ماہنامہ ترجمان القرآن، جون 2026

مرحومہ کا تعلق انڈیا کے شہر حیدرآباد (تلنگانہ) سے تھا، جہاں انھوں نے ابتدائی تعلیم کے بعد عثمانیہ یونی ورسٹی حیدرآباد سے گریجوایشن کیا۔ پھر وینکٹ سورا یونی ورسٹی سے سیاسیات میں ماسٹرز کیا۔ اعلیٰ تعلیم کے لیے علی گڑھ مسلم یونی ورسٹی سے پہلے ایم فل اور پھر ۱۹۹۱ء میں ڈاکٹریٹ کی ڈگریاں حاصل کیں۔ حیدرآباد ہی کے ایک نوجوان اسکالر جناب ڈاکٹر ممتاز علی سے نکاح کے بعد ان کے ساتھ ملائشیا منتقل ہو گئیں، جہاں انھوں نے طویل عرصے تک انٹرنیشنل اسلامک یونی ورسٹی آف ملائشیا کے شعبہ سیاسیات میں تدریس و تحقیق کی خدمات انجام دیں اور پھر قطر یونی ورسٹی سے بھی وابستہ رہیں۔

۱۹۷۰ء سے لے کر ۱۹۸۰ء تک اپنی تعلیم کے دوران وہ علامہ محمد اقبال، مولانا سیّد ابوالاعلیٰ مودودی، مولانا ابو الکلام آزاد، سعید النورسی، ڈاکٹر علی شریعتی، ڈاکٹر اسماعیل راجی الفاروقی، اور علامہ یوسف القرضاوی رحمہم اللہ اجمعین کے علمی اثاثے کا مطالعہ کرتی رہیں۔ تاہم، زینت کوثر سب سے زیادہ مولانا مودودی کی فکر اور ان کے طریقۂ استدلال سے متاثر ہوئیں۔ اس لیے وہ اسلام کو ایک تصورِ حیات اور نظامِ زندگی کے طور پر پیش کرتیں ہیں۔ وہ مغرب کے فکری غلبہ سے متاثر یا مرعوب نہیں ہوئیں، بلکہ زندگی کی حقیقت اور سچائی کو علمی اور سائنسی بنیادوں پر پیش کرتی، اور مغربی تصورات و نظریات پر اپنی متعدد تحریروں میں تجزیہ کرتی نظر آتی ہیں۔