سلاجقہ

۳۸۳ھ میں بغرا خان نے دوبارہ ایک زبردست فوج کے ساتھ ماوراء النہر پر چڑھائی کی۔ امیر نوح کا سالار لشکر فائق پہلے ہی اس سے ملا ہوا تھا۔ سمر قند پر اس نے قصداً شکست کھائی اور ترکی فوجیں کسی روک ٹوک کے بغیر تیزی کے ساتھ بخارا کی طرف بڑھیں۔ فوج کے لیے ملک چھوڑ کر بھاگ جانے کے سوا کیا چارہ تھا۔ وہ مازندان کی طرف نکل گیا اور بغرا خان بہ آسانی بخارا پر قابض ہو گیا۔ لیکن یہاں کی آب و ہوا اسے راس نہ آئی۔ سخت بیماری کی حالت میں مفتوح علاقے کو عبدالعزیز بن نوح کے سپرد کر کے اپنے ملک کی طرف واپس ہوا۔ واپسی پر غُز ترکوں نے جو یقیناً ارسلان کی فوج کے لوگ ہوں گے اس کے ساتھ پر پہم چھاپے مارے جن سے اسے کافی نقصان پہنچا۔ راستے میں اس کا انتقال ہو گیا اور امیر نوح نے واپس آکر دوبارہ ملک پر قبضہ کر لیا۔ [ابن اثیر، طبع یورپ، ج ۹، ص ۶۸_۷۰۔ روضة الصفا، ج ۴، ص ۳۳۔ زین الاخبار، ص ۵۳_۵۴۔ تاریخ گزیدہ، ص ۳۸۵_۳۸۸۔ انگریزی ترجمہ طبقات ناصری، ص ۳۴_۳۵۔

۳۸۷ھ / ۹۹۷ء میں امیر نوح کا انتقال ہو گیا اور اس کی جگہ فائق اور بکتوزون نے اس کے بیٹے ابوالحارث منصور کو برائے نام تخت پر بٹھا کر خود حکمرانی شروع کی۔ تقریباً دو سال بعد انھوں نے منصور کو معزول کر کے اندھا کر دیا اور صغیر السن عبدالملک بن نوح کو تخت نشین کیا۔ ان حالات کو دیکھ کر سلطان محمود غزنوی نے خراسان و غزنین میں اپنی خود مختاری کا اعلان کر دیا۔ دوسری طرف سے بغرا خان کے جانشین ایلک خان (شمس الدولہ ابونصر بن بغرا خان) نے حملہ کر کے ذی قعدہ ۳۸۹ھ / ۹۹۸ء میں پوری مملکت بخارا کو کنارِ جیحوں تک فتح کر لیا اور سامانی خاندان کے تمام بڑے بڑے شہزادوں کو قید کر دیا جن میں نوح کے چاروں بیٹے عبدالملک، منصور، ابو ابراہیم اسماعیل اور ابو یعقوب بھی شامل تھے۔ [ابن اثیر، طبع یورپ، ج ۹، ص ۱۰۳، ۱۰۵-۱۰۶۔ روضة الصفا، ج ۴، ص ۲۵، ۲۷۔ زین الاخبار، ص ۵۸-۶۱۔ تاریخ گزیدہ، ص ۳۹۰-۳۹۱۔ ]

لیکن ۳۹۰ھ میں ابو ابراہیم اسماعیل بن نوح قید سے نکل بھاگا اور اس نے اپنے خاندان کے پرانے وفاداروں کو جمع کر کے کامل پانچ سال تک آبائی ملک کو واپس لینے کی پیہم کوشش کی۔ اس جدوجہد میں ارسلان بن سلجوق اور اس کے ترکمانانِ غز نے بھی اس کا ساتھ دیا اور شوال ۳۹۳ھ میں سمرقند تک کا علاقہ فتح کر لیا۔ مگر انھیں سامانیوں کے حق میں پانسہ پلٹنے کی کچھ زیادہ امید نہ تھی، اس لیے انھوں نے ایلک خاں کے قیدیوں کو رہا کر دیا اور ان کے اس فعل سے بدگمان ہو کر اسماعیل ان سے الگ ہو گیا۔ اس کے بعد مزید دو سال تک وہ زندگی کے نشیب و فراز دیکھتا رہا اور انجام کار یہ ہوا کہ ربیع الاول ۳۹۵ھ / ۱۰۰۴ء میں اس کی موت نے سامانی خاندان کی قسمت کا قطعی فیصلہ کر دیا۔ [ابن اثیر، طبع یورپ، ج ۹، ص ۱۱۱-۱۱۳۔ روضة الصفا، ج ۴، ص ۲۷-۲۹۔ زین الاخبار، ص ۶۳-۶۴۔ تاریخ گزیدہ، ص ۳۹۲-۳۹۳۔ طبقات ناصری ص ۵۱-۵۳۔]

اس زمانے میں ارسلان اور اس کے ساتھیوں کے لیے بخارا میں رہنا محال تھا اس لیے وہ جیحوں پار کر کے اس صحرا میں ہٹ آئے تھے جو خراسان، جُرجان اور خوارزم کے درمیان واقع ہے، اور یہاں وہ ماوراء النہر کے معاملات میں مداخلت کرنے کے ہر موقع کا انتظار کر رہے تھے۔