سلاجقہ

اس کے بعد پیہم دو واقعات اور پیش آئے جنھوں نے ”سنی [یہاں ”سنی“ خلافت کا لفظ ”شیعی“ یا ”فاطمی“ امامت کے مقابل استعمال کیا گیا ہے۔]“ خلافت کو بالکل نیم مردہ کر دیا۔ ان میں سے پہلا واقعہ آلِ بویہ کا ظہور تھا اور دوسرا فاطمین کا مشرقِ ادنیٰ کی طرف اقدام۔ مقدم الذکر خاندان دَیلم کے جنگ آزما قبائل میں سے تھا اور اپنا تعلق ایران کے قدیم ساسانی خاندان سے ملاتا تھا۔ چوتھی صدی کی فتنہ پرور آب و ہوا نے ان کے اندر بھی قسمت آزمائی کا ولولہ پیدا کیا اور اس کا بانی اوّل ابو شجاع بویہ گمنامی کے گوشہ سے نکل کر ناموری اور اقتدار کے لیے ہاتھ پاؤں مارنے لگا۔ ابتداءً علویوں اور سامانیوں کی باہمی لڑائیوں میں حصہ لینے کے سبب سے اس کی قوت مضبوط ہوئی، پھر اس کے تین بیٹے علی، حسن اور احمد طبرستان و بجرجان کے فرماں روا مرداویج بن زِیار کی ملازمت میں داخل ہو گئے۔ اس کو کچھ زیادہ زمانہ نہ گزرا تھا کہ انھوں نے مرداویج سے الگ ہو کر خود اپنے حساب میں ملک گیری کا سلسلہ شروع کر دیا اور ۳۲۰ھ / ۹۳۲ء اور ۳۲۲ھ / ۹۳۵ء کے درمیان ان تینوں نے اصفہان، شیراز اور آذربائجان تک اپنے حدود اثر کو وسیع کر لیا۔ اب علی، فارس کا مالک تھا، حسن، الجبال کا اور احمد مشرق و مغرب کی طرف بڑھ رہا تھا۔ ۳۳۴ھ / ۹۴۵ء میں اس نے کرمان فتح کیا اور ۳۳۴ھ / ۹۴۵ء میں بڑھتے بڑھتے خود بغداد میں داخل ہو گیا۔ خلیفہ مُستکفی کے لیے سر تسلیم خم کرنے کے سوا کیا چارہ تھا۔ اس نے احمد کو امیر الامرائ کا منصب اور معز الدولہ کا خطاب بخشا اور اس کے دونوں بھائیوں کو بھی فارس اور الجبال کی حکومت کا پروانہ عطا کر دیا۔ علی کو دربار خلافت سے عماد الدولہ کا خطاب ملا اور حسن کو رکن الدولہ کا۔ اس طرح بغداد پر آل بویہ کی حکومت قائم ہو گئی اور تقریباً ایک صدی تک وہ الجزیرہ، عراق اور مغربی ایران پر حکمران رہے۔ انھوں نے ترکی غلاموں کے اقتدار کو ختم کر دیا، ملک میں ایک باضابطہ حکومت قائم کی اور تہذیب و تمدن کی ترقی میں بہت کچھ حصہ لیا۔لیکن مذہباً وہ شیعی تھے اس لیے سنی خلیفہ پر (جس کی خلافت کو وہ اعتقاداً تسلیم نہ کرتے تھے) اور بیشتر سنی آبادی رکھنے والے علاقوں پر ان کے تسلط نے ایک طرف عباسی خلافت کی جڑیں کمزور کر دیں اور دوسری طرف مذہبی اختلافات کی آگ مشتعل کر دی۔ ان کے زمانہ میں بہت سی ایسی رسمیں جاری ہوئیں جو سنیوں کے نزدیک بدعات سیئہ میں داخل تھیں۔ انہی کے زمانہ میں دسویں محرم کو عام ماتم کا دن مقرر کیا گیا، تعزیہ داری کی رسم نکلی اور خلفائے ثلاثہ پر علانیہ سب و شتم کا سلسلہ شروع ہوا۔ ان باتوں پر سنیوں اور شیعوں کے درمیان سخت جھگڑے ہوئے اور بغداد کے بازار دونوں فرقوں کی سر پھٹول سے اکثر ہنگامہ زار رہنے لگے۔[تاریخ کا یہ ایک نازک سوال ہے کہ جب آل بویہ کو سلطنت عباسیہ کے قلب پر کامل اقتدار حاصل ہو چکا تھا تو انھوں نے عباسی خلیفہ کو معزول کر کے مصر کے فاطمی خلفاء کی اطاعت کیوں نہ اختیار کر لی؟ میرے نزدیک اس کے دو وجوہ تھے۔ ایک یہ کہ آل بویہ بایں ہمہ طاقت و شوکت اتنے قوی بازو نہ تھے کہ مشرقی دنیائے اسلام کے سواد اعظم کے علی الرغم عباسی خلافت کی بیخ کنی کر سکتے۔ خود ان کی سلطنت میں آبادی کا بیشتر حصہ سنی تھا اور ان کی سلطنت سے متصل جتنے اسلامی ممالک تھے وہ سب سنی عقیدے کے پیروکار تھے، اس لیے صرف یہی نہیں کہ ان کو عباسی خلافت سے تعرض کرنے کی جرات نہ ہوتی تھی، بلکہ فعلاً وہ مقام خلافت کے آگے سر اطاعت خم کرنے پر اپنے آپ کو مجبور پاتے تھے۔ دوسری وجہ یہ تھی کہ خود ان کے مصالح بھی اس کے مقتضی نہ تھے کہ کسی فاطمی کو خلیفہ تسلیم کریں۔ چنانچہ جب معز الدولہ کو مصری خلیفہ سے بات کرنے کا مشورہ دیا گیا تو اس نے اس بنا پر اس سے احتراز کیا کہ اس کی فوج اور ارکان دولت میں سب شیعہ تھے جو دل سے فاطمین کو مستحق خلافت سمجھتے تھے۔ اس سے اسے اندیشہ تھا کہ اگر ان لوگوں نے فاطمی خلیفہ سے بیعت کر لی تو اس کا اور اس کے خاندان کا کوئی اقتدار باقی نہ رہے گا۔]