سلاجقہ

اوپر کہا جا چکا ہے کہ خلیفہ کے حکم سے ملک الرحیم نے ارسلان باساسیری کو الگ کر دیا تھا۔ یہاں سے بھاگ کر وہ امیر عرب نور الدولہ دبیس بن مزید کے پاس، جس سے اس کی رشتہ داری تھی، پناہ گزیں ہوا۔ مگر وہاں بھی زیادہ مدت نہ ٹھہر سکا، کیونکہ طغرل کے ڈر سے نور الدولہ نے اس کو نکال دیا اور اسے شام جا کر رحبۃ مالک میں قیام کرنا پڑا۔ اب وہ بالکل آزاد تھا۔ اس نے عباسیوں کی ضد پر مصر کے فاطمی خلیفہ مستنصر باللہ سے خط و کتابت کی اور اس کی اطاعت قبول کرکے ازسرنو قوت جمع کرنی شروع کر دی۔ ادھر بغداد میں طغرل نے ملک الرحیم اور اس کے امراء کے ساتھ جو کچھ سلوک کیا تھا، اس کی بدولت بہت سے دیلمی اور ترک سپاہی اور امراء بھاگ بھاگ کر اس کے پاس پہنچنے لگے اور کچھ مدت میں اس کے پاس خاصی جمعیت اکٹھی ہو گئی۔ [ابن اثیر، ج۹، ص ۳۵۶]نور الدولہ نے بھی اس کی روز افزوں قوت دیکھ کر اس کے ساتھ اتحاد کر لیا اور دونوں نے مل کر شوال ۴۴۸ھ ۱۰۵۶ء میں موصل پر حملہ کیا۔ وہاں قریش بن بدران کے ساتھ طغرل کا ابن عم قتلمش بن ارسلان بھی مقیم تھا یہ وہ دونوں ان حملہ آوروں کے خلاف لڑنے آئے۔ سنجار کے قریب جنگ ہوئی۔ قتلمش شکست کھا کر بھاگ گیا اور قریش نے گرفتار ہو کر نور الدولہ اور بساسیری کی اطاعت قبول کر لی۔ [عماد کا تب لکھتا ہے کہ جنگ سنجار سے پہلے ہی قریش بن بدران حملہ آوروں سے مل گیا تھا۔ مگر ابن اثیر کہتا ہے کہ وہ جنگ کے بعد ان دونوں سے ملا۔]اس طرح موصل پر ان لوگوں کا قبضہ ہو گیا اور انھوں نے وہاں مستنصر باللہ فاطمی خلیفہ مصر کا خطبہ جاری کر دیا۔

ادھر بغداد میں سلجوقی فوجوں نے ایک اودھم مچا رکھا تھا جس کے باعث سب اہل شہر ان سے بیزار ہو رہے تھے۔ آخر کار خلیفہ قائم بامر اللہ کے حکم سے رئیس الرؤسا نے طغرل کے وزیر عمید الملک کو بلا کر عامہ اہل بغداد کی شکایات سے آگاہ کیا اور کہا کہ اگر تم نے اس ظلم و جور کا سلسلہ بند نہ کیا تو خلیفہ بغداد چھوڑ کر نکل جانے پر مجبور ہوگا تاکہ وہ اپنی آنکھوں سے ان حرکات کو نہ دیکھ سکے۔ عمید الملک نے اس پر سلطان کی طرف سے معذرت کی اور اس کے بعد سلطان نے بغداد سے کوچ کرنے کی تیاری شروع کر دی۔ اس اثناء میں جنگ سنجار کی خبر پہنچی اور طغرل ۱۰؍ ذیقعد ۴۴۸ھ کو موصل کی طرف روانہ ہو گیا۔ مگر ابھی وہ راستہ ہی میں تھا کہ قریش اور نور الدولہ دونوں نے سر اطاعت جھکا دیا اور بساسیری بھاگ کر پھر الرحبہ چلا گیا۔ [ابن اثیر، ج ۹، ص ۳۵۶، ۳۶۱، ۳۶۲۔ زبدۃ النصرہ، ص ۱۳۔۱۴۔ روضۃ الصفا، ج ۴، ص ۱۷۸]