ماہنامہ ترجمان القرآن، جنوری 2026

یہ سوال اکثر اٹھایا جاتا ہے کہ ’کیا اطاعتِنظم فرد کی آزادی کو سلب کر لیتی ہے؟‘

درحقیقت اطاعت، غلامی نہیں بلکہ نظم و ضبط (discipline) ہے۔ فرد کی اصل آزادی یہ ہے کہ وہ اپنی خواہشات کا غلام نہ بنے بلکہ اپنی صلاحیتوں کو ایک اعلیٰ و ارفع مقصد کے لیے وقف کردے۔ جماعت کے عہدِ رکنیت میں اطاعت کا وعدہ، فرد کو انتشار اور اپنی خواہشات سے بچا کر اس کی صلاحیتوں کو ایک بڑی اجتماعی قوت کا حصہ بنا دیتا ہے۔ یہی وجہ ہے کہ جب ایک کارکن ' سَمِعْنَا وَاَطَعْنَا ' کہتا ہے تو وہ اپنی خواہشات کو محدود کرتے ہوئے اپنے مقصد اور مشن کو وسیع کرتا ہے۔ ایمان والے سَمِعْنَا وَاَطَعْنَا کہہ کر اللہ کے احکام کے سامنے جھکتے ہوئے اپنے دینی قافلے کے نظم و ضبط کی پابندی کرکے سیسہ پلائی ہوئی دیوار کی طرح اللہ کے دین کی سربلندی کے لیے کھڑے ہوجاتے ہیں۔ یہی وہ پابندی اور ڈسپلن ہے جو صحابہؓ کی جماعت کو دنیا میں فاتح اور آخرت میں جنّت کا وارث بنا گیا اور یہی وہ اصول ہے جو آج بھی اسلامی تحریک کی کامیابی کی ضمانت ہے۔