سلاجقہ

سرخس میں سلجوقیوں کے اجتماع کی خبر پا کر مسعود وسط شعبان میں بلخ سے ادھر روانہ ہوا اور وسط رمضان میں تلخ آب پہنچ کر ٹھہرا جہاں سلجوقی فوجیں پڑی ہوئی تھیں۔ رمضان بھر سلجوقی سوار مسعودی لشکر پر چھاپے مارتے رہے اور مسعودیوں کے لیے خیموں سے قدم باہر نکالنا مشکل کر دیا۔ یہاں تک کہ پانی اور چارہ لینے کے لیے بھی پانچ پانچ سو سواروں کی جمعیت بھیجنی پڑتی تھی۔ یہ حال دیکھ کر مسعود نے اپنے اعیانِ سلطنت سے کہا کہ ”مجھے یہ معلوم ہی نہ تھا کہ اس قوم کا زور اتنا بڑھ گیا ہے۔ لوگوں نے مجھے دھوکہ دیا اور ان کی صحیح کیفیت نہ بتائی ورنہ ابتدا ہی میں اس کی تدبیر کی جاتی۔“

عید کے بعد تلخ آب کے میدان میں دونوں فریق صف آرا ہوئے۔ مسعود خود ایک ہاتھی پر سوار ہو کر قلب میں کھڑا ہوا اور ساقہ میں ایک ہزار سواروں کو کھڑا کر دیا تاکہ سامان کی حفاظت کریں اور اگر لشکر میں سے کوئی بھاگ کر جانے لگے تو اسے قتل کر دیں۔ ان انتظامات کے ساتھ جنگ شروع ہوئی، سخت معرکہ کا رن پڑا، دیر تک دونوں پلڑے برابر رہے، آخر مسعود نے ۲ ہزار زرہ پوش سوار لے کر اس مقام پر حملہ کیا جہاں داؤد، طغرل اور بیغو کھڑے تھے۔ سلجوقی اس حملے کی تاب نہ لا سکے اور بے ترتیبی کے ساتھ پسپا ہو گئے۔ مسعود نے اس موقع پر بھی تعاقب سے اجتناب کیا ورنہ سلجوقیوں پر سخت مصیبت نازل ہوتی۔ [بیہقی، ص ۴۱۴-۴۲۱]

۳ شوال کو مسعود آگے بڑھ کر سرخس پہنچا۔ اس کو امید تھی کہ سلجوقیوں پر جو کاری ضرب لگی ہے اس سے وہ ایسے بھاگیں گے کہ جیحوں اور بلخان کوہ سے ادھر دم نہ لیں گے۔ مگر یہ دیکھ کر حیران رہ گیا کہ سلجوقی دستے علانیہ لشکر مسعودی کے سامنے جنگلی ہرنوں کی طرح پھرتے تھے اور جہاں موقع پاتے، چھاپہ مار دیتے تھے۔ ان کی شوخ چشمی کا یہ حال تھا کہ انھوں نے سرخس کے قریب دریا سے پانی لینا مشکل کر دیا تھا۔ ان کے پہیم حملوں سے لشکر مسعودی میں سخت بددلی پھیل گئی۔ لوگ خیموں سے باہر نکلتے ہوئے ڈرتے، افسروں کے احکام کو ایک دوسرے پر ٹالتے اور چھوٹے چھوٹے کاموں سے جی چراتے تھے۔ نوبت یہاں تک پہنچ گئی کہ جانوروں کے لیے چارہ تک ملنا بند ہو گیا۔ سلجوقیوں نے باہم مشورہ کر کے یہ طے کر لیا تھا کہ اب میدان میں غزنویوں سے جنگ نہ کریں گے، کیونکہ باقاعدہ لڑائی میں ان کے سامنے ٹھہرنا مشکل ہے۔ اس لیے اب ہم کو اپنے ترکی طریقہ پر جنگ کرنی چاہیے۔ ہم بیابانی لوگ ہیں، سردی گرمی کو خوب برداشت کر سکتے ہیں اور رخت و بنہ کی طرف سے بے فکر ہیں۔ شاہی لشکر میں نہ یہ جفاکشی ہے اور نہ وہ اس قدر ہلکا ہے کہ ہمارا پیچھا کر سکے۔ زیادہ عرصہ تک ہمارے چھاپوں کو برداشت نہ کر سکے گا اور آخر تھک کر عاجز آجائے گا۔