سلاجقہ

تاریخ گزیدہ اور راحۃ الصدور میں محمود سے ارسلان کی ملاقات، گفتگو اور گرفتاری کی مفصل کیفیت بیان کی گئی ہے، جو کچھ زیادہ قابل اعتبار تو نہیں ہے۔ مگر اس سے اندازہ ہو سکتا ہے کہ اس زمانہ میں ان واقعات کے متعلق کس قسم کی داستانیں زبان زد عام تھیں۔ لکھا ہے کہ جب محمود کی جانب سے دعوت نامہ پہنچا تو ارسلان ایک پورے لشکر کے ساتھ محمود کی ملاقات کو روانہ ہوا۔ محمود نے کہلا بھیجا کہ مجھے کسی فوجی اعانت کی ضرورت نہیں ہے، محض دیدار و استظہار مقصود ہے۔ لہٰذا لشکر کو چھوڑ کر اپنے خاص خاص آدمیوں کے ساتھ آؤ۔ چنانچہ ارسلان نے لشکر کو چھوڑ دیا اور چیدہ آدمیوں کی ایک جماعت کے ساتھ محمود کی فرودگاہ پر پہنچا۔ اس نے بڑے تپاک سے استقبال کیا، اپنے ساتھ تخت پر بٹھایا اور ادھر ادھر کی باتیں کرنے کے بعد کہا کہ ہم کو ہر وقت ہندوستان میں کافروں سے جنگ کرنے کے لیے لشکر گراں کی ضرورت پڑتی ہے اور بلاد خراسان معطل و مہمل رہ جاتے ہیں، لہٰذا ہمارے تمہارے درمیان اس قسم کا ایک میثاق ہو جانا چاہیے کہ اگر کبھی کوئی دشمن اٹھے اور ہمیں مدد کی ضرورت ہو تو تمہاری فوج سے مدد حاصل کر سکیں۔

ارسلان نے جواب دیا کہ ہماری طرف سے بندگی میں تقصیر نہ ہوگی۔ محمود نے پوچھا تم ہمیں کتنی فوج سے مدد دے سکتے ہو؟ ارسلان کے بازو پر کمان بندھی ہوئی تھی اور بند قبا میں دو تیر تھے۔ اس نے ایک تیر نکال کر کہا کہ بوقت احتیاج اس کو ہماری فوج کے پاس بھیج دیجیے گا، ایک لاکھ فوج آپ کی مدد کو پہنچ جائے گی۔ محمود نے کہا اگر یہ کافی نہ ہو؟ ارسلان نے دوسرا تیر دے کر کہا کہ اس کو بغان کوہ بھیج دیجئے تو پچاس ہزار سوار آپ کی مدد کو آئیں گے۔ محمود نے کہا اگر وہ بھی کافی نہ ہوں؟ ارسلان نے کمان دے کر کہا اسے ترکستان بھیج دیجئے، اگر دو لاکھ سواروں کی بھی ضرورت ہوگی تو حاضر ہو جائیں گے۔

اس گفتگو سے محمود کو سلجوقیوں کی قوت و شوکت کا اندازہ ہو گیا اور اس نے فیصلہ کر لیا کہ اس خطرناک قوت کا استیصال کر دینا چاہیے۔ چنانچہ ارسلان کے اعزاز میں ایک مجلس آراستہ کی ۔ تین شبانہ روز عیش و نشاط کا سلسلہ جاری رکھا اور تمام مہمانوں کو خلعتیں عطا کیں۔ پھر اپنے امراء کو اشارہ کیا کہ ہر شخص ارسلان کے آدمیوں میں سے ایک ایک کو دعوت دے اور خوب شراب پلا کر باندھ لے۔ خود محمود نے اس طرح ارسلان کی دعوت کی اور بدمستی کے عالم میں اسے گرفتار کر کے راتوں رات ہندوستان روانہ کر دیا۔

ہندوستان میں ارسلان کو قلعہ کالنجر [یہ کالنجر وہ نہیں ہے جو بندیلکھنڈ میں واقع ہے اور آج کل اس نام سے مشہور ہے، بلکہ یہ ملتان کے حدود میں واقع تھا۔]میں قید رکھا گیا اور سات سال تک وہ برابر قید رہا۔ اس اثنا میں دو ترکمان جو اس کی فوج کے آدمی تھے، اسے چھڑانے کی فکر میں پھر رہے تھے، آخر انھوں نے قلعہ میں پہنچ کر آب کشی کی خدمت حاصل کر لی اور ایک روز فرصت پا کر اسے لے اڑے۔ مگر راستے سے ناواقف تھے۔ ایک جنگل میں جا کر بھٹک گئے۔ ادھر سے قلعہ کا کوتوال تلاش کرتا ہوا سر پر آن پہنچا۔ جب ارسلان کو دوبارہ گرفتار ہونے کا یقین ہو گیا تو اس نے ترکمانوں سے کہا کہ تم وطن واپس جاؤ اور دوسرے بھائیوں کو یہ پیغام پہنچا دو کہ

”ملک حاصل کرنے کی کوشش کرو، اور اگر دس بار بھی وہ تم کو شکست دیں تو ہمت نہ ہارو، کیونکہ یہ بادشاہ غلام زادہ ہے، کوئی نسب نہیں رکھتا اور غدار ہے، ملک اس کے پاس نہ رہ سکے گا اور آخر تمہارے ہی پاس آئے گا۔“

اس کے بعد ارسلان گرفتار ہو کر پھر قلعہ بھیج دیا گیا اور اس مرتبہ ایسی سخت قید میں رکھا گیا کہ اس کی زندگی ہی کا خاتمہ ہو گیا۔ اس کا بیٹا قتلمش جو اس کی رہائی کی فکر میں آیا تھا، اس کی وفات کی خبر سن کر بیابان سرخ کلاہان کے راستے سیستان اور وہاں سے بخارا پہنچا اور اپنے عزیزوں کو اس کی اطلاع دی جس سے ان میں انتقام کا جوش از سر نو بھڑک اٹھا۔[راحۃ الصدور ص ۸۷۔۹۱۔ تاریخ گزیدہ، ص ۴۳۵۔ ابن اثیر نے نہ معلوم کس سند پر لکھا ہے کہ ارسلان ۴۲۲ھ تک زندہ تھا اور اس سال جب سلجوقیوں اور غزنویوں کے درمیان عارضی صلح ہوئی تو سلجوقیوں نے اس کی رہائی کا مطالبہ کیا تھا، چنانچہ وہ کالنجر سے بلخ بھی لایا گیا تھا، مگر جب صلح منقطع ہو گئی تو واپس بھیج دیا گیا۔ (ج ۹، ص ۱۹۹)۔]