سلاجقہ

جس وقت محمود نے ارسلان بن سلجوق کی قوم کو خراسان میں آباد کرنے کا فیصلہ کیا تھا اسی وقت ارسلان جاذب نے حکم لگا دیا تھا کہ یہ ایک بڑی غلطی ہے جس پر بعد میں پچھتانا پڑے گا۔ [زین الاخبار، ص ۸۵]اگرچہ محمود نے ایسا کرنے میں متعدد مصلحتیں سوچی تھیں، مثلاً یہ کہ خراسان کے مختلف ناحیوں میں بس کر ان کی بندھی ہوئی جمعیت پراگندہ ہو جائے گی، متمدن قوموں کے ساتھ رہنے سے ان کی وحشت و جنگ جوئی دور ہو جائے گی، اور سب سے زیادہ یہ کہ جب وہ خراسان کی منضبط اور منظم حکومت کے ماتحت آجائیں گے تو آسانی سے قابو میں رکھے جاسکیں گے۔ لیکن یہ سب مصلحتیں بے بنیاد ثابت ہوئیں اور تاریخ نے آخر یہی فیصلہ کیا کہ خراسان میں اس قوم کو داخل کرنا غزنوی سیاست کے اعتبار سے ایک بڑی غلطی تھی۔

بہر حال محمود کی اجازت سے یہ لوگ خراسان میں داخل ہوئے اور کچھ عرصہ تک ایک مطیع رعایا کی حیثیت سے رہے۔ اس زمانہ میں ابوسہل حمدوی [عماد کاتب، ابن اثیر، بیہقی اور گردیزی نے اس کو حمدونی لکھا ہے، مگر ثعالبی اپنی یتیمہ میں حمدوی لکھتا ہے اور فرخی نے اپنے ایک قصیدہ میں اس کے ساتھ کسروی، شومی اور مانوی وغیرہ قافیہ باندھے ہیں۔ ]عمید عراق سے انھوں نے اچھے تعلقات پیدا کر لیے تھے۔ چنانچہ ہم سنتے ہیں کہ ایک مرتبہ انھوں نے تین خُتّلی گھوڑے، سات بَختی اونٹ اور تین سوتر کی بکریاں اس کو ہدیہً پیش کیں۔ [زبدة النصرة، ص ۵]لیکن یہ حالت کچھ زیادہ عرصہ تک قائم نہیں رہی۔ خراسان کے عمال نے ان پر سختی شروع کی اور انھوں نے بھی سختی سے جواب دیا۔ نتیجہ یہ ہوا کہ خراسان کا سارا بالائی علاقہ ہنگامہ و فساد سے بھر گیا۔ نسا، باورد [اس مقام کا نام باور کبھی ہے اور ابیورد بھی۔]اور فراوہ کے لوگ سلطان محمود کے پاس فریاد لے کر پہنچے۔ (۴۱۸ھ) اور محمود نے ارسلان جاذب کو ان کی گوشمالی کا حکم دیا۔ اس نے حسب حکم ان کی جمعیت پر پیہم حملے کیے مگر ان کا کچھ نہ بگاڑ سکا۔ جب محمود کے پاس شکایات کی جھڑی لگ گئی تو اس نے زیادہ سختی کے ساتھ ارسلان جاذب کو ان کا انسداد کرنے کے لیے لکھا۔ ارسلان نے جواب دیا کہ ان کی قوت بہت بڑھ گئی ہے، اگر آپ بذات خود آ کر ان کی سرکوبی نہ کریں گے تو ان کا فتنہ حد تدارک سے گزر جائے گا۔ آخر ۴۱۹ ھ / ۱۰۲۸ء میں محمود خود غزنین سے روانہ ہوا اور بست کے راستے طوس میں پہنچا۔ رباط فراوہ کے قریب سلجوقیوں سے جنگ ہوئی اور محمودی قوت سے ٹکر کھا کر وہ اس طرح پاش پاش ہوئے کہ بلخان کوہ، جرجان اور دہستان وغیرہ علاقوں میں پراگندہ ہو گئے اور ان کی ایک جماعت آذربیجان تک چلی گئی۔[زین الاخبار ،ص٧٩-٩٠۔ابن اثٰر ،ج ٩،ص١٥٧.ابن خلکان،ترجمہ طخرل بک]