تصریحات

------------

سوال: کیا اسلامی تعلیمات کی رُو سے بالغ مرد و زن کا ایک جگہ پر اور بے پردہ ہو کر تعلیم حاصل کرنا درست ہے؟

جواب: بالغ یا قریب البلوغ مرد و زن جو ایک دوسرے کے لئے غیر محرم ہوں، ان کا تعلیم یا کسی دوسرے مقصد کے لئے بے پردہ ایک جگہ جمع ہونا اسلام کی رُو سے ناجائز ہے۔

سوال: قرآن و سنت میں اس حوالے سے کون سی شہادت ہے؟

جواب: اس عدم جواز کے دلائل کتاب ’’پردہ‘‘ اور ’’تفہیم القرآن‘‘ میں تفصیل سے بیان ہو چکے ہیں۔

سوال: مخلوط تعلیم کی شکل میں معلم یا معلمہ کی حیثیت سے ذمہ داری کا کام انجام دینا شرعاً کس درجے میں آتا ہے؟

جواب: مخلوط تعلیم کی شکل میں معلمہ کے فرائض انجام دینا شرعاً جائز نہیں۔ معلم اگر سن رسیدہ اور متقی ہو اور معلمات با پردہ الگ بیٹھی ہوں تو ایسی صورت میں تعلیم کے جواز کی گنجائش نکل سکتی ہے۔

سوال: کیا مرد استاد سے عورتوں یا عورتوں سے مردوں کا بے حجاب پڑھنا صحیح ہے؟

جواب: عورت سے مرد اور مرد سے عورت کا بے حجاب پڑھنا جائز نہیں۔

سوال: کیا یہ دلیل درست ہے کہ اس ضمن میں اسلام کا مقصد صرف حیا کا برقرار رکھنا ہے؟

جواب: بلاشبہ اسلام کا مقصد حیا کو برقرار رکھنا ہے لیکن اسلام نے اس مقصد کے حصول کا عملی طریقہ اور ذریعہ بھی بتا دیا ہے۔ بے پردگی کے ساتھ حیا قائم رکھنا ایک امر محال ہے۔

سوال: اگر آنکھوں میں حیا ہو تو کیا مخلوط تعلیم جائز ہوگی؟

جواب: اسلام کی رُو سے آنکھوں میں حیا کا اطلاق غض بصر (نگاہیں نیچی رکھنے) پر ہو سکتا ہے۔ مگر غضِ بصر کا سوال اور امکان صرف وہاں پیدا ہوتا ہے جہاں اچانک آمنا سامنا ہو جائے اور ایک لمحے یا تھوڑی دیر بعد یہ صورت ختم ہو جائے۔ جو آنکھیں مسلسل اور بار بار ملتی ہیں، ان میں حیا، بے حیائی اور ناز و ادا کی سرحدیں الگ الگ نہیں رہ سکتیں۔

سوال: کیا شرعاً اس دلیل میں وزن ہے کہ دونوں جنسوں کے مل کر پڑھنے سے مسابقت کا جذبہ پیدا ہوتا ہے اور معیار تعلیم بلند ہوتا ہے؟

جواب: مخلوط تعلیم سے دونوں جنسوں میں تعلیمی مسابقت کا جذبہ پیدا نہیں ہوتا بلکہ غیر تعلیمی اور غیر اخلاقی موانست و ملاطفت کا جذبہ پیدا ہوتا ہے جو علم و اخلاق کے لئے سم قاتل ہے۔

سوال: کیا اس دلیل کی بنا پر مخلوط تعلیم درست ہے کہ اگر عورتوں اور مردوں کے لئے الگ الگ نظم قائم کیا جائے تو ہمارا ملک اخراجات کا متحمل نہیں ہو سکتا؟

جواب: یہ دلیل ہی غلط ہے کہ مخلوط تعلیم پر اخراجات کم اٹھتے ہیں اور بالفرض ایسا ہو تب بھی اس استدلال سے کوئی ناجائز کام جائز نہیں ہو سکتا۔

سوال: کیا تربیت اساتذہ کے پیشہ ورانہ اداروں میں مخلوط تعلیم کو برقرار رہنا چاہئے؟

جواب: کسی تعلیمی و تربیتی ادارے میں بھی مخلوط تعلیم جائز نہیں۔

سوال: کیا ماضی کے کسی دور میں مسلمانوں کے تعلیمی نظام میں مخلوط تعلیم کو روا رکھا گیا؟

جواب: مسلمانوں کی تاریخ کے کسی دور میں بھی مخلوط تعلیم کو روا نہیں رکھا گیا۔

سوال: کیا یہ صحیح ہے، چونکہ معاشرہ تغیر پذیر ہے اور اب زمانہ بہت تبدیل ہو چکا ہے، لہذا موجودہ دور کے تقاضوں کے مطابق مخلوط تعلیم اختیار کرنے میں ہرگز مضائقہ نہیں؟

جواب: اگر معاشرے کے تغیر کی بنا پر مخلوط تعلیم جائز ہو سکتی ہے تو پھر ہر حرام کو حلال کیا جا سکتا ہے۔ تغیر زمانہ سے صرف ان احکام میں تبدیلی ہو سکتی ہے جو نص قطعی سے ثابت نہ ہوں، جن میں اجتہاد کی گنجائش موجود ہو یا جن پر عمل کرنے سے خاص حالات میں ایسی قباحت رونما ہوتی ہو جس کا ازالہ شریعت کی نگاہ میں تعمیل حکم سے زیادہ ضروری ہو۔

سوال: چونکہ مسلمان خواتین نے قرنِ اول میں مردوں کے ساتھ جنگوں میں حصہ لیا ہے، جس سے مخلوط جدوجہد کا جواز ثابت ہوتا ہے، اس لئے کیا تعلیم، بالخصوص فنی تعلیمی اداروں میں مخلوط تعلیم دی جا سکتی ہے؟

جواب: یہ بات غلط ہے کہ مسلمان خواتین نے قرنِ اول میں مردوں کے ساتھ جنگوں میں حصہ لیا ہے۔ کچھ عورتیں بعض اوقات ساتھ ہو جاتی تھیں اور اپنے محرم مردوں کی مرہم پٹی اور تیمارداری کرتی تھیں۔ ان میں سے بعض نے ناگزیر حالات میں حرب و ضرب میں بھی حصہ لیا ہے‘ مگر یہ سب استثنائی صورتیں ہیں اور حالات جنگ پر عام تعلیمی مشاغل کو قیاس کرنا صحیح نہیں۔

سوال: ان مخلوط تربیتی اداروں میں طلبہ و طالبات مشترکہ طور پر مختلف کھیلیں بھی کھیلتے ہیں، آپس میں ہنسی مذاق بھی کرتے ہیں، سٹیج ڈراموں میں حصہ بھی لیتے ہیں، طالبات بسا اوقات اساتذہ سے ان کے کمروں میں تنہائی میں جا کر مشورے اور ہدایات بھی حاصل کرتی ہیں۔ کیا یہ چیزیں گوارا کی جا سکتی ہیں؟

جواب: مخلوط مجالس کی اسلام میں کوئی گنجائش نہیں۔ نبی اکرم صلی اللہ علیہ وسلم نے فرمایا کہ ”جہاں دو غیر محرم مرد اور عورت ہوں وہاں تیسرا شیطان ہوتا ہے۔“

سوال: اگر اسلام مخلوط تعلیم کی اجازت نہیں دیتا تو اصلاح کی کیا صورت ہو سکتی ہے؟

جواب: اصلاح کی صورت یہی ہے کہ مخلوط تعلیم و تربیت کو بالکل ہی ختم کر دیا جائے اور دونوں کے لئے الگ الگ ادارے قائم کئے جائیں۔ اس کی اولین ذمہ داری تو حکومت پر ہے، لیکن حکومت جن عوام کی نمائندگی کا دعویٰ رکھتی ہے، ان کا بھی فرض ہے کہ وہ حکومت سے اصلاح حال کا مطالبہ کریں اور دباؤ ڈالیں تاکہ اس ناپسندیدہ صورت کا خاتمہ ہو۔

سوال: علمائے کرام کی اس سلسلے میں کیا ذمہ داری ہے؟

جواب: علمائے کرام کو بھی عوام الناس کی دینی رہنمائی کا منصب حاصل ہے، اس لئے ان کی بھی ذمہ داری ہے کہ اس سلسلے میں وہ آواز اٹھائیں، اور اپنا اثر ورسوخ استعمال کر کے عوام اور حکمرانوں کے سامنے اصلاحی احکام پیش کریں اور ان کے مطابق عمل کرنے کا مطالبہ کریں۔