سلاجقہ

اس جنگ کے بعد سلجوقیوں نے اپنی تمام قوت سرس پر مجتمع کر لی۔ ادھر سے داؤد پسپا ہوکر وہاں پہنچا، اُدھر نیشا پور سے طغرل اور مرو سے بیغو آئے اور ۲۰ ہزار فوج اکٹھی ہوگئی۔ یہاں سلجوقی سرداروں کی ایک جنگی کانفرنس منعقد ہوئی تاکہ آئندہ کے لیے جنگ کا خاکہ بنا لیں۔ طغرل اور دوسرے سرداروں نے کہا کہ اتنے بڑے بادشاہ سے، جس کے ساتھ اتنی فوج ہے، مقابلہ کرنا مشکل ہے۔ مناسب یہ ہے کہ اس وقت ہم رے اور جبال کی طرف ہٹ جائیں۔ وہاں مٹھی بھر دیلم اور کرد ہیں جن کو ہم آسانی سے زیر کر لیں گے۔ یہ باتیں سن کر داؤد اٹھا اور بولا کہ

”صاحبو، آپ سخت غلطی میں پڑے ہوئے ہیں۔ اگر خراسان سے قدم نکالا تو یہ بادشاہ آپ کا پیچھا کرے گا اور ہر طرف سے آپ کے دشمنوں کو بھی بر انگیختہ کرے گا، یہاں تک کہ آپ زمین پر کہیں قرار نہ پاسکیں گے۔ میں علیا باد میں اس سے جنگ کر چکا ہوں۔ آدمی اور سامان جنگ جیسا چاہیے ان کے ہاں موجود ہے، مگر ان کا بُنہ (یعنی سامان) بہت زیادہ ہے جسے وہ اپنے ساتھ ہی رکھتے ہیں، کیونکہ بغیر اس کے ان کی زندگی مشکل ہے۔ اسی سبب سے وہ درماندہ رہ جاتے ہیں کہ اپنی خبر رکھیں یا اپنے سامان کی۔ بکتغدی اور سُباشی پر جو کچھ مصیبت نازل ہوئی اسی گراں سامانی کی وجہ سے ہوئی۔ بخلاف اس کے ہم ہلکے پھلکے بے ساز و سامان ہیں۔ ہمارا سامان لوگ ہم سے پیچھے ۳۰ فرسنگ پر رہتا ہے۔ ہم پیدائشی سپاہی ہیں۔ مردانہ وار مقابلہ میں جائیں گے اور دیکھیں گے کہ اللہ تعالیٰ نے تقدیر میں کیا لکھا ہے۔“

اس تقریر سے تمام حاضرین کی ہمت بندھ گئی اور سب نے فیصلہ کر لیا کہ خراسان میں آخر وقت تک جنگ کریں گے۔

اس اثناء میں پورتگین سلجوقیوں سے آملا تھا اور خود لشکر مسعودی کے بہت سے لوگ مثلاً امیر یوسف، حاجب علی تگین، سلیمان، ارسلان جاذب اور قدر حاجب وغیرہ بھی ٹوٹ ٹوٹ کر سلجوقیوں کے پاس پہنچ گئے تھے۔ جنگی کانفرنس میں یہ مسئلہ بھی پیش ہوا کہ ان فراریوں سے کیا معاملہ کیا جائے۔ داؤد نے کہا کہ یہ نمک حرام اور محسن کش لوگ ہیں، ان پر ہرگز اعتماد نہیں کیا جا سکتا۔ آج ضرورتاً ہمارے پاس آئے ہیں، کل اگر دشمن نے نامہ و پیام سے ان کو پرچا لیا تو یہ ہم سے دغا کریں گے۔ لہٰذا انھیں اپنی پشت پر ہرگز نہ رہنے دو، بلکہ اپنی فوج کے آگے آگے رکھو۔ اگر یہ لڑے تو ہمارا فائدہ ہے اور نہ لڑے تو کچھ نقصان نہیں۔ چنانچہ اسی رائے کے مطابق پورتگین اور ارسلان جاذب وغیرہ کو دو ہزار سواروں کے ساتھ، جن میں زیادہ تر بھگوڑے شامل تھے، ہراول میں رکھا گیا۔

ان دونوں باتوں سے سیاسی و جنگی مسائل پر داؤد کی گہری نظر کا پتہ چلتا ہے اور یہ بھی معلوم ہوتا ہے کہ وہ غزنویوں کی اصلی کمزوری کو اچھی طرح سمجھ کر اس سے فائدہ اٹھا رہا تھا۔