سلاجقہ

دوسرے سال ۴۶۹ھ میں اَتسِز نے بڑھ کر مصر پر حملہ کر دیا اور قاہرہ تک بڑھتا چلا گیا۔ اس زمانے میں فاطمی سلطنت بدنظمی کے دور سے گزر رہی تھی۔ ابھی ابھی اس نے ہفت سالہ قحط سے نجات پائی تھی اور امیر الجیوش بدر الجمال اس کے امور کی ازسرنو تنظیم کر رہا تھا۔ ان حالات میں اَتسِز کی زبردست فوج کا مقابلہ کرنا مصریوں کی طاقت سے باہر تھا۔ مگر حملہ آوروں نے خود اپنے ہاتھوں ایک ایسی قوت پیدا کر دی جس نے مصریوں کی طرف سے ان کا مقابلہ کیا اور انھیں شکست دے کر بھگا دیا۔ انھوں نے قاہرہ کے سامنے خیمہ زن ہونے کے بعد اہل ملک کو ضعیف و بے بس دیکھا تو فوجی ضبط و نظام کو توڑ کر اطراف و جوانب میں لوٹ مار کے لیے پھیل گئے اور ظلم و ستم کا ایسا بازار گرم کیا کہ سارے اہل ملک چیخ اٹھے۔ اطراف کے زمینداروں اور بااثر لوگوں نے فاطمی خلیفہ مستنصر باللہ سے اس کی فریاد کی۔ اس نے عذر کیا کہ میرے پاس ان کے مقابلے کے لیے قوت نہیں ہے۔ انھوں نے کہا کہ ہم آپ کو فوج دیتے ہیں، ایک طرف آپ آتُسز پر حملہ کیجیے جس کے پاس ایک قلیل جمعیت رہ گئی ہے، اور دوسری طرف ہم اس کی ان منتشر فوجوں پر یکبارگی ٹوٹ پڑتے ہیں جو مفصلات میں لوٹ مار کرتی پھر رہی ہیں۔چنانچہ یہی تدبیر کی گئی اور اس دوہرے حملے سے شکست کھا کر آتُسز بحال تباہ اس طرح بھاگا کہ اس کی فوج کا بیشتر حصہ قتل و اسیر ہوا، خود اس کا ایک بھائی مارا گیا اور دوسرا سخت زخمی ہوا۔[ابن اثیر، ج ۱۰، ص ۴۱ و ۴۳۔ ابوالفدا، ج ۲، ص ۱۹۲۔ ابن اثیر نے اس واقعہ کے بارے میں مختلف روایتیں بیان کی ہیں، اور ابوالفدا نے اختصار کے ساتھ دو متضاد روایتیں لکھ دی ہیں۔ میں نے ان سب روایتوں کو نظر میں رکھ کر واقعے کی وہ صورت اختیار کی ہے جو سب سے زیادہ اقرب الی القیاس ہے۔]

اس تباہ کن اور احمقانہ کارروائی نے آتُسز کی قابلیت کا راز فاش کر دیا اور اس کا نتیجہ یہ ہوا کہ مصریوں کو جو پہلے اپنا ملک بچانے کے قابل بھی نہ تھے، سلجوقیوں سے الٹا شام بھی واپس لینے کی جرات ہو گئی۔ چنانچہ ۵۰۷ھ میں انھوں نے حملہ کر کے آتُسز کو دمشق میں محصور کر لیا۔ دوسری طرف ملک شاہ کو جب اپنے گورنر کی ان غلطیوں کا علم ہوا تو اس نے آتُسز کو معزول کر کے اپنے بھائی تاج الدولہ تتش بن الپ ارسلان [یہی سلاجقۂ شام کی ریاست کا بانی ہے۔ ابوالفداء نے اس کا نام تتش لکھا ہے۔ مگر ابن اثیر، عماد کاتب، ابن الراوندی اور حمد اللہ مستوفی تُتُش لکھتے ہیں۔]کو اس فرمان کے ساتھ شام کا گورنر مقرر کیا کہ وہ شام کے علاوہ اور جو علاقے فتح کرے گا وہ سب اس کے زیر حکومت ہوں گے۔ اس کے دمشق پہنچتے ہی مصری فوج محاصرہ اٹھا کر واپس چلی گئی۔ اس نے دمشق پر قبضہ کر لیا (۴۷۱ھ) اور آتسز سے سخت مواخذہ کیا جس کی جواب دہی وہ نہ کر سکا اور آخر کار اسے موت کی سزا دی گئی۔ [ابن اثیر، ج ۱۰، ص ۴۵۔ ابوالفداء، ج ۲، ص ۱۹۳۔۱۹۴۔ صاحب زبدہ نے بھی اس واقعہ کی طرف مختصراً اشارہ کیا ہے۔ (ص ۷۱)]