سلاجقہ

شعبان ۴۷۳ھ میں ملک شاہ کرمان وغیرہ صوبوں کا دورہ کرتا ہوا رے آیا اور یہاں اس نے فوج کا جائزہ لے کر کے ہزار آدمیوں کی تخفیف کا حکم دیا جو اس کی رائے میں ناکارہ سپاہی تھے۔ نظام الملک نے اسے اس فعل سے باز رکھنے کی کوشش کی اور کہا کہ یہ لوگ نہ منشی ہیں نہ تاجر اور نہ درزی اور نہ ان کا کوئی دوسرا پیشہ ہے۔ یہ صرف سپاہی ہیں۔ اگر ہم انھیں علیحدہ کریں گے تو کچھ بعید نہیں کہ یہ کسی اور کو سلطان تسلیم کر کے اس کے تسلط کے لیے برسر پیکار ہو جائیں۔ اس صورت میں ہم کو پریشانی الگ اٹھانی پڑے گی اور ہمیں اس رقم سے کئی گنا زیادہ روپیہ خرچ کرنا ہوگا جو رقم ہم ان پر خرچ کرتے ہیں۔ سلطان نے اپنے وزیر کے اس عاقلانہ مشورہ کو قبول نہ کیا اور اپنا حکم نافذ کر دیا۔ نتیجہ یہ ہوا کہ یہ سب لوگ اس کے بھائی تکش سے جا ملے اور ان کے مل جانے سے اس کے دماغ میں بغاوت اور حصول سلطنت کی ہوا بھر گئی۔ اس نے بوشنج سے نکل کر خراسان پر حملہ کر دیا۔مرد الروز، مرو، الشاہجان اور ترمذ پر قبضہ کر کے خراسان کے دارالحکومت نیشا پور کی طرف پیش قدمی کی۔ اگر اس مہم میں وہ کامیاب ہو جاتا تو یقیناً یہ بغاوت خطر ناک صورت اختیار کر لیتی۔ مگر ملک شاہ عین موقع پر پوری قوت کے ساتھ آگیا اور نیشا پور کو محفوظ کرتا ہوا تیزی کے ساتھ آگے بڑھا۔ مجبوراً تکش نے پسپا ہو کر ترمذ میں پناہ لی اور مصلحتاً بھائی سے صلح کر لی۔ مگر یہ صلح محض عارضی تھی۔ وہ صرف اس کا منتظر تھا کہ ملک شاہ جب سلطنت کے کسی دور دراز علاقے میں ہو تو پھر خراسان پر حملہ کرے۔ چنانچہ ۷۷ھ میں جب سلطان الجزیرہ کا دورہ کر رہا تھا اس نے دوبارہ حملہ کیا اور سرخس تک بڑھ آیا۔ اس مرتبہ حالات ایسے تھے کہ وہ رے سے ادھر دم نہ لیتا، مگر نظام الملک کے دوست ابو الفتوح طوسی نے ایک سیاسی چال سے اس کو یہ فریب دے دیا کہ ملک شاہ رے واپس آگیا ہے اس لیے وہ خوف زدہ ہو کر وخچ چلا گیا۔ [یہ نسف کے علاقے میں ایک قلعہ ہے۔ (یاقوت حرف د) ]تین مہینے بعد ملک شاہ واپس آیا اور آتے ہی اس نے تکش کے استیصال کا قصد کیا۔ اس نے تکش کو بہ حلف یقین دلایا کہ میں تجھے کوئی سزا نہ دوں گا۔ وہ مطیع ہو کر اس کے پاس چلا آیا۔ مگر لوگوں نے مشورہ دیا کہ اب اسے آزاد چھوڑنا مناسب نہیں ہے۔ آخر عہد شکنی کے گناہ سے بچنے کی یہ صورت نکالی گئی کہ اس کو شاہزادہ احمد کے سپرد کر دیا گیا جو ملک شاہ کا بیٹا تھا اور اس نے اسے اندھا کر کے قید کر دیا۔ [ابن اثیر، ج ۱۰، ص ۴۸ و ۵۵۔ زبدۃ النصرہ، ص ۷۱۔ حمد اللہ مستوفی نے اس بغاوت کا ذکر کیا ہے مگر سن غلط لکھا ہے اور اس کا یہ بیان بھی غلط ہے کہ تکش نے نیشا پور کا محاصرہ کر لیا تھا۔]اس طرح اپنے دانشمند وزیر کی رائے سے انحراف کر کے سلطان نے چار سال تک پریشانی اٹھائی اور وزیر کا کہنا سچ نکلا کہ ان سپاہیوں کے رکھنے پر جتنا خرچ ہوتا ہے ان کے نکال دینے پر اس سے کئی گنا زیادہ خرچ ہوگا۔