سلاجقہ

اس تسلط سے سلجوقی سلطنت کو بویہی سلطنت پر نمایاں غلبہ حاصل ہو گیا تھا اور اس کے بعد بویہی سلطنت کے لیے زندگی کا بہت کم امکان باقی تھا، مگر جو تھوڑا بہت امکان رہ گیا تھا، اتفاقات نے اس کو بھی نہ رہنے دیا۔ بغداد پہنچنے کے دوسرے ہی دن جب سلجوقی سپاہی شہر میں اپنی ضرورت کی چیزیں خریدنے لگے تو زبان سے ناواقفیت کی بناء پر ایک گھاس والے سے چند سپاہیوں کا جھگڑا ہو گیا۔ یہ اس سے گھاس چکا رہے تھے، وہ سمجھا کہ لوٹنا چاہتے ہیں، اس لیے شور مچانے لگا۔ اس پر بازار والے جمع ہو گئے اور انھوں نے سلجوقی سپاہیوں کو مارا۔ شہر کے دوسرے حصوں میں اس خبر نے عام فساد کی حالت پیدا کر دی اور ہر جگہ لوگوں نے سلجوقیوں پر ہجوم کر کے اکا دکا جس کو پایا مار ڈالا۔ پھر سب جتھا بنا کر شہر سے باہر خاص سلطان کی چھاؤنی پر حملہ کرنے کے لیے نکلے۔ یہاں باقاعدہ فوج نے ان کا مقابلہ کیا اور سخت نقصان کے ساتھ انھیں بھگا دیا۔ اس کے بعد سلجوقی فوجیں بے قابو ہو گئیں اور انھوں نے شہر میں گھس کر بلا امتیاز لوٹ مار مچانی شروع کر دی، یہاں تک کہ رئیس الرؤسا کے محلات اور عباسی خلفاء کے مقبروں تک کو لوٹ لیا۔ اس تمام فتنے میں ملک الرحیم اور اس کے آدمی بالکل الگ تھلگ رہے۔ مگر طغرل کو فی الواقع یا از راہِ تصنع یہ شبہ تھا کہ یہ سب کچھ ملک الرحیم کے اشارے سے ہوا ہے۔چنانچہ اس نے خلیفہ کو لکھا کہ اگر ملک الرحیم اور اس کے امراء اس جرم سے بری ہیں تو میرے پاس حاضر ہو جائیں، ورنہ میں سمجھوں گا کہ ان کا دامن بھی اس میں آلودہ ہے۔ یہ چال کارگر ہوگئی اور خلیفہ نے ان لوگوں کو امان کا یقین دلا کر اپنے ایلچیوں کے ساتھ طغرل کے پاس بھیجا۔ لیکن اس کی چھاؤنی کے پاس پہنچتے ہی ترکمان ان لوگوں پر ٹوٹ پڑے اور انھوں نے خلیفہ کے آدمیوں سمیت سب کو لوٹ لیا، حتی کہ بدن پر کپڑے تک نہ چھوڑے۔ پھر جب یہ لوگ طغرل کے سامنے حاضر ہوئے تو اس نے خلیفہ کے سفراء کو تو چھوڑ دیا اور باقی سب کو ملک الرحیم سمیت گرفتار کر کے سیروان کے قلعہ میں بھیج دیا۔ اس طرح دیالمہ کے اس زبردست فرمانروا خاندان کا خاتمہ ہو گیا جو ایک صدی سے زیادہ عرصے تک دارالاسلام کے قلب پر حکمراں رہا تھا۔

طغرل کی اس بدعہدی کو خلیفہ نے بہت بری نگاہ سے دیکھا اور اس کو لکھا کہ ”وہ لوگ میری امان میں تمہارے پاس گئے تھے۔ اگر تم انھیں رہا کر دو تو بہتر، ورنہ میں بغداد چھوڑ کر چلا جاؤں گا۔ میں نے تم کو اس لیے بلایا تھا کہ اوامر خلافت کی تعظیم و حرمت میں اضافہ ہو گا مگر میں نتیجے اس کے خلاف دیکھتا ہوں۔“ اس عتاب نامے کا اتنا اثر ہوا کہ کچھ لوگ رہا کر دیے گئے ۔ مگر ملک الرحیم کو رہائی نہ ملی۔ نیز اُس کے صرف خاص کی تمام املاک اور اس کے امرائے افواج کی ساری جاگیریں ضبط کر لی گئیں اور غز ترکمانوں نے سوادِ بغداد کو مغرب میں تکریت سے النیل تک اور مشرق میں النہروانات سے زیریں عراق کے اعمال تک خوب جی بھر کر لوٹا۔ یہاں تک کہ بغداد میں پانچ پانچ قیراط کو تیل اور دو دو قیراط کو گدھے بکنے لگے۔[ابن اثیر، ج ۹، ص ۲۵۵۔۲۵۶۔ روضة الصفاء، ج ۴، ص ۱۷۸۔ عماد کاتب، ابوالفداء، ابن الراوندی اور حمد اللہ مستوفی نے ان واقعات کو بہت غیر معتدل اختصار کے ساتھ بیان کیا ہے۔]