سلاجقہ

بلخ کی فتح کے ساتھ غزنوی خطرہ بھی قریب قریب ہمیشہ کے لیے فرو ہو چکا تھا۔ اس لیے چغری بک نے بلخ سے آگے بڑھ کر جیحوں کے ساحل پر ڈیرے ڈال دیے اور خوارزم کی طرف نظریں جما لیں۔ اس ریاست کے سیاسی حالات بیرونی حملے کی کامیابی کے لیے پیش گوئی کر رہے تھے۔ خوارزم شاہ التونتاش کی وفات کے بعد وہاں جو انقلاب رونما ہوئے، ان کی طرف تھوڑا سا اشارہ ہم گزشتہ باب میں کر چکے ہیں۔ التونتاش کے جانشین ہارون نے دولت غزنویہ کے خلاف بغاوت کر کے سلجوقیوں سے ساز باز کر لیا تھا اور ماوراء النہر کے دوسرے امراء کے ساتھ مل کر خراسان کو فتح کرنا چاہا تھا۔ مگر جمادی الاخریٰ ۴۲۶ھ میں غزنوی رزیڈنٹ عبدالجبار کی سازش سے وہ مارا گیا اور اس کی جگہ اس کا بھائی اسماعیل خنداں مسند نشین ہوا۔ اسماعیل نے عبدالجبار سے بھائی کا انتقام لیا اور اسے قتل کر کے غزنوی سیادت سے کلیۃً آزادی حاصل کر لی۔ اس زمانہ میں سلجوقیوں کے مسئلے نے دولت غزنویہ کو اس قدر پریشان رکھا تھا کہ وہ خوارزم کی طرف توجہ نہ کر سکی اور چند سال تک یہ ریاست بالکل آزاد رہی۔ مگر جب سلطان مسعود سلجوقیوں سے شکست کھا کر غزنین واپس آیا تو اسے یہ تدبیر سوجھی کہ شاہ ملک کو جو سلجوقیوں کا پرانا دشمن تھا، اسماعیل کے خلاف ابھارا جائے اور خوارزم کی حکومت کا پروانہ دے کر اس سے نہ صرف خاندان التونتاش کا استیصال کرا دیا جائے، بلکہ بعد میں سلجوقیوں کے خلاف بھی اس کو استعمال کیا جائے۔ چنانچہ غزنین سے شاہ ملک کے نام حکومت خوارزم کا پروانہ بھیج دیا گیا اور اسے لکھا گیا کہ تم اس ملک کے جائز فرماں روا ہو۔ تمہیں حق ہے کہ اسماعیل کو بے دخل کر کے خود اپنی حکومت وہاں قائم کر لو۔ شاہ ملک نے اس فرمان کی بنا پر جمادی الاخری ۴۳۳ھ میں خوارزم پر حملہ کر دیا۔ اسماعیل خنداں اور اس کے وزیر شکر خادم نے جم کر مقابلہ کیا۔ تین شبانہ روز جنگ جاری رہی۔ آخر کار شاہ ملک غالب آیا اور شہر فتح کر کے اس نے سلطان مسعود کا خطبہ جاری کر دیا، حالانکہ اس وقت بے چارے مسعود کو قتل ہوئے بھی کئی ہفتے گزر چکے تھے۔ ادھر اسماعیل اور شکر خادم بھاگ کر سلجوقیوں کے پاس پناہ لینے آئے۔ یہاں پہلے ہی داؤد جیجوں کے کنارے بیٹھا خوارزم کے حالات کا بغور مطالعہ کر رہا تھا۔ اس نے ان دونوں کا خیر مقدم کیا اور ان کی حمایت کا ذمہ لے کر خوارزم پر چڑھائی کر دی۔ مگر شاہ ملک نے اس قدر سخت مقابلہ کیا کہ آخر کار اسے پسپا ہونا پڑا۔

خوارزم کی پہلی مہم سے واپس آکر داؤد نے پوری قوت کے ساتھ جنگ کی تیاری کی اور طغرل پک کو بھی دعوت دی کہ وہ اس ملک کی تسخیر میں شریک ہو۔ چنانچہ ۴۳۴ھ میں دونوں نے مل کر خوارزم پر حملہ کیا۔ شاہ ملک نے اس مرتبہ بھی سخت مدافعت کی، مگر سلجوقیوں کی جنگی چالوں نے آخر کار فتح پائی اور شاہ ملک کو ان کے ہاتھ ملک چھوڑ کر بھاگ جانا پڑا [ابن الاثیر، ج ۹، ص ۴۱۰۔ بیہقی، ص ۸۵۳۔ ۸۶۷۔ روضۃ الصفا، ج ۴، ص ۹۳]۔خنداں اور شکر خادم کی حمایت میں چھیڑی گئی تھی، بعد میں ان دونوں سے کسی بات پر جھگڑا ہو گیا اور سلجوقیوں نے انھیں الگ کر کے خوارزم کو خود اپنے لیے فتح کیا۔[بیہقی، ص ۸۶۷]

چغری بک کے متعلق یہ آخری اطلاعات ہیں جو ہم کو تاریخوں میں ملتی ہیں۔ اس کے بعد ہم طغرل بک کے کارناموں کی طرف رجوع کرتے ہیں۔

اوپر بیان ہو چکا ہے کہ فتح دندانقان کے بعد سلجوقی امراء کے درمیان ممالک کی جو تقسیم ہوئی تھی اس کی رو سے نیشاپور اور اس کے مغرب کا سارا علاقہ طغرل کے حصہ میں آیا تھا۔ اس نے نیشاپور آکر پہلے اندرونی انتظامات درست کیے پھر اپنے بھائی ابراہیم اینال کو فوج دے کر جبال کی طرف بھیجا جہاں اس نے بنو کاکویہ سے رے اور ہمدان کے علاقے فتح کر لیے۔ دوسری طرف خود طغرل نے جرجان و طبرستان کا رخ کیا جہاں انوشروان بن منوچہر بن قابوس [قابوس بن دشمگیر سامانیوں کی طرف سے جرجان کا والی تھا۔ یہ ولایت سلجوقیوں کے تسلط تک اس کے خاندان میں رہی اور وہ خود مختارانہ شان کے ساتھ اس پر قابض رہا۔ ]بن دشمگیر اور اس کے سالار لشکر ابو کا لیجار بن ویہاں القوہی کے درمیان مخالفت ہو گئی تھی۔ طغرل نے اس خانہ جنگی سے فائدہ اٹھایا اور بلا ادنیٰ مشقت دونوں صوبوں پر قبضہ کر لیا۔ اہلِ ملک نے ایک لاکھ دینار دے کر جان و مال کی امان حاصل کی، مرداوج بن بشو [ابن اثیر نے بعض جگہ اس کو بشو بھی لکھا ہے، مگر صحیح تلفظ بسو ہے۔ ]ان تمام علاقوں کا گورنر مقرر کیا گیا، ۵۰ ہزار دینار سالانہ خراج لگایا گیا اور طغرل بک کا خطبہ ان علاقوں میں جاری ہو گیا۔ [ابن اثیر، ج ۹، ص ۲۱۰۔ ۲۱۱۔ ابوالفداء، ج ۲، ص ۱۶۵۔ زبدۃ النصرہ، ص ۸-۹]یہ ۴۳۳ھ ۱۰۴۱ء

اور ۴۳۳ھ و ۴۳۴ھ کے واقعات ہیں۔