تصریحات

سوال: ہمیں تعلیم کا موجودہ نظام کس طرف لیے جا رہا ہے‘ کیا اس سے ہمیں شعور و آگہی میسر آسکتی ہے یا گمراہی والحاد اور بے دینی۔ ہمیں تعلیم میں کس بات کو اہمیت دینی چاہیے۔ تعلیم اور اخلاق میں باہمی کیا رشتہ ہے؟

جواب: تعلیم سے مراد اگر وہ تعلیم ہے جو ہماری یونیورسٹیوں اور کالجوں میں دی جاتی ہے تو وہ تو ہمیں روز بروز اپنے آپ سے بیگانہ کیے جا رہی ہے وہ ہمیں مسلمانوں کا سائنس بلکہ غیر مسلموں کا ساشعور دے رہی ہے بلکہ غیر مسلموں کا شعور بھی وہ نہیں جو انگلستان میں انگریزوں کو اور امریکہ میں امریکیوں کو دیا جاتا ہے بلکہ وہ شعور جو بیرونی حاکم اپنے محکوموں کو دینا چاہتے تھے۔ اس کا نتیجہ یہ نکلا کہ ہم اس تعلیم کے ذریعے اپنی ملی خودی اور دینی حمیت و غیرت بھی کھو رہے ہیں اور اب اس تعلیم سے ہمارے اندر کوئی ملی سیرت بھی پیدا نہیں ہو رہی _____ در حقیقت اخلاق اور تعلیم میں وہی رشتہ ہے جو غذا اور قوت حیات میں ہے۔ اگر کوئی غذا قوت حیات پیدا نہیں کرتی تو وہ صحیح غذا نہیں اسی طرح اگر کوئی تعلیم صالح اخلاق پیدا نہیں کرتی تو وہ صحیح تعلیم نہیں۔

سوال: کیا اسلام میں کوئی ایسا نظریہ اور واضح پروگرام ہے جس سے زندگی کے ہر شعبے پر روشنی پڑ سکے اور ہم اپنی معاشرت کے ہر گوشے کو جانچنے کے لئے کوئی ایسا معیار دریافت کر سکیں جو ہماری مشکلات کا آخری حل ہو؟

جواب: یہ سوال بھی تفصیل طلب ہے۔ مختصراً اتنا کہا جا سکتا ہے کہ اسلام نے ہمیں خدا‘ اپنی آخرت پر یقین اور حضور علیہ الصلوٰۃ والسلام کی رسالت کے اتباع کا مستقل نظریہ دیا ہے اور اس نظریے کے مطابق زندگی کے ہر شعبے کے بارے میں واضح ہدایات موجود ہیں۔ ہمارے لئے انفرادی اور اجتماعی زندگی کے صحیح یا غلط ہونے کا معیار اگر کوئی ہے تو صرف یہ ہے کہ ہم کسی حد تک اپنے آپ کو خدا کے سامنے جوابدہ سمجھتے ہوئے رسول خدا کی دی گئی ہدایات کا پابند بناتے ہیں۔

سوال: اسلام کے نزدیک انسانی زندگی کے دو شعبے ہیں ایک معاش دوسرے معاد۔ ان دونوں کا آپس میں کیا رشتہ ہے؟

جواب: دراصل اسلامی نقطہ نظر سے انسانی زندگی نا قابل تقسیم ہے۔ انسان نے معاش اور معاد کو دو شعبوں میں صرف افہام و تفہیم کے لئے تقسیم کیا ہے۔ فی الحقیقت معاش اور معاد کے درمیان بہت گہرا تعلق ہے۔ اسلام کے نزدیک معاد میں انسان کو انہی نتائج سے واسطہ اور سابقہ پیش آتا ہے جن کے لئے اُس نے معاش میں سروسامان کیا ہو۔ اس بات کا کوئی امکان نہیں کہ معاش کے غلط ہونے پر بھی معاد صحیح ہو۔ لازماً تسلیم کرنا پڑے گا کہ معاد کی صحت دراصل معاش ہی کی صحت کا نتیجہ ہوتی ہے۔ رہا یہ سوال کہ اسلام نے معاش کے مسائل کا کیا حل پیش کیا ہے۔ یہ موضوع تفصیل کا محتاج ہے۔ مختصر اً یہ کہ اس دنیا میں زندگی بسر کرنے کے لئے ان اصول و ضوابط اور حدود سے جو کتاب وسنت میں واضح طور سے بیان کیے گئے ہیں ان کی پابندی معاش کے بہتر ہونے کی بھی ضامن ہے اور معاد کی بھی۔