سلاجقہ
اشاعت: 1954ءسید ابو الاعلیٰ مودودی رحمہ اللہ · اردو
مولانا سید ابوالاعلیٰ مودودی رحمہ اللہ کی تصنیف "سلاجقہ" اسلامی تاریخ کے اس اہم دور کا جامع، تحقیقی اور تجزیاتی مطالعہ پیش کرتی ہے جب مشرقِ وسطیٰ میں عباسی خلافت کے انحطاط کے بعد سلجوقی ترکوں نے ایک نئی سیاسی، فوجی اور تہذیبی طاقت کی حیثیت سے اپنا آغاز کیا۔ کتاب کا بنیادی مقصد صرف واقعات کی روایت نہیں بلکہ ان کے پس منظر، اسبابِ ظہور، عروج و زوال کے عوامل، اور اسلامی دنیا پر ان کے اثرات کو سمجھنا ہے۔ مولانا مودودی نے واضح کیا ہے کہ سلجوقیوں کا ظہور محض ایک قبائلی حرکت نہیں بلکہ ایک تاریخی ضرورت تھی جس نے عباسی خلافت کو روحِ عملیت بخشی، سنی مسلک کو مضبوط کیا، اور مسلمانوں کو داخلی انتشار اور خارجی دشمنوں (خاص طور پر فاطمیوں اور صلیبیوں) کے مقابلے میں تنظیم دی۔
کتاب کا آغاز ادارتی نوٹ سے ہوتا ہے جو اس حقیقت کی وضاحت کرتا ہے کہ یہ کتاب مکمل نہیں ہو سکی، کیونکہ مصنف کی مصروفیات—خصوصاً تفسیر تفہیم القرآن کی تدوین—نے حصہ دوم کی تکمیل کی راہ میں رکاوٹ ڈالی۔ پھر دیباچہ میں مصنف نے سلاجقہ کے تاریخی خاکے کو عباسی خلافت کے انحطاط، غزنویوں کے عروج، اور آلِ بویہ و فاطمیوں کے مقابلے کے تناظر میں پیش کیا ہے۔ اس کے بعد وہ ماخذوں کا جائزہ لیتے ہیں اور تاریخ بیہقی، زین الاخبار، اور زبدۃ النصر جیسے معاصر ذرائع کو سلجوقی تاریخ کی درست سمجھ کا واحد ذریعہ قرار دیتے ہیں۔
مقدماتی مباحث کے بعد کتاب چار ابواب میں تاریخِ سلاجقہ بیان کرتی ہے۔ ابتدائی حصہ عباسی خلافت کے زوال کے دوران ابھرنے والی متعدد مقامی سلطنتوں—طاہریہ، طولونیہ، صفاریہ، سامانیہ، آلِ بویہ، فاطمیوں اور غزنویوں—کا خاکہ پیش کرتا ہے تاکہ سلجوقیوں کے ظہور کا سیاسی پس منظر واضح ہو۔ باب اول (دورِ ظہور) میں آلِ سلجوق کی نسلی اصل، ان کی ہجرت اور بلادِ اسلام میں آمد، اور محمود و مسعود غزنوی کے ساتھ ان کی کشمکش بیان کی گئی ہے۔ باب دوم (دورِ تاسیس) طغرل بک کے دورِ حکومت، بغداد کی فتح، باسا سیری کے فتنے کے استیصال اور خلافتِ عباسیہ سے رشتہ داری کے قیام پر مشتمل ہے۔
باب سوم (دورِ عروج) الپ ارسلان کے عہد میں سلطنت کی وسعت—ارمینیہ، ماوراء النہر اور روم کے خلاف مہمات—کو بیان کرتا ہے، اور باب چہارم ملک شاہ کے دور میں سلجوقی اقتدار کے دمشق تک پھیلاؤ اور خلافت سے مزید مصاہرت کے سیاسی نتائج پر ختم ہوتا ہے، جہاں مصنف کی مصروفیات کے باعث کتاب کا دوسرا حصہ (سلجوقی زوال اور صلیبی جنگوں کا دور) مکمل نہ ہو سکا۔
یہ متن Read Maududi سے حاصل کیا گیا ہے، اور مستقل رسائی کے لیے یہاں محفوظ کیا گیا ہے۔ اصل صفحہ ملاحظہ کریں ↗
جبال کی فتح
طبرستان و جُرجان کی فتح کے بعد طغرل شمال کی طرف چلا گیا جہاں اس نے خوارزم کی دوسری مہم میں داؤد کی اعانت کی جیسا کہ اوپر بیان ہو چکا ہے۔ وہاں سے واپس ہوکر ۴۳۴ھ میں دہستان، جرجان اور طبرستان ہوتا ہوا رے [موجودہ طہران]آیا اور ابراہیم کو ہمستان کی طرف بھیج کر عراق عجم کی کمان خود اپنے ہاتھ میں لے لی۔ یہاں اس نے سب سے پہلے رے کو دوبارہ تعمیر کرایا، کیونکہ وہ لڑائیوں میں برباد ہو گیا تھا۔ دوران تعمیر میں دارالامارہ (گورنمنٹ ہاؤس) سے سونے کی جڑاؤ کشتیاں اور چینی کی دو قمتیاں جو قیمتی جواہر سے پُر تھیں اس کے ہاتھ آئیں اور دوسری قسم کا بھی بہت کچھ مال نکلا۔ اس کام سے فارغ ہو کر اس نے توسیع مملکت کی طرف توجہ کی۔ قزوین کے حملے میں ۸۰ ہزار دینار مال امان ہاتھ آیا اور وہاں کے حکم کا مرد نے کے ۲ ہزار دینار سالانہ خراج اور تحائف و ہدایا بھیجے۔ اصفہان کے حاکم فرامرز بن علاؤ الدولہ بن کاکویہ نے یہ دیکھ کر کہ اب کہیں طغرل ادھر کا قصد نہ کرے، خود بہت سا مال پیش کر کے سلامتی حاصل کر لی جو کچھ زیادہ مدت تک قائم رہنے والی نہ تھی۔ [ابن اثیر، ج ۹، ص ۳۱۲]اس طرح ایک سال کے اندر الجبال کے سارے علاقے پر اس کی حکومت قائم ہو گئی اور اصفہان اس کے زیر اثر آگیا۔