الجہاد فی الاسلام

ایک اور قوی و شدید محرک جس نے عرب کی تاریخ کو خون سے رنگین کر دیا تھا انتقام کا جذبہ تھا۔ عرب یہ عقیدہ رکھتے تھے کہ جب کوئی شخص قتل کیا جاتا ہے تو اس کی روح پرند بن کر اڑ جاتی ہے اور جب تک اس کا بدلہ نہ لے لیا جائے وہ کوہ و بیاباں میں اسقونی، اسقونی (مجھے پلاؤ، مجھے پلاؤ) کہہ کر چیختی پھرتی ہے۔ ان کی اصطلاح میں اس پرندے کا نام ہامہ یا صدا تھا۔

بعض لوگوں کا یہ عقیدہ تھا کہ جس مقتول کا انتقام لے لیا جاتا ہے وہ زندہ رہتا ہے اور جس کا انتقام نہیں لیا جاتا وہ بے جان ہو جاتا ہے۔ بعض لوگ یہ سمجھتے تھے کہ جب تک بدلہ نہ لے لیا جائے مقتول کی قبر میں اندھیرا رہتا ہے۔ اس قسم کے عقائد کی بنا پر مقتول کے رشتہ دار، اہل قبیلہ، حتیٰ کہ اس کے قبیلہ کے حلیف تک اپنا فرض سمجھتے تھے کہ اس کے قاتل سے خون کا بدلہ لے کر اس کی روح کو مطمئن کر دیں۔ اگر قاتل اس کے درجہ سے کمتر درجہ کا آدمی ہوتا تو اس کے قبیلہ کے کسی ایسے آدمی کو قتل کرنے کی کوشش کی جاتی تھی جس کا خون ان کے خیال میں مقتول کے خون کے برابر قیمت رکھتا ہو۔ اس طرح بسا اوقات ایک شخص کے قتل ہو جانے سے بڑے بڑے قبیلوں میں آگ لگ جاتی تھی اور ایسی خون ریزیوں کا سلسلہ شروع ہوتا تھا کہ سالہا سال تک نہ تھمتا تھا۔ اگر کوئی شخص یا قبیلہ اپنے آدمی کے خون کا بدلہ (ثار) لینے میں کوتاہی کرتا یا اس کے عوض خوں بہا قبول کر لیتا تو یہ بڑی ذلت کی بات سمجھی جاتی تھی، اور اس بزدلی سے اس کی شرافت کو بٹہ لگ جاتا تھا۔

شعرائے جاہلیت کے کلام میں جو مضامین بکثرت وارد ہوئے ہیں ان میں سے ایک یہی ثار کا عقیدہ ہے۔ وہ اسی عقیدہ کی بنا پر قوموں کو جنگ کا جوش دلاتے تھے اور رجز میں اکثر اس بات پر فخر کرتے تھے کہ ان کے قبیلہ نے کبھی اپنے کسی مقتول کا خون رائیگاں نہ جانے دیا۔ سموال بن عادیا کہتا ہے:

<<وما مات منا سید حتف انفه>>

<<ولا طلَّ منا حيث كان قتيل>>

”ہم میں کا کوئی سردار اپنی ناک کی موت نہیں مرا، اور جب ہمارا کوئی آدمی مارا گیا تو اس کا خون بھی رائیگاں نہ گیا۔“

حارث بن حلِزَّہ کہتا ہے:

<<ان نبشتم ما بين ملحة فالصا>>

<<قب فيها الاموات والاحياء>>

”اگر تم ملحہ سے صاقب تک قبریں کھودو گے تو دیکھو گے کہ کچھ مدفون مردہ ہیں (جن کا خون رائیگاں گیا اور وہ تم میں سے ہیں) اور کچھ زندہ ہیں (جن کا ثار لے لیا گیا اور وہ ہم میں سے ہیں)۔“

قیس بن عاصم اپنے قبیلہ کو جوش انتقام دلانے کے لیے کہتا ہے:

<<فما بالاصداء بفليج غريبة>>

<<تنادى مع الاطلال يا لابن حنظل>>

”ان بے چارے ”صداؤں“ کا کیا حال ہے جو فلج میں چیختے پھر رہے ہیں کہ ”ہائے ابن حنظل کا بدلہ کسی نے نہ لیا۔“

<<صوادی لا مولى عزيز يجيبها>>

<<ولا اسرة تسقى صداها بمنهل>>

”وہ صدائیں جن کی چیخوں اور فریادوں کا جواب دینے کے لیے نہ کوئی طاقتور حامی موجود ہے اور نہ کوئی ایسا خاندان ہے جو انھیں گھاٹ پر سیراب کرے۔“

تأبط شراً اپنے مفاخر بیان کرتے ہوئے کہتا ہے:

<<هيم الى الموت اذا خيّروا>>

<<بين تباعات وتقتال>>

”وہ موت کے مشتاق ہوتے ہیں جب ان کو خوں بہا لینے اور لڑنے کے درمیان انتخاب کا اختیار دیا جاتا ہے۔“

بنی اسد کا ایک شاعر اپنے قبیلہ کو وصیت کرتا ہے:

<<فلا تاخذوا عقلا من القوم اننى>>

<< ارى العار يبقى والمعاقل تذهب>>

”میرے خون کے بدلہ میں دشمن قبیلہ سے دیت نہ قبول کر لینا کیوں کہ عار باقی رہ جاتا ہے اور دیت کا مال خرچ ہو جاتا ہے۔“

بنوخزاعہ کا ایک شاعر اپنے قبیلہ کو انتقام کا جوش اس طرح دلاتا ہے:

<<ولا تطمعن ما يعلفونك انهم>>

<< اتوك على قرباهم بالمغفل>>

”جو کچھ وہ تجھے دیت میں دیتے ہیں اس کا خیال بھی نہ کر کیوں کہ وہ باوجود قرابت کے تیرے پاس زہر ہلاہل لائے ہیں۔“

<<ابعد الازار مجسدا لک شاهدا >>

<<اتيت به فى الدار لم يتزيل>>

”کیا تو وہ خون آلود ازار دیکھنے کے بعد دیت لے گا جو تیرے پاس لائی گئی اور جس سے ابھی تک خون دور نہیں ہوا ہے؟“

<<اراك اذا قد صرت للقوم ناضحا>>

<< يقال له بالغزب ادبروا قبل>>

”اگر تو نے ایسا کیا تو میں سمجھتا ہوں کہ تو وہ آب کش اونٹ بن گیا ہے جس پر پکھال رکھ کر کہتے ہیں آگے بڑھ اور پیچھے ہٹ۔“

<<فخذها فليست للعزيز بخطبة >>

<<وفيها مقال لامرىء متذلل>>

”اگر تو چاہے تو لے لے، مگر یہ شریفوں کا چلن نہیں ہے، اور اس میں تو ذلیل آدمی کو بھی کلام ہوگا۔“

کبشہ بنت معدیکرب اپنے بھائی کے خون کا بدلہ لینے کے لیے بنی زبید کو اس طرح ابھارتی ہے:

<<ارسل عبدالله اذ حان وقته>>

<<الى قومه لا تعقلوا لهم دمى>>

”عبداللہ کا جب آخری وقت آیا تو اس نے اپنی قوم کو (زبان حال سے) کہلا بھیجا کہ ان سے میرے خون کی دیت نہ قبول کرنا۔“

<<ولا تاخذوا منهم افالا وابكرا>>

وأترك في بيت بصعدة مظلم>>

”تم ان سے بچے اور جوان اونٹ لے کر نہ بیٹھ جانا درآں حالے کہ میں صعدہ کی ایک تاریک قبر میں پڑا رہوں۔“

<<فان انتم لم تثاروا وانديتم>>

<<فمشوا بأذان النعام المصلم>>

”اگر تم نے میرے خون کا بدلہ نہ لیا اور دیت قبول کر لی تو تم کن کٹے شتر مرغ کی طرح ذلیل پھرو۔“

<<ولا تردوا الا فضول نسائكم>>

<<اذا ارتمات اعقابهن من الدم>>

”اور نہ آؤ اپنی عورتوں کے پاس سوائے ایام کی حالت کے جب کہ ان کی ایڑیاں تک خون سے سنی ہوں۔“

یہ عرب کی قبائلی عداوتوں اور لڑائیوں کے اصلی محرکات ہیں۔ ان میں کسی شریف تر اور بلند تر نصب العین کا نام و نشان تک نہیں ہے۔ وہی خالص بہیمی اور حیوانی داعیات جو ایک درندے کو اپنے مد مقابل کے پھاڑ کھانے پر ابھارتے ہیں، زیادہ ترقی یافتہ مگر زیادہ خوفناک صورت میں ان کے لیے بھی قتل و غارت گری کے محرک ہوتے تھے۔ جنگ ان کی سیرت کے محض حیوانی پہلو سے تعلق رکھتی تھی۔ انسانی و ملکوتی پہلو سے اس کا کوئی تعلق نہ تھا بلکہ ان کے ذہن اس تصور سے بھی خالی تھے کہ جنگ کو بنی آدم کے اس برتر اخلاقی پہلو سے بھی کوئی تعلق ہو سکتا ہے۔