سلاجقہ

ادھر سلطنت غزنویہ کا فرمانروا آمل و ساری اور طبرستان و دہستان کی ہوا کھانے میں مشغول ہوا، ادھر فتنہ و فساد کے چشمے پھوٹ نکلے، جمادی الاولی ۴۲۲ھ میں ہارون بن آلتون تاش شاہ خوارزم مارا گیا۔ اس کی جگہ اسماعیل بن آلتون تاش حکمران ہوا جس سے طغرل اور اس کے بھائیوں کی نہ نبھ سکی۔ دوسری طرف علی تکین خاں کی وفات نے ان کے لیے بخارا کا دروازہ بند کر دیا۔ اب خوارزم میں ٹکنا محال تھا، کیونکہ شاہ ملک کا کھٹکا ہر وقت لگا ہوا تھا۔ اس لیے ناچار انہوں نے خراسان کا رخ کیا۔ یہاں کوئی قوت روکنے والی نہ تھی۔ رجب ۴۳۲ ھ میں انھوں نے دس ہزار سلجوقی و نیالی ترکمانوں کے ساتھ جیحوں کو عبور کیا، بیابان واہ گنبدان سے گزر کر مرو پہنچے اور وہاں سے نسا کا رخ کیا۔ یہاں پہنچ کر انھوں نے خراسان کے غزنوی گورنر کو ایک خط لکھا جس کے الفاظ یہ ہیں:

”بخدمت حضرت شيخ الرئيس الجليل السيد مولانا ابوالفضل شورى المعز <<من جانب بندگان بیغو ، طغرل ، داؤد، غلامان امیر المومنین ……

”ہم غلاموں کے لیے ماوراءالنہر و بخارا میں رہنا ممکن نہ تھا۔ علی تکین کی زندگی تک ہمارے اور اس کے درمیان دوستی، حسن سلوک اور ملاپ کے تعلقات تھے۔ مگر اب کہ وہ مر چکا ہے، معاملات دو بچوں کے ہاتھ میں آگئے ہیں جو نا تجربہ کار ہیں۔ علی تکین کا سپہ سالار ٹونش ان پر اور لشکر و پادشاہی پر حاوی ہو گیا ہے۔ اس کے اور ہمارے درمیان کھلم کھلا مخالفت ہو گئی ہے، جس کے باعث ہم وہاں نہیں رہ سکتے۔ ادھر خوارزم میں ہارون کے مارے جانے سے بڑا اضطراب برپا ہو گیا ہے اس لیے وہاں جانا بھی ممکن نہ تھا۔ اب ہم خداوند عالم، سلطان بزرگ، ولی النعم کی پناہ میں آئے ہیں، تاکہ خواجہ ہماری مدد کریں اور خواجہ عبد الصمد کو لکھ کر ہمارا شفیع بنائیں۔ ہماری ان سے واقفیت ہے۔ ہر جاڑے میں خوارزم شاہ التونتاش رحمہ اللہ ہم کو اور ہماری قوم اور ہمارے چارپایوں کو بہار کے زمانہ تک اپنی ولایت میں جگہ دیا کرتے تھے، اور اس وقت خواجہ بزرگ (یعنی عبد الصمد)

ہماری یاوری کرتے تھے۔ لہٰذا ان کی سفارش سے اگر رائے عالی ہو تو ہمیں بندگی میں قبول کیا جائے، اس طرح کہ ہم میں کا ایک شخص درگاہ عالی میں خدمت کرے اور دوسرے ہر اس خدمت کو بجا لائیں جس کے لیے خداوند کا فرمان ہو۔ اور یہ کہ ہم ان کے سایۂ بزرگ میں آرام و اطمینان سے رہیں اور ولایت نسا و فراوہ جو بیابان کے سرے پر ہے، ہمیں بخش دی جائے تاکہ وہاں فارغ دل ہو کر اپنا سامان رکھیں، بلخان کوہ، دہستان، حدود خوارزم اور جوانب بیجو سے کسی مفسد کو سر نہ نکالنے دیں، اور عراقی اور خوارزمی ترکمانوں کو بھگا دیں۔ اگر العیاذ باللہ خداوند نے ہماری درخواست قبول نہ کی تو نہ معلوم ہمارا کیا حال ہوگا، کیونکہ ہمارے لیے روئے زمین پر کوئی جگہ نہیں رہی ہے۔

مجلس عالی کی حشمت بڑی ہے۔ اس مجلس بزرگ کو کچھ لکھنے کی جرات ہم میں نہیں ہے، اس لیے خواجہ کو لکھتے ہیں تاکہ خداوندی سے اس کام کو پورا کرائیں، ان شاء اللہ عزوجل۔[بیہقی، ص ۵۸۳۔ ابن اثیر (ص ۱۹۸) اور ابن الراوندی (ص ۹۲) نے بھی اس خط کا ذکر کیا ہے مگر صرف اس کے مضمون کی طرف اشارہ کر کے چھوڑ دیا ہے۔]