سلاجقہ

یہ تیسری صدی ہجری کے ربع اوّل کا زمانہ ہے۔ معتصم کی زندگی ہی میں اس خطرناک سیاسی چال کے برے نتائج ظاہر ہونے شروع ہو گئے تھے۔ اسے ترکوں کے لیے ایک الگ شہر (سامرا یا سُرَّ مَن رَأَى) بسانا پڑا، کیونکہ بغداد کے مہذب باشندے ان وحشی فوجیوں کے ساتھ گز ر نہ کر سکتے تھے۔ پھر عین اس وقت جب کہ معتصم رومیوں کے خلاف فیصلہ کن جہاد کر رہا تھا، دارالخلافہ میں اس کے عزل اور قتل کی سازش ہوئی، جس کا اصل محرک انہی ترکوں کی بڑھتی ہوئی قوت کے خلاف امراۓ سلطنت کا جوشِ غضب تھا۔ آخر میں معتصم کے محبوب ترکی سردار افشین کی سازش نے یہ بھی ظاہر کر دیا کہ اس پودے سے آئندہ کس قسم کے پھل پیدا ہونے والے ہیں۔ معتصم کے بعد واثق کے لیے یہ موقع تھا کہ وہ اس بڑھتے ہوئے خطرے کی روک تھام کرتا، مگر وہ اپنے باپ کی پالیسی پر آنکھ بند کر کے چلتا رہا اور اپنی سلطنت کے مختصر عہد میں اس نے ترک عنصر کو اس قدر مضبوط کر دیا کہ اس کے انتقال کے بعد جب اس کی جانشینی کا سوال پیش ہوا تو ترک سردار وصیف نے تمام کمانڈر سلطنت کے علی الرغم متوکل کی حمایت کی اور اسے تخت نشین کرانے میں کامیاب ہو گیا۔ یہ پہلا موقع تھا کہ ترک عنصر نے تخت خلافت کی وراثت کے مسئلہ میں مداخلت کی۔ [اگر چہ اس وقت وصیف کی مداخلت بالکل جائز بنیاد پر تھی، مگر اس نے آئندہ کے لیے فوج کی ناجائز اور نہایت خطرناک مداخلتوں کا دروازہ کھول دیا۔]اس کے بعد پوری ایک صدی تک ترک غلام سلطنت کے مالک بنے رہے اور خلفاء کو کٹھ پتلیوں کی طرح اٹھاتے اور گراتے رہے۔ [مشہور ہے کہ جب معتز باللہ تخت خلافت پر بٹھایا گیا تھا تو اس کے بعض امرائے دربار نے منجموں کو بلا کر دریافت کیا کہ خلیفہ کی کتنی عمر ہوگی اور کب تک حکمرانی کرے گا؟ اس پر ایک ظریف نے کہا کہ میں ان منجموں سے زیادہ اس کو جانتا ہوں۔ لوگوں نے کہا کہ تم ہی بتاؤ۔ اس نے جواب دیا کہ ”جب تک ترک چاہیں۔“]متوکل کو انھوں نے قتل کیا، مستعین کو انھوں نے اتنا تنگ کیا کہ وہ سامرا سے بغداد بھاگ گیا اور جب وہ اس کے بلانے پر بھی نہ آیا تو انھوں نے اسے معزول کر کے قتل کر دیا۔ معتز کو انھوں نے نہایت ذلت کے ساتھ معزول، قید اور قتل کیا۔ [معتز کے ساتھ ان کا سلوک بڑا ہولناک تھا۔ وہ اس کے کمرے سے اسے ٹانگ پکڑ کر کھینچ لائے، اسے ڈنڈوں سے پیٹا، اس کے کپڑے پھاڑ ڈالے، اسے دھوپ میں کھڑا کیا، وہ بے چارہ ایک پاؤں رکھتا اور دوسرا پاؤں اٹھاتا تھا۔ پھر اسے مارتے ہوئے لے گئے اور تین دن تک اسے بے آب و دانہ قید رکھا، اس کے بعد اسے ایک تہ خانے میں بند کر کے اس کا دروازہ چن دیا۔]مہتدی نے ان کا زور توڑنے کی کوشش کی تو انھوں نے اس سے جنگ کی اور گرفتار کر کے قید کر دیا۔ قاہر کو انھوں نے معزول کر کے اندھا کیا اور متقی کو اندھا کر کے معزول کر دیا۔ اس زمانہ میں بغداد کے اصلی فرمانروا خلفاء نہیں بلکہ خلفا کے یہی آقا صفت غلام [اس میں شک نہیں کہ وزارت اس زمانہ میں بھی ایرانی مدبروں کو حاصل رہی۔ ابن وہب، ابن الفرات، علی بن عیسیٰ اور ابن مقلہ وغیرہ اسی عہد کے مشہور وزراء گزرے ہیں۔ مگر یہ وزراء ترکوں کے مقابلہ میں بے بس تھے۔ کیونکہ فوجی قوت ان کے ہاتھ میں تھی اور ان کے مالی مطالبات انھیں بے چون و چرا پورے کرنے پڑتے تھے، ورنہ ان کا اس سے زیادہ برا حشر ہوتا تھا جو خلفاء کا بیان کیا گیا ہے۔]تھے۔