تصریحات

الف: ناجائز ادب اسلامی نقطہ نگاہ سے وہ ہے جو انسان کے اندر غلط قسم کے خیالات پیدا کرے‘ چاہے اس میں حسن کلام اور تاثیر ہو، لیکن وہ انسان میں غلط افکار و خیالات پیدا کرے۔ مثلاً خدا پرستی سے الحاد کی طرف لے جائے‘ یا اس میں شک و تذبذب پیدا کرے۔ واضح تر حقائق کے مقابلے میں تذبذب اور بے یقینی کی کیفیت پیدا کرے۔ آدمی خیال کرنے لگے کہ معلوم نہیں حقیقت کیا ہے۔ خدا ہے یا نہیں۔ آخرت ہے یا نہیں۔ انسان میں شکی پن پیدا کر دے۔ یا وہ جو انسان کی توجہ علم آخرت سے ہٹا دے۔ جو انسان کے ذہن میں یہ خیال پیدا کرے کہ

بابر بہ عیش کوش کہ عالم دوباره نیست

اب تو آرام سے گزرتی ہے ۔۔۔۔ آخرت کی خبر خدا جانے

ب: اسی طرح ناجائز ادب کی تعریف میں وہ بھی آتا ہے جو انسان کے اندر جرحیت کا عقیدہ پیدا کرے۔ اسے یقین دلائے کہ تو اس عالم میں مجبور ہے۔ جو گناہ کرتا ہے مجبوری سے کرتا ہے۔ دنیا کا نظام ہی ایسا ہے کہ تو برا ہونے پر مجبور ہے۔ جو احساس ذمہ داری کو بالکل باطل کر دے اور اسے اس امر پر مطمئن کر دے کہ بھلا آدمی بن کے رہنا یا بُرا بن جانا اس کے بس میں نہیں ہے۔

ج: وہ ادب بھی ناجائز کی تعریف میں آتا ہے جو انسان کو مایوس کرے اور اسے یاس اور قنوط کی حالت میں مبتلا کر دے۔ وہ یہ سمجھنے لگے کہ نوع انسانی کی قسمت کے روشن اور منور ہونے کے امکانات نہیں ہیں یا بہت کم ہیں۔

د: اس طرح وہ ادب بھی اسلامی نقطہ نظر سے ناجائز ہے جو انسان کے اندر برے جذبات پیدا کرے۔ مثلاً نسل پرستی۔ ایک نسل کو دوسری نسلوں کے مقابلے میں برتر سمجھنا۔

ایک قوم کو دوسری قوموں سے بالا تر قرار دینا۔

دوسروں کو غلام بنانے کا تصور۔ غلط غرور اور فخر یا نفرت اور انتقام کے جذبات ابھارنا۔ وحشت‘ درندگی اور جنگ جوئی کے جذبات ابھارنا۔

ر: اور وہ ادب بھی ناجائز ہے جو انسانیت کے کسی ایک طبقے کی حمایت اس طرح کرے کہ دوسرے طبقے کے خلاف نفرت پیدا کرے۔ جو یہ بات دل میں بٹھائے کہ دنیا کا نظام ہی جو طبقات کی کشمکش کو لازمی قرار دے۔ جو یہ بتائے کہ انسانی طبقات کے درمیان مسابقت اور باہمی رفاقت۔ رعایت یا یگانگت کا امکان نہیں ہے جو یہ کہے کہ یہ کشمکش تقاضائے فطرت اور (Historical) (Necessity) ہے۔ گویا تاریخی لحاظ سے واجب ہے کہ انسانی طبقے ایک دوسرے سے لڑیں۔ غرض انسان سے متنفر کرنے والا ادب بھی اسلامی نقطۂ نظر سے ناجائز ادب ہے۔

س: اسی طرح وہ ادب بھی ناجائز ہے جو انسان کے حیوانی جذبات کو ابھارے۔ جو انسان کے لئے اخلاقی بے قیدی کو مقدس چیز قرار دے۔

ص: اور وہ ادب بھی جو انسان کے لئے برائیوں کو خوشنما بنائے اور بھلائیوں کو بدنما بنائے۔ جس میں نیکی اور پرہیز گاری اور نیک اور پرہیز گار لوگوں کا مضحکہ اڑایا جائے اور بد اخلاق لوگوں کو انسانیت کا نمونہ اور معیار قرار دیا جائے۔ قرآن مجید کا حکم ہے کہ یہ شیطان کا کام ہے کہ وہ گناہ کو مزین کر کے پیش کرتا ہے اور انسان کو کہتا ہے کہ تیرے لئے خوبیاں ان کاموں میں ہیں جنہیں ہر زمانے میں نوع انسانی کے رہنماؤں اور صالح لوگوں نے گناہ قرار دیا ہے۔

مختصر طور پر ادب میں یہ تمام رجحانات ناجائز ادب کی تعریف میں آتے ہیں۔