سلاجقہ

طغرل غیر معمولی قابلیتوں کا انسان تھا۔ اس نے جس کامیابی کے ساتھ سلجوقیوں کی رہنمائی کر کے غزنویوں کا تختہ الٹ دیا اور ۲۶ سال کی مدت حکمرانی میں جس طرح تمام مشرق اوسط کو زیر و زبر کر کے طاقتور سلطنت قائم کر دی، وہ اس کی سیاست و تدبیر، جرأت و بسالت اور اعلیٰ درجہ کی قائدانہ صلاحیتوں پر دلالت کرتی ہے۔ وہ ۳۰ سال پہلے اپنے قبیلہ کے چند ہزار خانہ بدوش اور بے سروسامان افراد کے ساتھ جس حال میں خراسان آیا تھا اس کی کیفیت باب گزشتہ میں تفصیل سے بیان ہو چکی ہے۔ ۵ سال کی مختصر مدت میں اس نے چغری بک داؤد اور موسیٰ بیغو کے ساتھ مل کر دولت غزنویہ کو شکست دی اور حاصل شدہ ملک کو جو صرف خراسان کے صوبے پر مشتمل تھا، نہایت تدبیر کے ساتھ آپس میں تقسیم کر کے اپنے لیے صرف وہ چھوٹا سا علاقہ رہنے دیا جو طوس اور رے کے درمیان واقع تھا۔ اس چھوٹے سے علاقے سے اس نے اپنی ذاتی سلطنت کی توسیع کا سلسلہ شروع کیا اور ۲۴ سال کی مدت میں جرجان، طبرستان، آذربیجان، ارمینیہ، جبال، اصفہان، کردستان، فارس، کرمان، خوزستان، عراق اور الجزیرہ کو فتح کیا، دولت بویہیہ کو پامال کیا، روم اور انجاز کی سلطنتوں کو نیچا دکھا یا اور خلیفہ بغداد کی خدمت و حفاظت کا کام اپنے ہاتھ میں لے کر دنیائے اسلام میں مرکزی حیثیت اختیار کر لی۔ ایک بدوی الاصل ترکی سپاہی کا صحرا کے ایک معمولی سردار قبیلہ کی حیثیت سے چل کر ربع صدی کے اندر اتنی طاقت حاصل کر لینا خود اس بات کی روشن دلیل ہے کہ اس کے اندر حالات کو سمجھنے اور ان سے فائدہ اٹھانے کی غیر معمولی قابلیت تھی۔

فاتح اور فرمانروا ہونے کے علاوہ وہ ایک انسان کی حیثیت سے اپنے اندر بہت سی خوبیاں رکھتا تھا۔ اس کی سیرت میں بردباری اور راز داری کی صفات بہت نمایاں ہیں۔ قاضی ابوالحسن ماوردی کہتے ہیں کہ ۴۳۳ھ میں جب خلیفہ قائم بامر اللہ نے اوّل اوّل مجھے اس کے پاس سفیر بنا کر بھیجا تھا تو میں نے اس کے متعلق خلیفہ کو ایک خط لکھا تھا جس میں اس کی اور اس کے نظم مملکت کی بہت کچھ برائیاں کی تھیں۔ یہ خط اتفاقاً میرے ملازم کے ہاتھ سے گر گیا اور طغرل تک پہنچا دیا گیا۔ اس نے خط کو پڑھا اور اسے اپنے پاس محفوظ کر لیا، مگر کبھی اپنی کسی بات سے یہ ثابت نہ ہونے دیا کہ وہ اس تحریر سے واقفیت رکھتا ہے۔[ابن اثٰر،ج١٠،ص١١.زبدۃالنصر،ص٢٧]

اس کے ساتھ وہ یہ بھی جانتا تھا کہ فیاضی و دریا دلی سے کس طرح دشمن کو رام کیا جا سکتا ہے۔ شاہ الخباز جب ابراہیم اینال کے ہاتھ گرفتار ہوا تو ابراہیم نے اس کی رہائی کے لیے چار لاکھ دینار کا فدیہ بھی کافی نہ سمجھا تھا۔ مگر طغرل نے قیصر روم کی درخواست پر اسے بلا فدیہ رہا کر دیا اور اعزاز کے ساتھ رخصت کیا۔ اس کا اثر یہ ہوا کہ سلطنت روم سے اس کے دوستانہ تعلقات قائم ہو گئے اور ان تعلقات نے خارجی سیاست میں اس کے اثرات کو بہت کچھ بڑھا دیا۔

مورخین نے اس کی دینداری کا بھی ذکر کیا ہے۔ چنانچہ کہتے ہیں کہ وہ نماز کا بہت پابند تھا اور دو شنبہ و جمعرات کے روزے بالالتزام رکھتا تھا۔ لیکن اس دینداری کے دامن پر بدعہدی اور ظلم و ستم کے کچھ دھبے بھی نظر آتے ہیں جو یقیناً بہت بد نما ہیں۔