تصریحات

۔۔۔۔۔۔۔۔۔۔

وفد سے جب گفتگو کا سلسلہ چلا تو مولانا نے سب سے زیادہ زور اس بات پر دیا کہ:

”اساتذہ میں سے ایک ایک فرد کو اپنی ذاتی زندگی کے ذریعے طلبہ کے لئے نمونہ بننا چاہئے۔ اگر وہ نئی نسل میں اسلامی سیرت و کردار کی تعمیر کرنا چاہتے ہیں تو اپنی ذاتی زندگیوں میں اس کردار کی مثال بنیں۔“

مولانا نے فرمایا:

”ہماری نوجوان نسل اسلام پر ایمان رکھتی ہے، اسے دین حق سے گہرا لگاؤ ہے، لیکن اخلاق و تہذیب اور شرافت و انسانیت کو تباہ کر دینے والا ایک سیلاب ہے جو ہمارے معاشرے کو بہائے لئے جا رہا ہے اور ہماری نئی نسل کو بھی بگاڑ کے راستے پر بہا لے جانا چاہتا ہے۔ اساتذہ کا فرض ہے کہ وہ اسلام کے اصول زندگی اور اس کے نظام حیات سے اور اسلاف کے شاندار کارناموں سے نئی نسل کو آگاہ کریں، ان کے اندر فرائض اور ذمہ داریوں کا احساس پیدا کریں اور ان کی سیرت و کردار پر خود اپنے قول و عمل سے اچھے اثرات ڈالنے کی کوشش کریں۔“

مولانا نے مزید فرمایا:

” آپ طلبہ کے اندر حق اور ناحق کی تمیز اور حلال و حرام کا صحیح شعور و احساس پیدا کریں اور اپنے عمل سے حق کو اختیار کرنے اور حرام سے بچتے رہنے کا نمونہ پیش کریں۔“

مولانا مودودیؒ نے سلسلہ کلام جاری رکھتے ہوئے فرمایا:

” مسلم ملت اپنے کردار کی کمزوری کے باعث پستی کی طرف لڑھک رہی ہے۔ آج برما اور فلپائن میں مسلمانوں پر بدترین قسم کا ظلم ہو رہا ہے، لیکن دنیا بھر میں مسلمان اتنی بڑی تعداد اور اہم جغرافیائی حیثیت رکھنے کے باوجود ظالم کا ہاتھ نہیں روک سکتے۔ پھر اسی کروڑ مسلمانوں کے مقابلے میں پچیس لاکھ آبادی رکھنے والا اسرائیل جارحیت کا رویّہ اختیار کئے ہوئے ہے اور مسلمان اس کا کچھ بگاڑ نہیں سکتے۔“

”یہ ذلت و مسکنت ہمارے ہاں کچھ یوں ہی پیدا نہیں ہو گئی۔ یہ اس کا نتیجہ ہے کہ ہمارے اخلاق کو گھن لگ گیا ہے اور ہماری سیرت و کردار کی جڑیں گل سڑ گئی ہیں .......... جو قوم فرض کو فرض جانتے ہوئے اسے ادا نہ کرے، حرام کو حرام جانتے ہوئے اس کا ارتکاب کرے، حق کو حق جانتے ہوئے اس سے انحراف کرے اور باطل کو باطل جانتے ہوئے اس کی پیروی کرے، اس میں کبھی یہ طاقت پیدا نہیں ہو سکتی کہ مردانگی کا کوئی کارنامہ اس کے ہاتھوں انجام پائے اور اپنے گھر کو فتح کرنے کے سوا وہ ایک انچ زمین بھی فتح کر سکے۔“

وفد نے تعلیمی اداروں میں بڑھتے ہوئے علاقائی تعصبات کا ذکر کیا تو مولانا نے فرمایا:

” جو بات خاص طور پر سمجھنے اور سمجھانے کی ہے وہ یہ ہے کہ نسلی اور علاقائی قومیتیں، قوم کو تقسیم در تقسیم کر دیا کرتی ہیں۔ اس کے برعکس ملت اسلامیہ کا تصور ایک ملک ہی نہیں، دنیا بھر کے مسلمانوں کو متحد کر سکتا ہے۔ یہی وحدت ہمارے اندر مضبوطی

پیدا کرنے والی ہے۔ حتیٰ کہ اس کی بدولت ہم سیسہ پلائی ہوئی دیوار بن سکتے ہیں۔ اس لئے آپ اپنی اپنی جگہ تعصب کے رجحانات کو حکمت کے ساتھ طلبہ کے ذہنوں سے نکالیں اور اس کی جگہ ان کے اندر مسلمان ہونے کا شعور بیدار کریں۔ تاکہ آئندہ نسل جاہلیت کے ان تعصبات سے محفوظ رہے جو پہلے ہی ہمارے ملک کے ٹکڑے کر چکے ہیں۔“