سلاجقہ

صفر ۴۳۰ھ میں مسعود بلخ پہنچا۔ اس اثنا میں سپہ سالار علی دایہ پورتگین کو شکست دے کر بھگا چکا تھا۔ اب چاہیے تھا کہ اس سے قطع نظر کر کے خراسان کی طرف رخ کیا جاتا۔ مگر نہ معلوم اس کے ذہن میں پورتگین کے متعلق کیا خیال بیٹھ گیا تھا کہ بلخ سے پھر ختلان کی طرف جانے کے لیے آمادہ ہو گیا۔ وزیر نے مجبور ہو کر پھر عرض کیا کہ اس جاڑے کے زمانہ میں جبکہ دریا کا پانی اکثر یخ بستہ ہو جایا کرتا ہے، اسے عبور کر کے دوسرے علاقہ میں چلا جانا ہرگز مناسب نہیں ہے۔ ہمارے پیش نظر اس سے بڑی ایک اور مہم ہے، اگر اس کو چھوڑ کر ہم پورتگین کے ساتھ الجھ گئے تو جو نقصان پہنچ چکا ہے اس کی تلافی مشکل ہو جائے گی۔ دوسرے وزراء وامراء نے بھی اس کی تائید کی۔ مگر مسعود نے کسی کی ایک نہ سنی اور جیحوں پر پل بندھوا کر ختلان جانے کے لیے مستعد ہو گیا۔ اب اس کی ضد اس حد کو پہنچ گئی تھی کہ جو لوگ نیک مشورے دیتے تھے، ان پر بگڑنے لگتا تھا۔ آخر کار وزراء نے سمجھانا بھی چھوڑ دیا، غلطیاں کرتے دیکھتے تھے اور پیچ و تاب کھا کر رہ جاتے تھے۔ [بیہقی، ص ٧٠٤-٧٠٣]

اسی زمانہ میں غزنین سے ولی عہد کے انتقال کی خبر آئی۔ سلطنت کے اتنے اہم واقعہ کی سلطان کو فوراً اطلاع ہونی چاہیے تھی، مگر سلطان اس وقت شراب میں مشغول تھا اس لیے کسی نے جا کر کہنے کی جرأت نہ کی۔ [بیہقی، ص ٧٠٥]

اواخر ربیع الاوّل میں مسعود جیحوں کو عبور کر کے ترمذ پہنچا اور وہاں سے پورتگین کے تعاقب میں روانہ ہوا۔ سلجوقیوں کے لیے اس سے بہتر موقع اور کیا ہو سکتا تھا۔ انھوں نے سرخس سے ایک فوج گراں بھیج دی تاکہ اندخود کے راستے جیحوں پر پہنچے اور پل کو تباہ کر دے۔ مسعود کو جب سلجوقیوں کے اس ارادہ کا حال معلوم ہوا تو سخت بدحواس ہوکر پور تگین کے مقابلہ سے پسپا ہوا اور مارا مار اتر مذ آیا۔ پیچھے سے پور تگین نے چھاپے مار کر بہت کچھ سامان لوٹ لیا۔ اگر اس اثناء میں سلجوقی فوج جیحوں پر پہنچ کر پل توڑ دیتی تو مشکل کا سامنا ہوتا، مگر خوش قسمتی سے ان کو پہنچنے میں دیر ہوئی اور مسعود اپنے لشکر سمیت دریا پار کر کے بلخ پہنچ گیا۔ [بیہقی، ص ۷۰۷۔۷۰۸۔ مصنف خود اس سفر میں مسعود کے ساتھ تھا۔ جو کچھ لکھ رہا ہے چشم دید لکھ رہا ہے۔ ]

ان واقعات سے سلجوقیوں کی جرأتیں اس قدر بڑھ گئی تھیں کہ ان کے دس سپاہی بلخ میں عین باغ سلطانی تک گھس آئے، چار ہندو پیادوں کو قتل کیا اور ایک ہاتھی پکڑ کر لے گئے، جسے داؤد نے نیشا پور بھیج دیا۔ غزنویوں کی غفلت کا یہ اتنا بڑا نشان تھا کہ جہاں جہاں سے گزرا لوگوں نے دیکھا اور یقین کر لیا کہ جن کے گھر میں سے ہاتھی اڑایا جا سکتا ہے ان کا اب اللہ ہی حافظ ہے۔

اس کے بعد داؤد نے بلخ سے متصل دو بستیوں پر چھاپہ مارا اور انھیں لوٹ لیا۔ [بیہقی، ص ۷۰۹۔]

اب مسعود کا پیمانہ صبر لبریز ہو چکا تھا۔ اس نے جنگ کا عزم کر لیا اور فوج لے کر سلجوقیوں کی طرف چلا۔ ۹؍ رجب ۴۳۰ھ کو علیا باد کے میدان میں فریقین ایک دوسرے کے مقابل ہوئے۔ اوّل اوّل غزنوی فوج لڑنے سے جی چراتی رہی۔ صرف پانچ سو سوار میدان میں لڑ رہے تھے اور باقی سارا لشکر کھڑا تماشا دیکھ رہا تھا۔ آخر مسعود غضبناک ہو کر خود میدان میں اترا اور ایک ہزار سوار لے کر رہا تھا۔

بڑھا۔ باوجود عیاشی کے آدمی بہادر اور مرد نبرد تھا۔ سلجوقی اس کے ایک حملہ کی بھی تاب نہ لا سکے۔ پچاس مقتول اور بیس قیدی چھوڑ کر بھاگ نکلے۔ اس وقت اگر بھاگنے والوں کا تعاقب کیا جاتا تو ایک بھی زندہ نہ بچتا۔ لیکن مسعود نے بڑی شرافت برتی کہ فوج کو بھاگتوں کا پیچھا کرنے سے روک دیا اور فرودگاہ پر واپس آکر اسیروں کو بھی رہا کر دیا۔ [بیہقی اس جنگ کا عینی شاہد ہے۔ (ص ۱۰۷۔۱۱۷) ]