تصریحات

--------------------

سوال: کیا جماعت اسلامی صرف پاکستان میں قائم ہے یا دیگر ممالک میں بھی جماعت اسلامی کی سرگرمیاں ہیں؟

جواب: جماعت اسلامی کا زیادہ تر کام تو پاکستان ہی میں ہے لیکن ہندوستان، کشمیر، بنگلہ دیش اور سیلون میں بھی جماعت اسلامی کے نام سے جماعتیں قائم ہیں، ان کا ہمارے ساتھ کوئی تنظیمی تعلق نہیں، لیکن ان کے افکار و نظریات بھی وہی ہیں جو پاکستان میں جماعت اسلامی کے ہیں۔ اس کے علاوہ دنیا کے کئی دوسرے ملکوں میں ہماری دعوت، ہماری کتابوں اور لٹریچر کی صورت میں پہنچ رہی ہے اور ہمارے کارکن بھی موجود ہیں لیکن وہاں جماعت اسلامی قائم نہیں ہے۔

سوال: اس وقت اسلام کو فکری اور عسکری اعتبار سے جو زبردست چیلنج درپیش ہے، آپ کے خیال میں اس کا مقابلہ کرنے کے لئے مسلمانوں کو مستقبل میں کیا لائحہ عمل اختیار کرنا چاہئے؟

جواب: اگر مسلمان صحیح معنوں میں مسلمان ہوں تو وہ نہ صرف بیرونی طاقتوں کے فکری تسلط سے اپنے آپ کو محفوظ رکھ سکتے ہیں بلکہ اپنے افکار سے دنیا کو متاثر بھی کر سکتے ہیں۔ اسی طرح اگر مسلمان واقعی مسلمان بن جائیں تو اپنے سے دس گنا بڑی طاقت سے ٹکرا اسے شکست بھی دے سکتے ہیں۔

سوال: اس وقت دنیا طاقت کے مختلف کیمپوں میں بٹی ہوئی ہے۔ مذہب کے خلاف زبردست سیلاب ہے، مسلمان باہمی کشمکش اور انتشار سے دوچار ہیں اور افکار و نظریات کا فساد ساری دنیا میں پھیلا ہوا ہے، اس صورتِ حال میں مسلمان ممالک ایسی خارجہ پالیسی کس طرح مرتب کر سکتے ہیں جس پر اسلامی رنگ غالب ہو؟

جواب: میرے نزدیک سب سے مقدم یہ ہے کہ جتنے مسلمان ممالک ہیں ان کا نظام حکومت اسلامی ہو اگر دنیا کے چالیس مسلمان ملک صحیح معنوں میں اسلامی ملک بن جائیں تو وہ بجائے خود ایک عظیم بلاک اور عظیم طاقت بن سکتے ہیں۔

آپ کے پاس دولت کی کمی نہیں، آپ کے پاس وسائل کی کمی نہیں، آپ کے پاس دماغوں کی کمی بھی نہیں، آپ ایک ناقابل تسخیر قوت بن سکتے ہیں۔ بشرطیکہ آپ اسلام کے سچے پیروکار بن جائیں۔

سوال: بعض لوگوں کا خیال ہے کہ قرآن کریم اور سائنسی نظریات میں تعارض ہے۔ لیکن تعارض کے اس نظریے سے ظاہر ہوتا ہے کہ وہ خود غلطیوں پر مشتمل ہے، آپ کا اس ضمن میں کیا خیال ہے؟

جواب: جس حد تک میں نے مطالعہ کیا ہے، میرے علم میں آج تک کوئی مثال ایسی نہیں آئی ہے کہ جس سے مجھے قرآن کریم اور سائنس کے مابین تعارض محسوس ہوا ہو اگر تعارض ہے تو وہ سائنس کے نظریات سے ہوسکتا ہے۔ حقائق Facts کا اسلام سے کوئی تعارض نہیں ہے، اور یہ ضروری نہیں ہے کہ سائنس کے نام پر جو نظریہ قائم کیا گیا ہو وہ واقعی حقیقت بھی ہو اس لئے کہ میرے علم میں ایسے سائنسی نظریات آئے ہیں کہ جو پہلے درست سمجھے جا رہے تھے مگر بعد میں معلوم ہوا کہ وہ غلط تھے، اور یہ عین ممکن ہے کہ جو سائنسی نظریات آج حرف آخر سمجھے جا رہے ہیں وہ کل غلط ثابت ہو جائیں۔ آج کل کے زمانے میں بعض مفسرین کا یہ خیال ہے کہ قرآن پاک کی تعبیر و تفسیر سائنسی نظریات کے مطابق ہو اور سائنسی نظریات کا یہ حال ہے کہ وہ ادلتے بدلتے رہتے ہیں۔ آج ایک نظریہ ہے تو کل دوسرا، چنانچہ اس طرح قرآن کی تعبیر و تفسیر میں غلط چیزیں شامل ہو جاتی ہیں۔ اس لئے میں ایسے تمام لوگوں کو غلطی پر سمجھتا ہوں جو قرآن مجید کو آج کل کے یا کسی زمانے کے نظریات پر ڈھالتے ہیں۔ قرآن جس چیز کو جس انداز سے بیان کرتا ہے اسے اسی طرح بیان کرنا چاہئے۔ ہمارا یہ ایمان ہے کہ قیامت تک قرآن کی پیش کردہ کسی حقیقت کی کسی سائنسی نظریہ سے تردید نہیں کی جا سکے گی۔

سوال: معلوم ہوا ہے کہ آپ سیرت نبویؐ پر کتاب لکھ رہے ہیں اور اس کی دو جلدیں شائع بھی ہو چکی ہیں، کیا آپ بتائیں گے کہ سیرت نگاری میں آپ کا اسلوب کیا ہے؟

جواب: دراصل معاملہ یہ ہے کہ آج تک میں نے رسول اللہ صلی اللہ علیہ وسلم کے متعلق جو مقالہ یا مضمون لکھا، میرے دور رفقاء [مراد ہیں شیخ الحدیث عبدالوكيل علوی صاحب اور نعیم صدیقی صاحب] نے ان سب کو یک جا مرتب کر دیا ہے۔ میں نے جب اس کو دیکھا تو مجھے افسوس ہوا کہ اس کے اندر ربط نہیں ہے۔ اس لئے کہ مختلف مضامین، مختلف اوقات اور مختلف حالات میں لکھے گئے تھے۔ چنانچہ میں ان میں ربط پیدا کرنے اور مختلف حصوں کے درمیان خلا کو بھر کر اسے ایک مسلسل کتاب بنانے کی کوشش کر رہا ہوں۔

اس کتاب کی تالیف سے میرا مقصد یہ ہے کہ جس طرح میں نے قرآن کی تفسیر میں یہ دکھایا ہے کہ یہ ایک تحریکی کتاب ہے، اسی طرح اب میں سیرت میں دکھانا چاہتا ہوں کہ رسول اللہ صلی اللہ علیہ وسلم کی حیثیت ایک تحریک کے قائد کی ہے اور ان کی سیرت ایک تحریک کے قائد کی سیرت ہے۔

سوال: آپ نے اب تک کس قدر کتابیں لکھی ہیں؟

جواب: میں نے کیا لکھا، کتنا لکھا، یہ آپ کو اس لئے نہیں بتا سکتا کہ میں نے کبھی اس کا حساب نہیں رکھا۔