سلاجقہ

چند مہینے میں موصل، سنجار، دیار بکر اور جزیرۂ ابن عمر وغیرہ کو مطیع و منقاد کر کے طغرل نے یہ پورا علاقہ ابراہیم اینال کے سپرد کیا اور خود بغداد واپس ہوا۔ قفص تک پہنچا تھا کہ رئیس الرؤسا نے آکر خلیفہ کا سلام پہنچایا اور اس کی طرف سے ایک جواہر نگار جام، ایک فرجیہ اور ایک عمامہ پیش کیا، جسے سلطان نے زمین بوس ہو کر لیا۔ پھر بغداد پہنچ کر پہلی مرتبہ خلیفہ کی بارگاہ میں پیش ہونے کی اجازت مانگی جو قبول کی گئی اور ۲۵ ذیقعدہ ۴۴۹ھ کو اس کے لیے دربار عام منعقد کیا گیا۔ طغرل باب الرقہ تک کشتی میں گیا۔ وہاں اسے خلیفہ کی طرف سے گھوڑا دیا گیا جس پر سوار ہو کر صحن السلام کی دہلیز تک گیا۔ پھر اتر کر امراء کے جلو میں غیر مسلح و پاپیادہ تخت گاہ خلافت کی طرف چلا جو زمین سے سات ہاتھ بلند تھی۔ اس پر خلیفہ قائم بامر اللہ نبی صلی اللہ علیہ وسلم کی چادر اوڑھے عصائے نبوی ہاتھ میں لیے بیٹھا تھا اور اس کے سامنے پردہ پڑا ہوا تھا۔ جب طغرل سُدۂ شریفہ کے قریب پہنچا تو پردہ اٹھا دیا گیا اور اس نے خلیفہ کے سامنے زمین کو بوسہ دیا۔ رئیس الرؤسا نے باقاعدہ تقدیم کی رسم ادا کی۔ خلیفہ نے حکم دیا کہ سلطان کو کرسی دی جائے۔ پھر رئیس الرؤسا سے کہا کہ اس سے کہو ‘امیر المومنین تمہاری سعی کے شکر گزار، تمہارے کام کے معترف اور تمہارے قرب سے خوش ہیں۔ انہوں نے تمہیں ان تمام ممالک کا جن کی ولایت اللہ نے ان کو سونپی ہے، والی بنایا اور بندگان خدا کی مراعات تمہارے سپرد کی ہے۔ پس جو کچھ تمہارے سپرد کیا گیا ہے اس کے بارے میں اللہ سے ڈرتے رہو، اپنے حق میں اللہ کی نعمت پہچانو اور عدل پھیلانے، ظلم کو روکنے اور رعیت کی اصلاح کرنے میں پوری کوشش کرو۔’ اس پر طغرل نے پھر زمین چومی۔ اس کے بعد خدام اس کو مقام خلعت پر لے گئے۔جہاں اسے عجم کا تاج اور عرب کا مشکین و زریں عمامہ پہنایا گیا، گلے میں طوق اور ہار ڈالا گیا، سات پارچہ سیاہ کا خلعت دیا گیا جس میں ہفت اقلیم کی ولایت کی طرف اشارہ تھا اور ایک زرنگار تلوار اس کی کمر میں باندھی گئی۔ یہ خلعت لے کر وہ پھر اپنے مقام پر آیا، چاہتا تھا کہ اظہار تشکر کے لیے پھر زمین بوس ہو، مگر تاج کی وجہ سے نہ جھک سکا اور خلیفہ سے مصافحہ کی خواہش کی، چنانچہ خلیفہ نے ہاتھ بڑھا دیا اور طغرل نے اسے چوم کر آنکھوں سے لگایا۔ اس کے بعد اسے ایک اور تلوار دی گئی اور خلیفہ نے اسے ”پادشاہ مشرق و مغرب“ کہہ کر خطاب کیا۔ آخر میں خلیفہ نے اپنا فرمان تولیت دے کر اسے رخصت کیا اور طغرل نے واپس آکر خلیفہ کی خدمت میں بہت سے بیش قیمت تحائف بھیجے جن میں ۵۰ ہزار دینار نقد اور ۵۰ بہترین ترکی غلام اعلی درجہ کے گھوڑوں پر زرق برق لباس پہنے اور ہتھیاروں سے آراستہ پیراستہ شامل تھے۔[ابن اثیر، ج ۹، ص ٢٦٥،٢٦٤۔ زبدة النصرہ، ص ١٣-١٤۔ روضۃ الصفا، ج ۴، ص ١٧٤۔]