تصریحات

۶ جنوری ۱۹۶۴ء کو جنرل ایوب خان کی حکومت نے جماعت اسلامی پر پابندی عائد کر کے سید مودودیؒ سمیت اس کی پوری قیادت کو جیلوں میں بند کر دیا تھا۔ حکومت کی ”قرار داد جرم“ میں ایک شق کا تعلق جمعیت کی سید مودودیؒ سے عقیدت و احترام کے بارے میں بھی تھا۔

سید نے لاہور ہائی کورٹ میں جواب دیتے ہوئے فرمایا تھا:

”یہ الزام مجھ پر صرف اسی وقت چسپاں ہو سکتا ہے جب دو باتیں ثابت کر دی جائیں، ایک یہ کہ اسلامی جمعیت طلبہ نے کبھی کسی تعلیمی ادارے میں کوئی غیر قانونی ہڑتال کرائی ہے یا کسی درس گاہ کے اندر کوئی بدامنی اور ہنگامہ برپا کرایا ہے۔ دوسرے یہ کہ اس کام میں میرا کوئی ایما شامل رہا ہے۔ میں پورے دعوٰی کے ساتھ کہتا ہوں کہ حکومت ان دونوں باتوں میں سے کوئی ایک بات بھی ثابت نہیں کر سکتی۔ اسی وجہ سے اس نے تحفظ امن عامہ کے آرڈی ننس اور کریمنل لاء ایمنڈمنٹ ایکٹ ۱۹۰۸ء کا سہارا لیا ہے تاکہ کسی عدالت کے سامنے کوئی ثبوت پیش کرنے کی ”دشواری“ پیش نہ آئے اور نہ یہ ”خطرہ“ مول لینا پڑے کہ غیر جانبدارانہ عدالتی تحقیقات سے حقیقت حال کھل جائے گی!!

اسلامی جمعیت طلبہ ۱۹۴۷ء کے اواخر میں قائم ہوئی تھی۔ یہ اسکولوں، کالجوں اور یونیورسٹیوں کے ان طلبہ کی تنظیم ہے جو ہمارے ملک کی درس گاہوں میں سائنس، معاشیات، قانون، انجینئرنگ، ڈاکٹری، فلسفہ اور دوسرے جدید علوم کی تعلیم حاصل کرنے کے ساتھ ساتھ اسلامی رجحانات بھی رکھتے ہیں، اخلاقی قدروں کی پابندی بھی کرتے ہیں، اور اپنی درس گاہوں میں الحاد بے دینی اور اخلاقی فسق و فجور کو روکنے اور طلبہ میں اسلامی روح بیدار کرنے کی کوشش بھی کرتے ہیں۔ ان نوجوانوں میں آپ کو بکثرت ایسے افراد بھی ملیں گے جو جدید مغربی علوم کی اعلیٰ تعلیم حاصل کرنے کے ساتھ ساتھ گزار رکھی ہیں۔ ان لوگوں نے پچھلے کئی برسوں میں نوجوان نسل کے اعتقادی اور اخلاقی بگاڑ کو روکنے اور انہیں ملحدانہ خیالات اور فاسقانہ افعال کے سیلاب سے بچانے کے لئے بہت کچھ کام کیا ہے۔

مجھے ان طلبہ کے انہی اوصاف کی بنا پر ان سے دلچسپی ہے کیونکہ میں اس ملک میں ایسی ہی نوجوان دیکھنا چاہتا ہوں جو اعلیٰ سے اعلیٰ تعلیم حاصل کرنے کے ساتھ سچے اور پکے مسلمان رہیں اور ان طلبہ کو بھی مجھ سے اسی بنا پر دلچسپی ہے کہ وہ مجھ سے توقع رکھتے ہیں کہ میں ان کو اسلام کی روشنی میں زندگی کے جدید مسائل کا حل بتا سکتا ہوں میرا اور ان کا تعلق چھپا ہوا نہیں ہے اور نہ اس کو چھپانے کی کوئی وجہ ہے!!“