ کے طور پر مقرر کیے جانے والے کسی شخص پر اس اسمبلی کی تحلیل کے تین دن کے اندر متفق نہ ہوں، تو وہ ایک ایسی کمیٹی کو، جو سپیکر صوبائی اسمبلی فوراً تشکیل دے گا اور جو سبکدوش ہونے والی صوبائی اسمبلی کے چھ ارکان پر مشتمل ہوگی جن میں خزانہ بنچوں اور حزبِ اختلاف کی مساوی نمائندگی ہوگی، جنہیں بالترتیب وزیراعلیٰ اور قائدِ حزبِ اختلاف نامزد کریں گے، دو دو نامزد کردہ نام بھیجیں گے۔

3. (3)

   شق (1) یا (2) کے تحت تشکیل دی گئی کمیٹی معاملہ اس کے سپرد کیے جانے کے تین دن کے اندر نگران وزیراعظم یا، جیسی بھی صورت ہو، نگران وزیراعلیٰ کا نام حتمی طور پر طے کرے گی: بشرطیکہ اگر کمیٹی مذکورہ مدت میں معاملے کا فیصلہ کرنے سے قاصر ہو تو نامزد کردہ ناموں کو دو دن کے اندر حتمی فیصلے کے لیے الیکشن کمیشن آف پاکستان کے سپرد کیا جائے گا۔

4. (4)

   موجودہ وزیراعظم اور موجودہ وزیراعلیٰ نگران وزیراعظم اور نگران وزیراعلیٰ، جیسی بھی صورت ہو، کے تقرر تک اپنے عہدے پر فائز رہیں گے۔

5. (5)

   شقوں (1) اور (2) میں مذکور کسی امر کے باوجود، اگر حزبِ اختلاف کے ارکان مجلسِ شوریٰ (پارلیمنٹ) میں پانچ سے کم اور کسی صوبائی اسمبلی میں چار سے کم ہوں تو ان سب کو مذکورہ شقوں میں بیان کردہ کمیٹی کا رکن بنایا جائے گا اور کمیٹی کو باقاعدہ تشکیل شدہ سمجھا جائے گا۔