سلاجقہ

شمال میں اسلامی سرحدوں سے متصل ترکوں کے بہت سے قبائل رہتے تھے جن میں تغزغز، خرخیز، کیماک اور خرلیجیہ بڑے بڑے علاقوں پر پھیلے ہوئے تھے۔ [إصطخری (مرتبہ دی گویے) ص ۹]لیکن مسلمانوں کو ان کی جس قوم کے ساتھ سب سے زیادہ سابقہ رہتا تھا وہ یہی غز تھے۔ ان کی سرحد اسیجاب سے لے کر سیحوں کے کنارے کنارے خوارزم تک اور پھر خوارزم سے لے کر فرادہ اور دہستان تک پھیلی ہوئی تھی اور اس طویل سرحد پر مسلمانوں سے ان کی جنگ بھی رہتی تھی، صلح بھی ہوتی تھی اور تجارتی لین دین بھی ہوا کرتا تھا۔ صلح کے زمانے میں وہ بحر خوارزم کے شمالی ساحل سے آکر خلیجان پر اترتے تھے اور وہاں سے ان کے تجارتی قافلے فراتکین (یا براتکین) اور بحر جانیہ میں آکر اپنی خام اجناس کا اسلامی مصنوعات سے مبادلہ کرتے تھے۔ [إصطخری ص ۳۰۳۔ ابن حوقل ص ۵۳۳]چوتھی صدی ہجری میں بحر جانیہ خصوصیت کے ساتھ مسلمانوں اور غزوں کی تجارت کا ایک بڑا مرکز بنا ہوا تھا۔ [اصطخری ص ۲۹۹۔ ابن حوقل ص ۳۵۰ ]ان کے تجارتی اموال میں سب سے زیادہ جو چیز اہل خراسان و ماوراء النہر کو مرغوب تھی وہ ان کی بکریاں تھیں جن کا گوشت بہترین غذاؤں میں شمار ہوتا تھا۔ [اصطخری ص ۲۸۸۔ ابن حوقل ص ۳۳۰]دوسری طرف مشرق میں صبران کی وہی حیثیت تھی جو مغرب میں جرجانیہ کی تھی۔ سیحوں کے اُس پار، یہ چھوٹا سا شہر ترکانِ غز کا مجمع تھا جہاں مسلمانوں سے ان کے صلح، معاہدہ اور تجارت کے معاملات ہوا کرتے تھے۔ [ابن حوقل ص ۹۱]صبران سے اوپر جند، خوارہ اور الحدیثہ واقع تھے جو اسلام سے متاثر ہو چکے تھے مگر چوتھی صدی کے نصف اول میں ان پر ترکانِ غز کی حکومت مسلط ہو گئی تھی اور دریائے سیحوں کے مشرقی ساحل یعنی ماوراء النہر کے اندرونی علاقے تک ان کا تسلط پھیل گیا تھا۔ [ابن حوقل ص ۹۳ ]

چونکہ ان سرحدی ترکوں کو مسلمانوں سے جنگ کے میدان اور تجارت کی منڈی میں بکثرت ملنے جلنے کا اتفاق ہوتا تھا، اس لیے اسلام کی غالب تہذیب وقتاً فوقتاً ان کے چھوٹے چھوٹے اور بڑے بڑے گروہوں کو اپنے اندر جذب کرتی رہتی تھی۔ وہ مسلمان ہونے کے بعد ابھی سرحدوں پر بس جاتے تھے اور عرف عام میں ”ترکمان“ کہلاتے تھے۔ [مقدسی ص ۳۷۴]جنگ میں بھی ان کے ہزاروں آدمی پکڑے ہوئے آتے تھے [اصطخری کہتا ہے کہ ”اہل ماوراء النہر کو ان ترکوں سے جو ان کی سرحد پر محیط ہیں ان کی ضرورت سے بہت زیادہ غلام ہاتھ آتے ہیں اور وہ تمام آفاق میں بھیجے جاتے ہیں کیونکہ دنیا کے بہترین غلام ہیں۔“ (ص ۲۸۸)]اور بلادِ اسلام میں پھیل کر رفتہ رفتہ اسلام میں جذب ہو جاتے تھے۔ غالباً خلیفہ مہدی عباسی (۱۵۸ھ/ ۷۷۵ء - ۱۶۹ھ/ ۷۸۵ء) کے زمانے میں پہلی مرتبہ ان کی ایک بڑی جماعت نے دریائے سیحوں کے مشرقی کنارے پر اسلامی علاقے میں آکر اسلام قبول کیا تھا۔ اس کے بعد یہ سلسلہ برابر جاری رہا یہاں تک کہ معتصم نے انہی ترکمانوں سے وہ فوج مرتب کی جو ایک صدی تک دولت عباسیہ میں سیاہ و سپید کی مالک رہی اور جس کی کامیابیوں نے آئندہ کے لیے بلاد اسلام میں ترکوں کے لیے قسمت آزمائی کا راستہ کھول دیا۔ چوتھی صدی ہجری کے وسط میں ماوراء النہر کی سرحد پر ان نو مسلم ترکمانوں کی چھوٹی چھوٹی نو آبادیاں قائم ہو گئی تھیں۔ بیکند کا پرگنہ زیادہ تر انہی سے آباد تھا۔ فاراب، کجیدہ اور شاش کے درمیان جو شاداب علاقہ تھا، اس میں ان کے تقریباً ایک ہزار خاندان بے ہوئے تھے اور یہ لوگ مسلمانوں کی طرف سے اپنے کافر ہم قوموں کے خلاف جنگ کیا کرتے تھے۔ [ابن حوقل ص ٣٩١]

انہی غز ترکمانوں میں سے ایک وہ گروہ بھی تھا جو چوتھی صدی ہجری کے وسط میں اپنے سردار سلجوق کے ساتھ آکر بلاد اسلام میں آباد ہوا۔