الجہاد فی الاسلام

اسیرانِ جنگ کے متعلق یورپ کے قوانین بہت مکمل ہیں۔ مگر پروفیسر مارگن کے بقول ان کے مکمل ہونے کی اصلی وجہ یہ ہے کہ ان کے بارے میں تمام سلطنتوں کے مفاد مشترک ہیں۔ ہر سلطنت خود اپنے سپاہیوں اور افسروں کی آسائش چاہتی ہے، اس لیے وہ محض مبادلہ کے طور پر مخالف کے سپاہیوں اور افسروں کو بھی آسائش پہنچانے پر راضی ہو جاتی ہے۔ [War, Its Conduct and Legal Results]

لیکن یہ مہذب قوانین بہت قریبی عہد کی پیداوار ہیں۔ سترھویں صدی تک یورپ میں اسیرانِ جنگ کو غلام بنانے کا دستور تھا۔ گروشیوس نے اس طریقے کے خلاف آواز بلند کی اور عیسائی اقوام کو مشورہ دیا کہ وہ ایک دوسرے کو غلام بنا کر بیچنے کے بجائے اسیرانِ جنگ کو فدیہ لے کر چھوڑ دیا کریں ۔ مگر ایک صدی تک اس کی سفارشات بے اثر رہیں ۔ اٹھارویں صدی کی ابتدا میں فدیہ اور تبادلہ اسیران جنگ کا طریقہ جاری ہوا اور صدی کے اختتام تک سلطنتیں اس پر کاربند رہیں ۔ ۱۷۸۰ء میں فرانس اور انگلستان کے درمیان مبادلہ اور مفادات کے متعلق جو معاہدہ ہوا تھا اس میں ایک سپاہی کی قیمت ایک پونڈ اور ایک امیر البحر یا مارشل کی قیمت ۲۰ پونڈ یا ۲۰ سپاہی قرار دی گئی تھی ۔ انیسویں صدی میں یورپ نے مفادات کا طریقہ چھوڑ دیا اور صرف مبادلہ کا طریقہ باقی رکھا۔ لیکن تہذیب کے اسباب کے زمانہ میں بھی اسیران جنگ کو قتل کرنے کا طریقہ بالکل موقوف نہیں ہوا تھا ۔ چنانچہ ۱۷۹۹ء میں مہذب یورپ کے سب سے بڑے جنرل نیپولین بونا پارٹ نے یافا کی چار ہزار تر کی فوج کو جس نے جان بخشی کا وعدہ لے کر اطاعت قبول کی تھی ، صرف اس عذر کی بنا پر قتل کرا دیا کہ وہ انھیں کھلانے کے لیے خوراک مہیا نہیں کر سکتا تھا اور نہ مصر بھیجنے کا انتظام کر سکتا تھا ۔[Allison, History of Europe, III, XXV] اس کے تقریباً ایک صدی بعد مغربی دنیا میں پھر اسی جرم کا ارتکاب کیا گیا جس کو ابھی تیس برس سے کچھ زیادہ زمانہ نہیں گزرا ہے ۔ ۱۸۹۲ء میں کیوبا کے ہسپانوی کیپٹن جنرل ویلر (Gen. Weyler) نے اسیران جنگ کو باغی قرار دے کر قتل کرا دیا تھا ، اور ہزاروں نہتے باشندوں کو پکڑ کر اس طرح قید کر دیا تھا کہ وہ مکھیوں اور مچھروں کی طرح بھوکے پیاسے مر گئے ۔

بہر حال یہ ایک واقعہ ہے کہ اسیران جنگ کے متعلق ضابطہ قواعد ۱۸۷۴ء کی بروسلز کا نفرنس میں وضع کیے گئے ۔ ۱۸۹۹ء کی ہیگ کا نفرنس نے ان کی توثیق کی اور ۱۹۰۷ء کی دوسری ہیگ کا نفرنس نے ان کو مکمل کر کے ایک بین الملی قانون بنا دیا ۔ یہ قواعد ہمیں مفاہمت ہیگ نمبر ۳ سے ملحق ضوابط میں ملتے ہیں جن کا خلاصہ یہاں نقل کیا جاتا ہے :

دفعہ ۳ : اسیران جنگ محارب حکومت کے قبضہ اختیار میں ہوں گے ، نہ کہ ان اشخاص کے قبضہ میں جنھوں نے ان کو گرفتار کیا ہو۔ ان سے انسانیت کا سلوک روا رکھنا چاہیے۔ ان کے پاس اسلحہ، گھوڑوں اور جنگی کاغذات کے ماسوا جو اشیاء ہوں گی، وہ ان سے چھین نہیں لی جائیں گی، نہ کہ ان کے مذہبی

اشیاء موجود ہوں وہ انہی کی ملک رہیں گی۔

دفعہ ٥: اسیران جنگ کو عموماً نظر بند رکھنا چاہیے، لیکن اگر تحفظ کے لیے ناگزیر ہو تو قید بھی کیا جاسکتا۔

دفعہ ٦: قید کرنے والی حکومت اسیران جنگ سے ان کے درجہ کو ملحوظ رکھ کر کام لے سکتی ہے (افسر ہر حال میں اس سے مستثنیٰ ہیں) بشرطیکہ وہ کام حد سے زیادہ نہ ہو اور جنگی اعمال سے اس کا کوئی تعلق نہ ہو۔ انھیں اس کام کا معاوضہ دیا جائے گا جو اسی شرح کے مطابق ہونا چاہیے جس پر خود اس حکومت کے اسی درجہ کے آدمیوں کو دیا جاتا ہو۔

دفعہ ٧: اسیران جنگ جس حکومت کے قبضہ میں ہوں وہی ان کے گزارہ کی ذمہ دار ہوگی، خاص صورتوں کے ماسوا ان کے قیام کا بندوبست اسی پیمانہ پر ہونا چاہیے جس پر خود گرفتار کرنے والی حکومت اپنے اسی درجہ کے ملازموں کے لیے کرتی ہو۔

دفعہ ٨: اسیران جنگ ان قوانین کے تابع ہوں گے جو قید کرنے والی سلطنت میں نافذ ہوں۔ نافرمانی کا ہر فعل ان کے حق میں ایسی سختیوں کو جائز کر دے گا جو اس کے لیے ضروری ہوں۔ بھاگنے والے قیدی اگر اپنی فوج تک پہنچنے سے پہلے گرفتار ہو جائیں تو تادیبی (Disciplinary) سزا کے مستوجب ہوں گے اور اگر اپنی فوج میں پہنچنے کے بعد دوبارہ گرفتار ہوں تو ان کو گزشتہ جرم کی سزانہ دی جائے گی۔

دفعہ ٩: ہر اسیر جنگ کا فرض ہوگا کہ اگر اس سے اس کا نام اور عہدہ دریافت کیا جائے تو وہ ٹھیک ٹھیک بتا دے۔ نہ بتانے یا غلط بتانے کی پاداش میں اس کی آسائشیں کم کر دی جائیں گی۔

دفعہ ١٠: اسیر ان جنگ کو یہ وعدہ لے کر رہا کیا جا سکتا ہے کہ وہ جنگ میں پھر حصہ نہ لیں گے۔ اگر کوئی اسیر اس طرح رہائی حاصل کرلے تو اس کا فرض ہوگا۔کہ اپنا عہد پورا کرے، اس کی حکومت اس کو عہد شکنی پر مجبور نہ کرے گی۔

دفعہ ا ا: کسی اسیر جنگ کو مشروط رہائی حاصل کرنے کے لیے مجبور نہ کیا جائے گا اور نہ کوئی حکومت اس پر مجبور ہوگی کہ ہر حال میں کسی اسیر کی درخواست رہائی قبول کرلے۔

دفعہ ۱۲: اگر کوئی اسیر جنگ مشروط رہائی حاصل کرنے کے بعد دوبارہ اسی حکومت کے خلاف لڑنے آئے تو اسے اسیران جنگ کے حقوق حاصل نہ ہوں گے اور گرفتار ہونے کی صورت میں اس پر مقدمہ چلایا جائے گا۔

دفعہ ۱۳: جو غیر مقاتل لوگ کسی فوج کے ساتھ باضابطہ تعلق کے بغیر شامل ہوں، مثلاً اخباروں کے نامہ نگار وغیرہ، ان کو گرفتار کر کے اسیران جنگ کے طور پر رکھا جا سکتا ہے۔

دفعہ ۱۴: دورانِ جنگ میں ہر سلطنت ایک محکمہ اطلاعات قائم کرے گی جو ہر قیدی کے متعلق ضروری معلومات فراہم رکھے گا اور ان کی قومی حکومت کو وقتاً فوقتاً ان کے حالات سے مطلع کرتا رہے گا۔

دفعہ ۱۵: اسیرانِ جنگ کی امدادی سوسائٹیاں جو اپنے ملک کے قانون کے مطابق قائم کی گئی ہوں، محارب فریقین کی جانب سے ہر قسم کی آسانیوں کی مستحق ہوں گی، ان کو اور ان کے ایجنٹوں کو نظر بندی اور قید کی حالت میں اسیروں تک پہنچنے اور اپنے فرائض انجام دینے کی اجازت ہوگی، بشرطیکہ وہ مقامی حکام کی ہدایات کے مطابق عمل کریں۔

دفعہ ۱۶: محکمہ اطلاعات ڈاک کے محصول سے مستثنیٰ ہوگا۔ خطوط، منی آرڈر اور قیمتی اشیاء اور پارسل جو اسیران جنگ کے نام یا ان کی جانب سے بھیجے جائیں ڈاک کے خرچ سے دونوں ملکوں میں مستثنیٰ ہوں گے، ان پر کسی قسم کی چنگی بھی نہ ہوگی اور ریلوے کا محصول نہ لگایا جائے گا۔

دفعہ ۱۷: گرفتار شدہ افسروں کو اسی شرح سے تنخواہ دی جائے گی جو قید کرنے آخری میں خودان کی والی حکومت اپنے اسی درجہ کے ملازموں کو دیتی ہو ۔ یہ رقم آخری میں خودان کی حکومت ادا کر دے گی ۔

دفعہ ۱۸: قیدیوں کو اپنے مذہبی فرائض ادا کرنے کی آزادی ہو گی اور وہ ان قواعد کے تحت جو ضبط و نظام کی خاطر مقرر کیے گئے ہوں، اپنے مذہب کے کلیسا میں جاسکیں گے ۔

دفعہ ۱۹: اسیران جنگ کی وصیتیں اسی طرح پوری کی جائیں گی جس طرح قومی فوج کے سپاہیوں کی کی جاتی ہیں ۔ وفات پانے کی صورت میں ان کی تجہیز و تکفین اسی عزت کے ساتھ کی جائے گی جو ان کے ہم رتبہ قومی فوج کے ملازموں کی تجہیز و تدفین میں ملحوظ رکھی جاتی ہے ۔

دفعہ ۲۰: صلح ہونے کے بعد جہاں تک جلدی ممکن ہو گا اسیران جنگ کا مبادلہ کیا جائے گا ۔ [ یہ قوانین صرف فوجیوں کے لیے ہیں ۔ ابھی یہ امر مشتبہ ہے کہ آیا نظر بند غیر فوجیوں کو بھی یہ حقوق دیے جائیں گے یا نہیں ]

ان قواعد کو اگر ضابطہ کی جزئیات سے مجرد کر کے محض اصول سے دیکھا جائے تو معلوم ہو گا کہ انھوں نے اسلام کے مقرر کیے ہوئے اصول پر کوئی خاص اضافہ نہیں کیا ہے ۔[ مقابلہ کے لیے دیکھو اس کتاب کا باب پنجم ، عنوان "اسیران جنگ"] مغربی قانونی اسیران جنگ کو زیادہ سے زیادہ وہ آسائشیں بہم پہنچانا چاہتا ہے جو ایک سلطنت خود اپنے اسی درجہ کے سپاہیوں اور افسروں کو بہم پہنچاتی ہے ۔ مگر محمد صلی اللہ علیہ و سلم اور ان کے صحابہ (رضی اللہ عنہم) کا طرز عمل یہ ہے کہ انھوں نے اسیران جنگ کو اپنے سے بہتر کھانا کھلایا اور اپنے سے بہتر کپڑا پہنایا ۔ حالانکہ دشمنوں کے ہاں ان کے اسیران جنگ کو روٹی کپڑا تو درکنار ، الٹی جسمانی اذیتیں نصیب ہوتی تھیں ۔ مغربی سلطنتیں اسیران جنگ کے خرچ کا ایک بڑا حصہ خود ان کی اپنی قوم سے وصول کرتی ہیں، مگر اسلام نے ان پر اس وقت اپنا مال خرچ کیا جب کہ دشمن سلطنتوں سے اس معاملہ میں کسی سمجھوتے کا امکان تھا ہی نہیں۔ مغربی سلطنتیں ان کو صرف مبادلہ کی صورت میں رہا کرنے پر آمادہ ہوتی ہیں، مگر اسلام نے مبادلہ کے بغیر ہی ان کو اکثر رہا کیا ہے اور بطریقِ احسان رہا کر دینے کو افضل سمجھا ہے۔

تاہم بعض چیزیں ان میں اسلام سے زائد بھی نظر آتی ہیں۔ لیکن ان کے متعلق کوئی رائے قائم کرتے وقت اس حقیقت کو نظر انداز نہ کرنا چاہیے کہ ہر سلطنت دوسری سلطنت کے سپاہیوں کو یہ تمام رعایات اس مفاہمت کی بنا پر دیتی ہے کہ اس کے بدلے میں اس کے سپاہیوں کو بھی ایسی ہی رعایات دی جائیں گی۔ بخلاف اس کے اسلام نے کسی معاہدہ اور سمجھوتہ کے بغیر ایسی حالت میں اسیرانِ جنگ کو وہ رعایات دی تھیں جب کہ اسے اپنے مخالفوں سے کسی قسم کی رعایت حاصل ہونے کی کوئی امید نہ تھی۔ اس نے غزوۂ بدر کے قیدیوں پر اس زمانہ میں لطف و احسان کیا تھا جب کہ کفارِ قریش کے قبضہ میں بیسیوں مسلمان قیدی تپتی ہوئی ریت پر لٹائے جاتے تھے۔ آج کی طرح اس وقت ایسا کوئی سمجھوتا اور معاہدہ ممکن نہ تھا، اس لیے اسیرانِ جنگ کو زیادہ سے زیادہ وہی رعایات دی جا سکتی تھیں جو اسلام نے دیں۔ لیکن آج جب کہ اس بارے میں سمجھوتا اور معاہدہ ممکن ہے، اسلام پچھلے قوانین پر اضافہ کرنے سے ہرگز انکار نہ کرے گا۔ وہ مسلمانوں کو غیر مسلموں کے ساتھ ہر ایسے معاہدہ کی اجازت دیتا ہے جس میں مساوات کے ساتھ مراعات کا مبادلہ کیا گیا ہو۔