تصریحات

گردے کے آپریشن کے سلسلے میں سید مودودیؒ لندن گئے۔ ان کی روانگی سے قبل کراچی میں یہ نشست ہوئی اگست ۱۹۶۸ء

سوال: مزدوروں کے مسائل حال کرنے کے سلسلے میں جماعت نے کیا کیا ہے؟ صورت حال یہ ہے کہ تخریبی اور اشتراکی عناصر مزدوروں میں اثر و نفوذ بڑھا رہے ہیں۔ اس کا تدارک کیسے ہوگا؟

جواب: اس سے قبل ہم مرکزی طور پر مزدوروں کے مسائل حال کرنے کی کوشش کر رہے تھے اب یہ کام ہم نے مقامی جماعتوں کے سپرد کر دیا ہے تاکہ وہ ہر جگہ کے مخصوص حالات کے مطابق مقامی طور پر مزدوروں کے لئے کام کریں۔ ہمارے سامنے کچھ مشکلات ایسی تھیں جن کی بنا پر مرکزی ادارہ کا قیام مناسب نہیں سمجھا گیا۔ اصل مشکل یہ ہے کہ ہمارے حکمران بھی اور صنعت کار و سرمایہ دار بھی یہ چاہتے ہیں کہ ہمارے مزدور تخریبی عناصر کے ہاتھ میں ہی رہیں تاکہ وہ وقتاً فوقتاً مزدوروں کو پٹوا دیا کریں۔ اس تکنیک کا مقصد یہ ہے کہ محنت کار کے مسائل کبھی حل نہ ہونے پائیں۔ چنانچہ یہی ہو رہا ہے، اس کے مقابلے میں جو لوگ اخلاص کے ساتھ مزدوروں کے مسائل حل کرنے کی کوشش کرتے ہیں۔ وہ ان کی نگاہ میں بری طرح کھٹکتے ہیں۔ گویا کمیونزم ان سرمایہ داروں کو نا گوار نہیں ہے، کیونکہ وہ ان کے کام آتا ہے اور اسلام ناگوار ہے کہ وہ مسائل کا حقیقی حل سامنے لاتا ہے جو انھیں پسند نہیں۔ کمیونزم اور سوشلزم کا پروپیگنڈا کرنے والوں کے لئے کھلی چھٹی ہے، کمیونسٹوں کی حوصلہ افزائی بھی کی جارہی ہے اور ان کا لٹریچر بھی لایا اور پھیلایا جا رہا ہے۔ لیٹر یچر آج پرائیویٹ سرکاری اور نیم سرکاری ہر نوع کے اداروں سے دستیاب ہے۔ ابھی حال ہی میں با ضابطہ طور پر ڈھاکہ کہ یونیورسٹی میں ماؤزے تنگ کی کتابیں ہیں ہزار کی تعداد میں بھیجی گئیں۔ اب یہ بات کون نہیں جانتا کہ ماؤ کی کتابیں طلباء کو کیا سکھا رہی ہیں، ان کو سکھایا جا رہا ہے کہ انقلاب کبھی سیدھے طریقے اور آئینی ذرائع سے نہیں آتا۔ انقلاب آتا ہے تو خون خرابے، مار دھاڑ اور تخریبی کاروائیوں سے آتا ہے۔ یہ ہے وہ فکر جسے شکریہ کے طور پر قبول کیا جا رہا ہے اور نئی نسل میں پھیلایا جا رہا ہے! اب آپ ہی بتائیے کہ جہاں اس طرح نادانوں سے سابقہ پیش آئے وہاں کیا کیا جائے۔

ہم نے تجربات کی روشنی میں محسوس کیا ہے کہ اگر محنت کاروں کے سلسلہ میں مرکزی طریقے پر کام کیا جائے تو الجھنیں بہت ہوں گی اور کام نہیں ہو سکے گا۔ اس لئے ہم نے یہ کام مقامی جماعتوں کے سپرد کر دیا ہے تا کہ وہ حالات کا براہ راست مطالعہ کر کے قدم اٹھائیں۔ اللہ تعالیٰ جب بھی بہتر حالات پیدا کرے گا تو انشاء اللہ مرکزی ادارہ کا قیام بھی عمل میں لایا جائے گا۔“ اس سے قبل جماعت کے جو صاحب مزدوروں کے لئے کام کر رہے تھے ان کو جب گرفتار کیا گیا اور عرصے تک قلعہ میں نظر بند رکھا گیا، تو انہوں نے نظر بندی کے دوران میں ایک دن سی آئی ڈی کے ایک افسر سے پوچھا کہ میں نے کونسا غیر آئینی کام کیا ہے۔ جس کی بنا پر مجھے نظر بند کر دیا گیا ہے۔“ اس پر ان سے صاف صاف کہہ دیا گیا کہ ”تم مزدوروں میں کمیونسٹوں کے کام میں رکاوٹ بنتے ہو اور یہ چیز ہمیں پسند نہیں ہے۔“

سوال: چیکوسلواکیہ کے حالیہ واقعات سے کیا نتیجہ اخذ کیا جا سکتا ہے۔ کیا ان سے سوشلزم کا نظام عریاں ہوکے سامنے نہیں آگیا؟

جواب: عریاں تو وہ پہلے ہی تھا۔ لباس تو پہلے بھی سوشلزم کے تن پر کبھی نہ تھا۔ حقیقت یہ ہی کہ انسان کے خلاف شیطان کمیونزم سے زیادہ خطرناک حربہ آج تک نہیں لا سکا ہے۔ کمیونزم سامراج کی بدترین شکل ہے اور اس لحاظ سے امریکہ اور روس کا سامراج ایک ہی ہے۔

جہاں تک چیکوسلواکیہ کے موجودہ حالات کا تعلق ہے تو اس بات کو آپ اچھی طرح سے سمجھ لیجئے کہ روس مشرقی یورپ میں ہٹلر (جرمن نازی آمر) کا وارث ہے، روس نے علاقے کو ہٹلر کے قبضے سے اس لئے آزاد نہیں کرایا تھا کہ یہاں جمہوریت پھلے پھولے۔ بلکہ اپنی کالونی بنانے کے لئے ہٹلر کو یہاں سے نکالا تھا۔ اس کی نظر میں یہاں کے باشندوں کی کوئی آزادانہ حیثیت سرے سے ہے ہی نہیں، روس نے اس پورے علاقے پر اپنا اقتدار جمانے کے لئے یہاں کمیونسٹ پارٹیوں کو اپنا ایجنٹ بنایا۔ اب جب بھی کوئی کمیونسٹ پارٹی روس کی مرضی کے خلاف چلے گی اور اپنی قوم کے مفاد کے لئے کام کرنا چاہے گی، روس کی فوجیں اسی طرح وہاں داخل ہوں گی جیسے وہ چیکوسلواکیہ میں داخل ہوئی ہیں اور اسی طرح پرانے ایجنٹوں کو ہٹا کر نئے ایجنٹ لا کر کھڑے کر دیے جائیں گے۔ یہی مشرقی جرمنی میں ہوا۔ یہی پولینڈ اور ہنگری میں ہو چکا ہے، اور اب یہی کچھ چیکوسلواکیہ میں ہو رہا ہے۔

ایک بات اس سلسلہ میں اور سمجھ لیجئے وہ یہ کہ چیکوسلواکیہ ان ممالک میں سے ہے جنھوں نے اسرائیل کے قیام سے لے کر آج تک اس کے ہر اقدام کی مکمل حمایت کی۔ یوں تو پورے اشتراکی بلاک نے اسرائیل کی حمایت کی اور اس کے قیام میں امریکہ اور برطانیہ کے دوش بدوش شریک رہے مگر چیکوسلواکیہ نے تو اسرائیل کی حمایت اعلانیہ کی۔ اب سوال یہ ہے کہ ہمارے گھر پر جب ڈاکہ پڑے تو وہ زندہ باد کے نعرے لگائیں اور جب اُن کے گھروں پر پڑے تو ہم ماتم کیوں کریں؟ ہمارے لئے تو دونوں سامراج برابر ہیں۔ رسوائی امریکہ کے حصے میں آئے یا بدنامی روس کی ہو، ہمارے لئے ان کی نوعیت ایک ہے۔ ہم تو مخالف ظلم کے ہیں۔ ظلم جہاں بھی ہو اور جس صورت میں بھی ہو قابلِ مذمت ہے۔ اس لحاظ سے یہ تازہ واقعات بھی قابلِ افسوس ہیں۔