الجہاد فی الاسلام

عرب قدیم کے حالات معلوم کرنے کے لیے ہمارے پاس صرف دو ذریعے ہیں۔ ایک وہ داستانیں جو ایام العرب کے نام سے اہل عرب میں رائج تھیں۔ دوسرے شعرائے عرب کا کلام جس میں وہ اپنی سوسائٹی کی معاشرت، تہذیب، معاملات اور امیال و عواطف کی صحیح صحیح تصویریں کھینچتے تھے۔ عجم کی طرح ان کی شاعری نازک خیالیوں اور مبالغہ آفرینیوں کا مجموعہ نہ تھی بلکہ وہ اپنے گرد و پیش جو کچھ دیکھتے تھے اسی کو اپنی زبان میں بے تکلف ادا کرتے تھے۔ اس لیے ان کی شاعری نری شاعری ہی نہ تھی بلکہ قومی سیرت کی تصویر بھی تھی۔ جنگ کے متعلق اہل عرب کا تصور کیا تھا؟ وہ اس کو کیا سمجھتے تھے؟ ان کے لڑنے کے طریقے کیا تھے؟ دشمن کے ساتھ ان کا برتاؤ کیسا تھا؟ کون کون سے محرکات ان کو جنگ پر ابھارتے تھے؟ کن اغراض و مقاصد کے لیے وہ جنگ کیا کرتے تھے؟ ان سب سوالات کا جواب ہمیں ان اشعار میں ملتا ہے۔ جن اصطلاحات، تشبیہات اور استعارات کو وہ جنگ کے متعلق اپنے خیالات کا اظہار کرنے کے لیے استعمال کرتے تھے وہ ان کے تصور جنگ کا ٹھیک ٹھیک نقشہ کھینچ دیتے ہیں۔ مثال کے طور پر ہم یہاں چند الفاظ و محاورات اور استعارات و تشبیہات کو نقل کرتے ہیں:

<<حرب: >> جنگ کے لیے ایک عام لفظ ہے۔ لغت میں اس کے اصلی معنی غصہ کرنے کے ہیں۔

<<تحریب:>> غصہ دلانے اور بھڑکانے اور نیزہ تیز کرنے کو کہتے ہیں۔

<<حَرب:>> کسی کے مال کو لوٹ لینا۔

<<حَریبہ:>> لوٹا ہوا مال جس پر آدمی زندگی بسر کرتا ہے۔

<<محروب>> اور<< حریب:>>وہ شخص جس کا مال لوٹ لیا گیا ہو۔

<<احراب:>> دشمن کا مال لوٹنے کے لیے کسی کی رہنمائی کرنا۔

<<رَوع:>> لڑائی کے لیے عام طور پر بولا جاتا ہے۔ اس کے اصلی معنی فزع اور خوف کے ہیں۔

گویا جنگ کو ایک خوفناک چیز سے موسوم کیا گیا ہے۔ وَذّاک بن شُمَیل المازنی کہتا ہے:

<<مقاديم وصالون فى الروع خطوهم>>

”وہ آگے بڑھنے والے اور لڑائی کے خطرہ میں قدم ملا کر چلنے والے ہیں۔“

وغی: یہ بھی لڑائی کا ایک مشہور نام تھا۔ اس کے لغوی معنی شور و ہنگامہ کے ہیں۔ شاعر کہتا ہے:

<<ما زال معروفا لمُغَزّة فى الوغى>>

<<عَلَى القنا وعليهم انها لَهَا>>

”ہمیشہ سے بنو مرہ کی یہ صفت مشہور ہے کہ وہ جنگ میں بار بار دشمنوں کے خون سے اپنے نیزوں کی پیاس بجھاتے ہیں اور کم از کم ایک مرتبہ ان کی تشنگی فرو کرنا تو ان پر فرض ہے۔“

<<شر: >> اصلی معنی بدی کے ہیں اور جنگ کے لیے مجازاً بکثرت بولا جاتا ہے۔ شاعر اپنے ممدوح قبیلہ کی اس طرح تعریف کرتا ہے:

<<قوم اذا الشرا بدى ناجذيه لهم>>

<<طاروا اليه زرافات ووحدانا>>

”وہ ایسی قوم ہیں کہ جب لڑائی اپنی کچلیاں نکال کر اُن کو ڈراتی ہے تو وہ گروہ در گروہ اور تنہا تنہا اس کے مقابلہ کے لیے دوڑ پڑتے ہیں۔

<<کریھۃ:>> یہ بھی اسمائے جنگ میں سے ہے اور اس کے اصلی معنی سختی، مصیبت اور بلا کے ہیں۔

شاعر اپنے ممدوح کی تعریف میں کہتا ہے:

<<صعب الكريهة لا يرام جنابه>>

<<ماضى العزيمة كالحسام المقصل>>

”وہ جنگ کی مصیبت میں سخت ہے، اس کی بارگاہ کا کوئی قصد نہیں کر سکتا، شمشیر براں کی طرح ارادہ کا پورا ہے۔“

<<ھیاج:>> بر انگیختگی و خشم گرفتگی کے معنی میں آتا ہے اور مجازاً جنگ کے لیے بھی بولا جاتا ہے۔

شاعر کہتا ہے:

<<كل امرئ يجرى الى>>

<<يوم الهياج بما استعدا>>

”ہر شخص لڑائی کے دن اسی سامان کے ساتھ جاتا ہے جو اس نے مہیا کیا ہے۔“

<<مَغضَبَۃ:>> اصلی معنی غصہ و ناراضی اور خشم گرفتگی کے ہیں اور عرف عام میں جنگ کے لیے مستعمل ہوتا ہے۔ ابن عنتمہ کہتا ہے:

<<ان تدع زيدٌ بنى ذُهل لمغضبة>>

<<نغضب لزرعة ان الفضل محسوب>>

”اگر زید بنی ذہل کو جنگ کے لیے بلائے گا تو ہم بنی زرعہ کی طرف سے لڑیں گے کیوں کہ فضیلت محسوب ہوتی ہے۔“

شعرائے عرب نے جنگ کو مینڈھوں کے ٹکرانے سے تشبیہ دی ہے۔ چنانچہ اس کے لیے وہ<< نطاح>> کا لفظ استعمال کرتے ہیں۔ سعد بن مالک کہتا ہے:

<<والكر بعد الفراد>>

<<كره والتقدم والنطاح>>

”گریز کے بعد پلٹ پڑنا بہتر ہے جب کہ یکلخت پیش قدمی کر کے دشمن سے ٹکر لڑنا پسند نہ ہو۔“

جنگ کو اونٹ کے سینے سے تشبیہ دی گئی ہے، کیوں کہ اونٹ جب کسی چیز پر اپنا سینہ رکھ دیتا ہے تو وہ پس کر رہ جاتی ہے اور اس لیے بھی کہ اونٹ ایک سخت کینہ پرور اور انتقام جو جانور ہے۔ شاعر کہتا ہے:

<<انختم علينا كلكل الحرب مرَّةً>>

<<فنحن منيخوها عليكم بكلكل>>

”تم نے ایک مرتبہ ہمارے اوپر جنگ کے سینہ کو رکھا ہے، اس لیے ہم بھی عنقریب تم پر اس کا سینہ رکھنے والے ہیں۔“

جنگ کو چکی سے تشبیہ دی گئی ہے، کیوں کہ وہ بھی دشمن کو آٹے کی طرح پیس دیتی ہے۔ ابوالغَول طہوی کہتا ہے:

<<فوارس لا يَمَلُّون المنايا>>

<<اذا دارت رحى الحرب الزَّبون>>

”وہ ایسے شہسوار ہیں کہ موت سے نہیں گھبراتے جبکہ شدید جنگ کی چکی چلتی ہے۔“

عَمر و بن کلثوم کہتا ہے:

<<متى ننقل الى قوم رحانا>>

<<يكونوا فى اللقاء لها طحينا>>

”جب ہم کسی قوم کی طرف اپنی چکی کو لے جاتے ہیں تو وہ لڑائی میں اس کا آٹا بن جاتی ہے۔“

جنگ کے لیے محض ”چکر“ کا استعارہ بھی مستعمل تھا۔ عَنترہ بن شداد عَبسی کہتا ہے:

<<ولقد خشيتُ بان اموتَ ولم تكن>>

<<للحرب دائرة على ابنى ضمضم>>

”مجھے اندیشہ ہے کہ کہیں ایسا نہ ہو کہ میں مر جاؤں اور <<ضمضم >> کے دونوں بٹنے لڑائی کے چکر میں نہ آئیں۔“

جنگ کو آگ سے بھی بکثرت تشبیہ دی گئی ہے، کیوں کہ وہ بھی دشمن کو آگ کی طرح جھلس دیتی ہے۔ حارث بن حلزہ کہتا ہے:

<<ما جزعنا تحت العجاجة اذ>>

<<ولوا شلالا واذا تلظى الصلا>>

”ہم گرد و غبار میں مضطرب نہ ہوئے جبکہ سوار متفرق ہو کر بھاگے اور جنگ کی آگ خوب بھڑکی۔“

سعد بن مالک کہتا ہے:

<<صد عن نيرانها من>>

<<فانا ابن القيس لا براح>>

”کوئی جنگ کی آگ سے منہ موڑ جائے تو موڑ جائے، میں تو قیس کا بیٹا ہوں، ہرگز نہ ٹلوں گا۔“

بشامہ بن عذیر کہتا ہے:

<<قومى بنو الحرب العوان بجمعهم>>

<<والمشرفية والقنا اشعالها>>

”میری قوم ساری کی ساری شدید جنگ کی حریف ہے اور اس کے پاس مشرفی تلوار اور نیزہ جنگ کی آگ کو بھڑکانے کا ایندھن ہے۔“

ابوالغول طہوی کہتا ہے:

<<ولا تبلى بسالتهم وان هم>>

<<صلوا بالحرب حينا بعد حين>>

”ان کی دلیری و مردانگی میں کمی نہیں آتی، اگر چہ وہ آتش جنگ میں پے در پے کودتے ہیں۔“

ان تمام تشبیہوں اور استعاروں اور محاوروں سے معلوم ہوتا ہے کہ اہل عرب کے تصور میں جنگ ایک ایسی چیز کا نام تھا جس میں لوٹ مار ہو، شور و ہنگامہ ہو، غضب و اشتعال ہو، جس کے خلاف لڑی جائے اس کو پیس دے، جھلس دے، تہس نہس کر دے اور اس پر ایسی مصیبتیں وارد ہوں جن کے خوف سے رونگٹے کھڑے ہو جائیں۔ دو لڑنے والے دشمنوں کی بہییت ان کے تصور میں اس مینڈھے کے مانند تھی جو غضب ناک ہو کر اپنے حریف سے ٹکر لیتا ہے۔ اس جنگ میں شجاعت و بسالت کا جوہر تو ضرور ہے مگر اخلاقی فضیلت اور انسانی شرافت کا نام تک نہیں۔