تصریحات

اسی طرح محرک ادب کی ایک قسم خطابت بھی ہے۔ ایک اعلیٰ درجے کا خطیب پوری قوم کو حرکت میں لے آتا ہے۔ اس میں رونے والوں کو ہنسانے اور ہنسنے والوں کو رلانے کی طاقت ہوتی ہے۔ وہ لوگوں کو لڑا سکتا ہے۔ ہٹا سکتا ہے۔ بڑھا سکتا ہے۔ یہ طاقت بھی ہمارے لئے مفید ہو سکتی ہے۔ لیکن اسے بھی جو چیز اسلامی بناتی ہے وہ خطیب کا اسلامی حدود کا پابند ہوتا ہے۔

ایک غیر اسلامی خطیب کی خصوصیت ہے کہ اس کی زبان بے مہار قینچی کی طرح چلتی ہے۔ جو کرتا ہے تو مخالف کو شیطان بنا دیتا ہے۔ تعریف کرتا ہے تو ممدوح کو خدا سے جا ملاتا ہے۔ نفرت پھیلاتا ہے تو بدترین جذبات کو حرکت میں لے آتا ہے بولتے وقت بالکل محسوس نہیں کرتا کہ میں حق بات کہہ رہا ہوں یا اس سے تجاوز کر رہا ہوں۔ وہ ہر ممکن طریقے سے لوگوں کو اپنے ساتھ بہالے جانے کی کوشش کرتا ہے اور اس میں اس کا ہرگز خیال نہیں کرتا کہ اس کی زبان سے حق نکل رہا ہے یا باطل۔

اس کے برعکس ایک مسلم خطیب انتہائی جذبہ اور جوش کی حالت میں بھی زبان قابو میں رکھتا ہے وہ نہ نفرت پھیلائے گا نہ مخالفوں پر بے جا الزام اور اتہام رکھے گا۔ نہ غصے میں الفاظ کے تیر برسانے کی کوشش کرے گا۔ سخت غصے کی حالت میں بھی اپنی زبان اور جذبات پر قابو رکھے گا۔ اور یہ خیال رکھے گا کہ اس کی زبان سے کوئی بات حق کے خلاف نہ نکلے۔ وہ پاکیزہ جذبات ابھارے گا۔ گندے اور انسانیت کو گندہ کرنے والے جذبات نہ ابھارے گا۔ یہ اسلامی خطابت کی مختصر تعریف ہے۔

ہمیں اگر اس ملک میں ایک اسلامی تحریک کو برپا کرنا ہے تو لامحالہ ہمیں ادب کی ساری اقسام سے کام لینا ہوگا۔ ہمیں بہت بڑی ضرورت ہے کہ ہمارے اندر اتقائی ادب کے لکھنے والے پیدا ہوں۔ ابھی یہ میدان بہت کچھ خالی ہے۔ ہمیں اس امر کی ضرورت ہے کہ ہمارے درمیان اعلیٰ درجے کی تحقیقات کرنے والے لوگ پیدا ہوں۔ ہمیں ضرورت ہے کہ وہ اپنے نتائج فکر عملی دلائل کے ساتھ مرتب کر کے لوگوں کے سامنے پیش کر سکیں۔ میں اکثر محسوس کرتا ہوں کہ سب سے زیادہ جس محاذ پر ہم کمزور ہیں وہ ادب کا ہی محاذ ہے۔ بہت کم لوگ ہیں جو قرآن وحدیث کے گہرے مطالعہ کے ساتھ ساتھ دنیاوی علوم میں بھی اتنی بصیرت رکھتے ہوں کہ وہ اپنے نتائج فکر زبردست علمی اور عقلی دلائل کے ساتھ سامنے لائیں اور یہ ثابت کریں کہ دنیا کے دوسرے نظامہائے فکر انسانیت کے لئے قطعی موجب فلاح نہیں ہیں۔ انسانی زندگی کے مختلف شعبوں میں دنیا کی خالص اسلام کے نقطہ نظر سے رہنمائی کر سکیں اور اپنے انکار کو زبردست دلائل کے ساتھ پیش کر سکیں تاکہ پڑھنے والے مطمئن ہو جائیں۔ اس نوعیت کی تحریریں بہت کم ہمارے اخبارات میں دیکھنے میں آتی ہیں۔