ماہنامہ ترجمان القرآن، جنوری 2026

اگر کوئی شخص ہماری دعوت کو سمجھ چکا ہے، ہماری باتوں سے اتفاق رکھتا ہے، ہمارے اصولوں سے وہ متاثر ہے اور انھی کوخیروبہتری کی کنجی سمجھتا ہے،نیز اس کے دل کو یقین کی ٹھنڈک حاصل ہے، اور ذہن لذتِ اطمینان سے بہرہ مند ہے، تو ایسے شخص کو ہم دعوت دیں گے کہ وہ جلدسے جلد آکر ہمارے ساتھ شامل ہوجائے۔ ہمارے ساتھ مل کر کام کرے کہ اس طرح راہِ حق میں خدمت انجام دینے والوں کی تعداد میں اضافہ ہو اور اہل دعوت کی آواز پُراثر ہو۔ ورنہ ایسے ایمان کے کیا معنی جو ولولۂ شوق اور جوشِ عمل سے بے تاب نہ کردے؟ ایسے عقیدے سے کیا حاصل، جو کردار اور جذبۂ ایثار سے سرشار نہ کردے؟ اوّلین مومنین جن کے سینےاللہ تعالیٰ نے ہدایت کے لیے کھول دیئے تھے، ان کا یہی حال تھا۔ انھوں نے انبیا علیہم السلام کی پیروی کی، ان کے پیغامات پر ایمان لائے اور راہِ خدا میں جی جان سے قربان ہوگئے۔ بلاشبہہ وہ خدا کے ہاں اجرعظیم سے ہم کنار ہوں گے۔ اور بعد میں جتنے لوگ بھی ان کی راہ اپنائیں گے، ان کے ثواب میں شریک ہوں گے، تاہم خود ان کے ثواب میں کوئی کمی نہ ہوگی۔