سلاجقہ

خلیفہ قائم بامر اللہ نے بغداد سے نکل کر پہلا کام یہ کیا کہ اپنی مصیبت کے حال سے طغرل کو مطلع کیا اور اسے لکھا کہ ”اسلام کے گھر میں قرامطیوں کا شعار ظاہر ہو گیا ہے، اب اگر کچھ کرنا ہے تو فوراً اسلام کی مدد کو پہنچو۔“ طغرل بک اس وقت اپنی مصیبت میں گرفتار تھا، وہ مدد کو تو نہ پہنچ سکا لیکن اس نے تسلی کے لیے جواب میں یہ آیت لکھ بھیجی کہ

<<ارْجِعْ إِلَيْهِمْ فَلَنَأْتِيَنَّهُمْ بِجُنُودٍ لَا قِبَلَ لَهُمْ بِهَا وَلَنُخْرِجَنَّهُمْ مِنْهَا أَذِلَّةً وَهُمْ صَاغِرُونَ>> (النمل ۳۷:۲۷)

’’ان کے پاس واپس جا، ہم ان پر ایسے لشکر لے کر آئیں گے جن کی وہ تاب نہ لاسکیں گے، وہ انھیں وہاں سے ذلیل و خوار کر کے نکال دیں گے۔‘‘

پھر ابراہیم اینال کی مہم سے فارغ ہونے کے بعد اس نے بساسیری اور قریش کو لکھا کہ اگر تم خلیفہ کو بغداد لے آؤ تو میں عراق نہ آؤں گا اور صرف اپنے نام کے خطبہ و سکہ پر قناعت کروں گا۔ مگر بساسیری نے اس پیغام صلح کو رد کر دیا۔ آخر کار طغرل ایک فوج گراں لے کر بغداد کی طرف چلا اور اس دبدبہ و ہیبت کے

ساتھ چلا کہ دشمنوں کے حواس باختہ ہو گئے۔ ابھی اس کا مقدمۃ الجیش قصر شیریں تک پہنچا تھا کہ بساسیری بغداد چھوڑ کر بھاگ گیا اور عجیب اتفاق ہے کہ ۶ ذیقعدہ ۴۵۰ھ کو وہ بغداد میں داخل ہوا تھا اور ۶ ذیقعدہ ۴۵۱ھ کو وہاں سے نکل گیا۔ اس طرح عباسیوں کے دارالخلافت میں اس کا دور دورہ پورے ایک سال تک رہا۔

طغرل نے یہ خبر سنتے ہی امام ابو بکر ابن فورک کو اس غرض سے خلیفہ کی جانب روانہ کر دیا کہ اسے فتح کی خوشخبری سنائیں اور بغداد لے آئیں۔ ادھر مہارش بن مجلّی پہلے ہی خلیفہ کو لے کر روانہ ہو چکا تھا۔ راستہ میں عمید الملک کندری بڑے لاؤ لشکر اور سرا پردوں، خیموں اور زرنگار سواریوں کے ساتھ خلیفہ سے ملا اور اسے بڑی شان سے لے کر بغداد کی طرف چلا۔ نہروان پر خود طغرل اس کے استقبال کو موجود تھا۔ خلیفہ کی سواری جب سامنے آئی تو وہ سات مرتبہ زمیں بوس ہوا، آگے بڑھ کر بسلامت واپسی کی مبارک باد دی اور معذرت کی کہ ابراہیم کی بغاوت کے باعث میں وقت پر مدد کو نہ پہنچ سکا اور اسی بنا پر میں نے اُس کو قتل کر دیا کہ اس کی بدولت آل عباسؓ پر مصیبت نازل ہوئی۔ پھر کہا کہ اب میں اس بساسیری کا تعاقب کرتا ہوں اور شام کی طرف جا کر صاحب مصر (یعنی فاطمی خلیفہ) سے اس کا بدلہ لیتا ہوں۔ خلیفہ نے اس خدمت کے صلے میں اس کو تلوار عنایت کی۔ اس کے بعد خلیفہ بغداد کی طرف بڑھا اور ۲۵ ذی القعدہ ۴۵۱ھ ۱۰۵۹ء کو (کہ یہی ایک سال پہلے اس کے بغداد سے نکلنے کی تاریخ تھی) شہر میں داخل ہوا۔ اس وقت دولت عباسیہ کے پایۂ تخت میں قاضی ابو عبداللہ الدامغانی کے سوا کوئی بڑا آدمی باقی نہ بچا تھا جو استقبال کو نکلتا۔ خود طغرل نے شہر کی طرف سے استقبال کی رسم ادا کی، باب النوبی پر حاجب بن کر کھڑا ہوا اور خلیفہ کے خچر کی لگام ہاتھ میں تھامی اور پیدل چلنے لگا لے کر پا پیادہ اس کے حجرہ تک گیا۔

اس کے بعد سلطان طغرل نے سرہنگ سادیتگین، انوشروان اور خمار تگین طغرائى کو بساسیری کے پیچھے روانہ کیا، اور ان لوگوں نے اس کو شام کی طرف بھاگتے ہوئے ایک جگہ جا لیا۔ تھوڑے سے مقابلے کے بعد اس کے ساتھی پکڑے گئے اور وہ خود مارا گیا۔ ۱۵؍ ذی الحجہ کو اس کا سر بغداد لایا گیا، ایک نیزے پر رکھ کر اسے شہر میں گشت کرائی گئی اور آخر میں اس کو باب النوبی پر لٹکا دیا گیا۔ [ابن اثیر، ج ۹، ص ٢٧١-٢٧٠ زبدة النصرہ، ص ۱۵۔ ۱۶۔ روضۃ الصفا، ج ۴، ص ١٧٨ج٤ص٩٥۔تاریخ گزیدہ،ص٣٥٨-٣٥٧ابعالفداء۔ج٢،ص١٧٩.١٧٨ابن خلکان،حرف الف،ترجمہ ارسلان بسایری۔]