سلاجقہ

۴۴۰ھ میں ماوراء النہر کی طرف سے غز ترکمانوں کی ایک بہت بڑی جماعت طغرل بک کے علاقے میں گھس آئی۔ اس قوم کے خواص کو سلجوقیوں سے بہتر کون جان سکتا تھا۔ انھوں نے محسوس کر لیا کہ یہ جنگجو اور وحشی انبوہ جدھر جائے گا قتل و غارت گری کا بازار گرم کر دے گا۔ اس لیے انھوں نے اس بلا کا رخ روم کی عیسائی سلطنت کی طرف پھیر دیا۔ وہ خود بھی یہی چاہتے تھے کہ جنگ کریں اور اموال غنیمت لوٹیں۔ لہٰذا آگے آگے ان کا جم غفیر اور پیچھے پیچھے ابراہیم اینال کی قیادت میں سلجوقی لشکر بلاد روم کی طرف روانہ ہوا۔ جبال سے متصل آذربیجان کے علاقے کو پامال کرتے ہوئے یہ لوگ ارمینیہ میں گھس گئے اور ملازگرد [ارمینیه، روم اور الجزیرہ کی سرحد پر یہ ایک نہایت اہم جنگی مقام تھا۔ اس کو مؤرخین نے ملازکرد، ملاز جرد اور مناز جرد وغیرہ مختلف ناموں کے ساتھ لکھا ہے۔]کو فتح کیا جو بحیرہ وان کے اوپر واقع ہے۔ پھر مغربی فرات کے کنارے ارزن الروم کو فتح کیا اور سارے علاقہ قالیقلا کو پامال کر دیا۔ اس کے بعد وہ بلاد روم میں گھسے اور طرابزون تک پھیلتے چلے گئے۔ سلطنت روم اور ریاست ابخاز [ابخاز موجودہ گرجستان (جارجیا) کا قدیم نام ہے۔]نے یہ طوفان دیکھا تو متحدہ کوشش سے پچاس ہزار کا لشکر فراہم کیا اور ان کے مقابلے میں مدافعت شروع کی۔ مگر جنگ میں غزنوں کو فتح حاصل ہوئی اور خود قاریط شاہ ابخاز گرفتار ہو گیا۔ اب یہ سیلاب بڑھتے بڑھتے اندرون بلاد روم میں اس حد تک پہنچ گیا کہ قسطنطنیہ سے صرف پندرہ دن کی مسافت باقی تھی۔ آخر کار قیصر روم نے طغرل بک کے پاس سفراء بھیجے، جنہوں نے آ کر بیش قیمت ہدایا پیش کیے اور درخواست کی کہ دونوں سلطنتوں کے درمیان ایک معاہدہ ہو جائے۔ نیز انھوں نے نصر الدولہ بن مروان کو بیچ میں ڈال کر شاہ ابخاز کی رہائی کے لیے بھی کوشش کی۔ طغرل نے اس موقع پر پوری دانشمندی اور سیاست فہمی سے کام لے کر ان کی دونوں درخواستوں کو قبول کر لیا۔ شاہ ابخاز کو کسی فدیے کے بغیر رہا کر دیا اور ۴۴۱ھ ۱۰۴۹ء میں سلطنت روم سے باقاعدہ معاہدہ کر لیا، جس کی رو سے بلاد روم میں سلجوقیوں کی پیش قدمی رک گئی۔ قیصر نے اس کے شکریے میں قسطنطنیہ کی مسجد کو آباد کرنے کی اجازت دے دی جہاں مسلمان آزادی کے ساتھ نماز پڑھنے لگے اور طغرل بک کا خطبہ جاری ہو گیا۔ [ابن اثیر، ج ۹، ص ۲۲۶، ۲۲۷، ۲۳۱۔ ابو الفداء، ج ۲، ص ۱۶۹]

اس جنگ میں سلجوقیوں کو بے شمار مال غنیمت ہاتھ آیا۔ ان کے سیاسی اثرات اذربیجان، ارمینیہ اور مغربی فرات تک پھیل گئے۔ گرجستان اور ایشیائے کوچک میں ان کی دھاک بیٹھ گئی۔ قریب کی غیر اسلامی سلطنتوں سے ان کے سیاسی تعلقات قائم ہو گئے اور اسلامی ممالک میں ان کی پچھلی غارت گریوں سے جو برے اثرات پیدا ہو گئے تھے وہ ایک حد تک اچھے اثرات سے بدل گئے۔