سلاجقہ

اب شمال، جنوب اور مشرق، تینوں جانب سے سلجوقی سلطنت بو یہی مملکت کو گھیر چکی تھی۔ بویہی علاقہ سمٹتے سمٹتے، فارس، خوزستان اور عراق کے صوبوں تک محدود رہ گیا تھا اور ان صوبوں کا بھی یہ حال تھا کہ بعض اضلاع آل بویہ کے قبضے سے نکل چکے تھے۔ بعض اضلاع پر پیہم غارت گریاں ہو رہی تھیں اور خود اندرون مملکت میں خانہ جنگی اور بد نظمی کی بدولت سخت انتشار برپا تھا۔ سلجوقی اپنے دیلمی ہمسایوں کی اس کمزوری سے فائدہ اٹھانے کی پوری کوشش کر رہے تھے۔ چنانچہ ایک طرف ان کی فوجیں عین بغداد کے سر پر دسکرہ اور باجسرٰی تک لوٹ مار کرتی چلی آتی تھیں، دوسری طرف خوزستان کا صوبہ ان کے پیہم چھاپوں کا ہدف بنا ہوا تھا اور بسا اوقات آہواز تک ان کے اثرات پہنچ جاتے تھے، تیسری طرف فارس کے علاقے میں بغاوت کا ایک غیر منقطع سلسلہ جاری تھا اور شیراز میں اکثر طغرل کا خطبہ پڑھا جاتا تھا۔ ملک الرحیم کے دو بھائی ابو منصور فلاسُتون اور ابو علی کیخسرو طغرل بک کی اطاعت اختیار کر چکے تھے اور وہ ان دونوں کو بغداد کے دیلمی فرماں روا کے خلاف استعمال کر رہا تھا۔

اب وہ وقت آگیا تھا کہ اس سلطنت کے پیکر بے جان کو دفن کر کے خود بغداد پر سلجوقی استیلا کا علم بلند ہو اور عباسی خلافت میں دیلمیوں کی جگہ سلجوقی لے لیں۔ اتفاق وقت سے اس کے اسباب بھی خود دیلمیوں ہی کے گھر میں مہیا ہو گئے۔

اوپر ذکر ہو چکا ہے کہ شعبان ۴۴۶ھ ۱۰۵۵ء میں موصل کے فرمانروا قریش بن بدران عُقیلی نے انبار اور حربٰی کے علاقہ پر قبضہ کر لیا تھا اور جوابی حملے سے بچنے کے لیے طغرل بک کی اطاعت قبول کر لی تھی۔ یہ علاقہ دراصل ارسلان بساسیری [بساسیری منسوب ہے بسا کی طرف جسے عرب نسا کہتے ہیں۔ یہ شخص بہاء الدولہ بن عضد الدولہ دیلمی کا غلام تھا۔ خلیفہ قائم بامر اللہ نے اس کو ترکوں کا سردار اعلیٰ بنایا تھا اور بڑھتے بڑھتے اس کا اثر اس حد تک پہنچ گیا کہ عراق و خوزستان کے منبروں پر خطبہ میں اس کا نام لیا جاتا تھا۔] کی جاگیر میں تھا جو عراق کی تمام ترک افواج کا سردار تھا۔ وہ اس دراز دستی کی تاب نہ لا سکا اور اپنی جاگیر کے ان علاقوں کو واپس لینے کے لیے چلا۔ رمضان میں قریش بن بدران کے دو آدمی ابوالغنائم اور ابوسعد پوشیدہ طور پر خلیفہ کے پاس آئے، جن کا مقصد غالباً اسی قضیہ کو رفع دفع کرانا ہوگا۔ بساسیری کو اس کی خبر ہوئی تو وہ بہت بگڑا اور اس نے ان دونوں کو گرفتار کرنا چاہا، مگر وہ اس کے ہاتھ نہ آ سکے۔ اس پر اس نے دار الضرب سے خلیفہ اور اس کے وزیر رئیس الرؤسا [ابوالقاسم علی بن الحسن بن مسلم، ملقب بہ رئیس الرؤسا]کے مشاہرے بند کر دیے اور تین چار مہینے تک دونوں کو سخت تنگ رکھا۔ خلیفہ کے ساتھ اس ناروا سلوک نے عوام میں بساسیری کے خلاف ایک عام جوش پیدا کر دیا اور رئیس الرؤسا نے اس کو اور زیادہ بھڑکایا۔ رفتہ رفتہ نوبت یہاں تک پہنچی کہ رمضان ۴۴۷ھ میں، جبکہ بساسیری واسط میں تھا، بغداد کے عوام اس کے محلات پر ٹوٹ پڑے اور اس کا سارا مال لوٹ لیا۔ [ابن اثیر، ج ۹، ص ۳۵۰۔ ۳۵۳]