تصریحات

مقصد: اسلامی ادب کی وہ خصوصیت جس سے وہ جائز ادب سے ممیز ہوتا ہے۔ اس کا واضح اور متعین مقصد ہوتا ہے۔ اس کا مقصد یہ ہے کہ وہ دنیا کو غیر اسلام سے ہٹائے اور اسلام کی طرف راغب کرے۔ اسلام کے برحق ہونے پر دلوں کو مطمئن کرے۔ انسان میں اس قسم کا جذبہ پیدا کرے کہ وہ خود اسلام کی پیروی کرے اور دنیا میں اسلامی نظام زندگی کو برپا کرے۔

جائز ادب اور اسلامی ادب میں مقصد کا فرق ہے۔ اسلامی ادب صرف جائز ادب کی حدود کے اندر ہی نہیں رہتا بلکہ آگے بڑھ کر کوشش کرتا ہے کہ لوگوں کو اسلام کی طرف لائے‘ اسلام کی حمایت کرے۔ دوسرے نظاموں پر تنقید کر کے اسلام کا ایک برتر نظام زندگی ہونا ثابت کرے۔ اسلام جن خوبیوں کو چمکاتا ہے انہیں چمکائے اور اسلام کی حمایت میں ایک صحیح عزم لے کر اٹھنے کا جذبہ پیدا کرے۔

اسلامی ادب کی دو قسمیں ہیں:

اقناعی ادب

محرک ادب

اقناعی ادب: جس ادب میں اس امر کی کوشش کی جائے کہ علمی اور عقلی دلائل سے انسان کو اسلام کے متعلق حتمی طور پر مطمئن کیا جائے کہ اسلام ہی حق ہے اور اسلام ہی صحیح نظام ہے جس میں دوسرے نظامات زندگی پر تنقید کر کے بتایا جائے کہ ان میں کیا خرابی ہے۔ جس میں دوسرے نظامات کے بُرے نتائج کی تسلی بخش حد تک وضاحت کی جائے۔ جس میں علمی اور عقلی حیثیت سے ثابت کیا جائے کہ ان مشکلات کا صحیح حل اسلام میں ہی ہے۔ یہ ادب دل و دماغ کو مطمئن کرنے والا ادب ہوتا ہے۔

محرک ادب: جو مطمئن ہونے والے لوگوں کو عمل پر ابھارنے عمل کے لئے اکسائے اور عمل کی طرف دھکیلے اور اس طرح اِتقائی ادب کی قوتِ نفوذ کو دو آتشہ بنا دے۔ یہ ضروری ہے کہ ادب صرف علمی اور عقلی دلائل کا مجموعہ ہی نہ ہو بلکہ اس کے ساتھ ساتھ محرک بھی ہو۔ محرک ادب کو ہم الکحل کی مثال دے سکتے ہیں۔ جس طرح الکحل دوا کو حل کر کے انسانی جسم میں سہولت سے جذب کرتا ہے اسی طرح اِتقائی ادب میں اگر محرک ادب بھی ملا دیا جائے تو وہ انسانی دل و دماغ میں آسانی سے جذب ہو سکتا ہے۔ لیکن جس طرح دوا میں الکحل اس غرض کے لئے ہوگا کہ دوا کے تحلیل کرنے میں آسانی ہو اسی طرح اِتقائی ادب میں بھی محرک ادب اسی مقصد کے لئے شامل کیا جائے گا کہ اس کے جذب ہونے میں آسانی ہو۔ اس سے دلائل میں قوت آئے گی اور فکر میں علمی زور پیدا ہوگا۔ محرک ادب کی بنیاد کا بھی علمی حقیقتوں پر مبنی ہونا ضروری ہے۔ محرک ادب میں دلائل بھی ہوتے ہیں۔ معقولیت کے ساتھ بات بھی سمجھانے کی کوشش کی جاتی ہے۔ لیکن اس کی نمایاں خصوصیت لوگوں کے جذبات کو ابھارنا، اکسانا اور تحریک کے ساتھ ان کا گہرا تعلق پیدا کرنا ہوتا ہے۔

محرک ادب کے تحت شعر۔ افسانہ۔ خطابت اور صحافت آسکتے ہیں۔