سلاجقہ

سلاطینِ سلجوقیہ کی وہ خصوصیات جن کی بدولت یہ درخشاں نتائج ظاہر ہوئے، یہ تھیں کہ انھوں نے ایک عرصہ تک اپنی بدوی سادگی برقرار رکھی اور حضریت اختیار بھی کی تو صرف اس حد تک کہ ترکمانی فوجیت کی روح مردہ نہ ہونے پائے۔ مملکت کے نظم و نسق کے لیے انھوں نے دانشمند وزراء کا انتخاب کیا اور انہیں آزادی کے ساتھ انتظام کرنے کا موقع دیا۔ علوم وفنون کی قدر شناسی میں انھوں نے کسی قسم کی کوتاہی نہ کی۔ ان کے ماتحت نیشاپور، اصفہان، بغداد اور دوسرے مقامات پر بڑے بڑے کالج قائم ہوئے۔ علماء کی خوب ہمت افزائیاں کی گئیں اور سلطنت کی سر پرستی میں تعلیم کو عام رواج دیا گیا۔ ان سب کے ساتھ سیاسی حیثیت سے ایک نہایت اہم بات یہ تھی کہ وہ راسخ العقیدہ سنی تھے اور مذہبی معاملات میں ان کا مسلک جمہور اسلام کی مرضی کے مطابق تھا، اس وجہ سے وہ رعایا میں بہت ہر دلعزیز تھے۔ مورخین نے ان کی اس خصوصیت کو سب سے زیادہ اہمیت دی ہے۔ چنانچہ حمد اللہ مستوفی لکھتا ہے:

”ارباب دول که در عهد اسلام بودند اکثر بعیبے چند ملوث بودند۔ چوں بنی امیہ بزندق و اعتزال و خارجیت، و بعضے از بنی عباس باعتزال، و بنی لیث و آل بویہ برفض، و غزنویان و خوارزمشاہیاں وغیر ہم بحقارت گوہر۔ اما سلجوق شاہیان، ازینہا پاک بودند وسنی و پاک دین و نیکو اعتقاد صاحب خیر مشفق برعیت۔“[تاریخ گزیدہ (طبع لیدن) ص ۴۳]

ایک دوسرا مصنف ابن الراوندی لکھتا ہے:

”درختے کہ بخش تقویت و تربیت دین، و ثمره اش بنائے خیرات از مدارس و خانقاہہا ومساجد و رباطہا و پلہا و آبگیر ہائے راہ حجاز، وتربیت علماء و مجالست زہاد و ابدال، و بذل کردن مال، و آئین عدل را تازه گردانیدن، و رسم سیاست زنده داشتن، …… و برکت پرورش علما و علم دوستی و حرمت داشت، سلاطین سلجوق بود، کہ در روئے زمین خاصه ممالک عراقین و خُوراسان علما خاستند، و کتب فقه تصنیف کردند….. چنانک طمعہائے بد دینان منقطع شد و طوعاً او کرہاً فلاسفہ و اہل ملل منسوخ و تناسخیان و دہریان بکلی سر بر فرمان شریعت و مفتیان امت نہادند….. و چوں بادشاہ و زیر دست و امیر و وزیر و جمله لشکر در املاک و اقطاعات بوجه شرع و مقتضائے فتوی ائمہ دین تصرف می کردند، بلاد معمور و ولایات مسکون ماند۔[راحتہ الصدور لیدن ،ص ٢٩-٣٠ ]

اسلامی سیاست میں سلجوقیوں کی آمد سے ایک خاص تغیر یہ ہوا کہ عباسی خلافت کی بگڑی ہوئی ساکھ ایک حد تک بن گئی۔ اگرچہ انھوں نے عباسیوں کو سیاسی اقتدار تو واپس نہیں کیا، مگر چونکہ وہ مذہبی حیثیت سے ان کی خلافت کو تسلیم کرتے تھے، اس لیے مقام خلافت کے احترام، صاحب خلافت کی اطاعت و حلقہ بگوشی، اور خاندان خلافت کی برتری و بزرگی ملحوظ رکھنے میں انھوں نے دوسرے حکمران خاندانوں سے زیادہ سرگرمی کا اظہار کیا۔ ترکی امراء اور آل بویہ کے زمانہ میں جس طرح خلفاء کو ذلت کے ساتھ معزول کیا جاتا تھا اور انھیں قتل کرنے، اندھا کرنے اور قید کر دینے کے واقعات جس کثرت کے ساتھ پیش آتے تھے، اس کا سلجوقیوں کے زمانہ میں نام و نشان تک نہیں ملتا۔ اس میں شک نہیں کہ بعض مواقع پر جب خلفاء ان کی سیاست میں مخالفانہ مداخلت کرتے تھے تو ان کی جانب سے بھی سختی برتی جاتی تھی۔ ملک شاہ اور مقتدی کے اختلافات، مسترشد اور راشد سے مسعود کی لڑائیاں، محمد اور مقتفی کے مقابلے، اسی قبیل سے ہیں۔ لیکن اس کے باوجود مجموعی طور پر سلاطین سلجوقیہ عباسی خلفاء کے ساتھ ایسے ادب و احترام کا برتاؤ کرتے تھے جس کی مثال دوسری جگہ کم ملتی ہے۔ طغرل جب پہلی مرتبہ خلیفہ قائم بامر اللہ سے ملتا ہے تو قصر خلافت کی دہلیز سے پا پیادہ ایوانِ خلافت تک جاتا ہے اور خلیفہ کے سامنے زمیں بوس ہو کر کھڑا ہو جاتا ہے۔ ملک شاہ جیسا باجبروت فرمانروا خلیفہ مقتدی سے سخت ناراض ہونے کے باوجود اس کے دربار میں اس طرح حاضر ہوتا ہے کہ سده شریفہ کے سامنے کئی مرتبہ زمین کو بوسہ دیتا ہے، اس کے بیٹھنے کے لیے کرسی لائی جاتی ہے تو بہ پاس ادب بیٹھنے سے انکار کر دیتا ہے، خلیفہ کے ہاتھ کو بوسہ دینے کی درخواست کرتا ہے اور جب یہ درخواست قبول نہیں ہوتی تو صرف خاتم خلافت کو آنکھوں سے لگانے پر قناعت کرتا ہے۔ یہ ان خلفاء کے ساتھ سلجوقی سلاطین کا برتاؤ تھا جو اخلاقی قوت کے سوا کسی قسم کی مادی قوت نہ رکھتے تھے۔ ممکن ہے کہ اس میں کچھ خلوص کا شائبہ بھی ہو، مگر اس سے انکار نہیں ہو سکتا کہ ان کے اس اظہار عقیدت سے جمہور اہل سنت کے قلوب پر خاص اثر ہوتا تھا اور یہ عام ہر دلعزیزی ان کی سیاسی بنیادوں کے لیے مزید استحکام کی موجب ہوتی تھی۔

سلجوقیوں نے اس اثر کو بڑھانے کے لیے خاندان خلافت سے رشتہ داری کے تعلقات بھی قائم کیے تھے۔ [خلفاء سے رشتہ داری کے تعلقات قائم کرنے کی سیاسی اہمیت سے آل بویہ بھی غافل نہ تھے، چنانچہ عضد الدولہ نے الطائع للہ پر بہت زور دیا تھا کہ وہ اس کی بیٹی سے شادی کرلے مگر نہ الطائع نے اسے پسند کیا اور نہ اس کے بعد کے خلفا نے کبھی بویہی خاندان کی بیٹی لینے پر رضامندی ظاہر کی۔]چنانچہ طغرل نے ارسلان خاتون (الپ ارسلان کی بہن) کو خلیفہ قائم کے نکاح میں دیا اور خود قائم کی بیٹی سے بڑے اصرار کے ساتھ اپنا نکاح کیا۔ پھر الپ ارسلان نے اپنی بیٹی خلیفہ مقتدی کو دی اور بعد میں ملک شاہ نے بھی اپنی بیٹی کو اس سے بیاہ دیا۔ ملک شاہ کی ایک دوسری بیٹی سلطان محمد کے زمانہ میں مستظہر باللہ سے بیاہی گئی۔ یہ رشتہ داریاں سلطنت اور خلافت کے درمیان ایک مفید رابطہ ثابت ہوئیں اور معاشرت کے ان معاملات نے سیاست میں ایک مناسب عنصر کا اضافہ کیا۔