سلاجقہ

یہ قحط نیشاپور ہی نہیں بلکہ تمام خراسان پر چھایا ہوا تھا۔ غزنوی لشکر اس مصیبت کا مقابلہ نہ کر سکا، اس لیے ناچار جمادی الاخریٰ کے آخر میں مسعود کو نیشاپور چھوڑنا پڑا اور اس نے طوس کا رخ کیا۔ راستے میں غلے اور چارے کی کمی کے باعث لشکر کے بہت سے آدمی اور جانور مر گئے۔ فوج والے گرد و نواح کے دیہات میں گھس جاتے اور جہاں کہیں غلے کا نشان بھی پا لیتے، ٹوٹ پڑتے۔ مگر اس کے باوجود لشکر بھوکا مر رہا تھا۔ جب طوس میں بھی امن نہ ملا تو گھبرا کر سرخس کی طرف چلا۔ راستے میں اتنے جانور مر مر کر گر گئے کہ شمار نہ ہو سکتا تھا۔ سرخس پہنچ کر معلوم ہوا کہ یہاں بھی پانی، غلے اور چارے کا کال ہے۔ امراء و وزراء نے حاضر ہو کر عرض کیا کہ اب سوائے اس کے کوئی صورت باقی نہیں ہے کہ یہاں سے ہرات چلیں، کیونکہ وہ قحط سے محفوظ ہے اور بادغیس کے علاقہ میں بکثرت چارہ موجود ہے۔ اس کے بعد جب لشکر تازہ دم ہو جائے تو حملہ کیا جا سکتا ہے۔ مگر مسعود نے اس رائے کو سختی کے ساتھ رد کر دیا اور کہا کہ میں مرو جا کر دشمن کا مقابلہ کروں گا۔ امراء نے واپس آکر پھر دو خاص مصاحبوں کے ذریعہ سے کہلا بھیجا کہ مرو جانے میں سخت تباہی کا اندیشہ ہے، اس وقت ہرات جانے کے سوا کوئی بہتر صورت نہیں ہے۔ لیکن مسعود نے ان کو جھڑک کر کہا کہ تم لوگوں نے سازش کر لی ہے، تم چاہتے ہو کہ میں مصیبتیں اٹھاؤں اور تم چوری کرو، میں تمھیں ایسی جگہ لے جانا چاہتا ہوں جہاں تم سب مر جاؤ اور تمہاری خیانتوں سے مجھے نجات ملے۔“ اس جواب نے تمام امراء کے دل توڑ دیے اور سب مجبوراً خاموش ہو گئے۔ اس پر مزید یہ کہ مسعود اپنے سالاروں اور وزیروں کو چھوڑ کر خادموں اور ادنیٰ چاکروں سے مشورے کرنے لگا اور ان کے سامنے اعیانِ سلطنت کی برائیاں کیں۔ ان باتوں نے ان لوگوں کو اور بددل کر دیا۔ بادشاہ کو راہ راست پر لانے کی آخری تدبیر یہ کی گئی کہ ایک بوڑھے ترکی سپہ سالار التونتاش کو جس کا مسعود بہت لحاظ کرتا تھا، اس کے پاس بھیجا گیا تاکہ مرد جانے سے اس کو باز رکھے۔ مگر مسعود نے اس کی بات کو بھی رد کر دیا اور ۲ رمضان کو مرو کی جانب روانہ ہو گیا۔[بیہقی، ص ٧٧٢-٧٦٦۔] حال یہ تھا کہ سارا لشکر گرمی اور بھوک پیاس کے مارے مر رہا تھا، جانور چارے کے مارے بے دم ہو رہے تھے، سالارانِ فوج اور وزرائے سلطنت بادشاہ کی اس خود رائی سے تنگ دل تھے اور مجبورانہ اطاعت کے ساتھ کشاں کشاں جا رہے تھے۔ اسی حالت میں سلجوقی آن پہنچے اور انھوں نے اس تباہ حال لشکر پر چھاپے مارنے شروع کر دیے۔ وہ غزنوی لشکر کے ساتھ لگے لگے چلتے تھے اور جہاں موقع پاتے حملہ کر دیتے تھے۔ اس طرح انھوں نے ہر طرف سے کئی مرتبہ نرغہ کیا، مال لوٹا، آدمیوں کو قتل کیا اور جانوروں کو بھگا کر لے گئے۔ ان کے ان حملوں سے مسعودی فوج اس قدر خوف زدہ اور کم ہمت ہو گئی تھی کہ سلجوقی ان کے سامنے سے جانوروں کو کھول کر لے جاتے اور وہ دم نہ مارتے تھے۔ خصوصاً فوج کے ہندو سپاہی تو اتنے بددل تھے کہ دس ترکمانوں کو دیکھ کر ان کے پانچ پانچ سو آدمی بھاگ جاتے تھے۔ مسعود نے ہندی اور غزنوی فوج کے افسروں کو بلا کر اس بزدلی پر ملامت کی۔ انھوں نے کہا کہ آدمی اور گھوڑے بھوک کے مارے بے دم ہو رہے ہیں، نہ گھوڑوں میں دوڑنے کی طاقت نہ آدمیوں میں لڑنے کی طاقت، ایسی حالت میں مقابلہ ہو تو کیونکر ہو۔ [بیہقی، ص ٧٨٠-٧٧٣۔]