ماہنامہ ترجمان القرآن، جنوری 2026

ہماری قوم کو جاننا چاہیے کہ وہ ہمیں اپنی جانوں سے زیادہ عزیز ہے۔ یہ روحیں تو اس آرزو میں جیتی ہیں کہ اس کی عزّت و ناموس پر فدا ہوجائیں۔ وہ اپنی جانوں پر کھیل کر اس کے شرف، اس کی عزّت، اس کے دین و مذہب اور اس کے ارمانوں کی قیمت ادا کریں۔

یہی جذبہ ہے جس نے ہمیں اس راہ کا دیوانہ بنادیا ہے۔ یہ جذبہ ہمارے رگ و پے میں سرایت کرگیا ہے۔ دل و دماغ پر چھا گیا ہے اور جذبات و احساسات پر حاوی ہوگیا ہے۔ چنانچہ اب آنکھیں اُمڈی پڑتی ہیں، اور بستر کانٹوں کی طرح چبھتے ہیں۔

آخر یہ کیوں کر ممکن ہے کہ یہ آنکھیں قوم کو ہلاکت کے نرغے میں تڑپتے اور جاتے دیکھیں اور پھر ہم ذلّت کے آگے ہتھیار ڈال دیں، رُسوائی پر راضی ہوجائیں اور یاس و نااُمیدی کے آگے سرجھکا دیں؟ ہم اپنے لیے جتنا کرتے ہیں، اس سے کہیں زیادہ اوروں کے لیے کرتے ہیں۔ میرے دوستو! یقین رکھو، ہم آپ ہی کے ہیں کسی اور کے نہیں، اور ہم کبھی آپ کے بدخواہ نہیں ہوسکتے۔