آئینِ اسلامی جمہوریہ پاکستان 1956ء
اشاعت: 1956ء· دو لسانی (انگریزی/اردو)
پاکستان کا پہلا آئین، 23 مارچ 1956ء سے 7 اکتوبر 1958ء تک نافذ رہا۔ مارشل لا کے ذریعے منسوخ کیا گیا۔
آرٹیکل 17: ملازمتوں میں امتیاز کے خلاف تحفظ
(1) پاکستان کی ملازمت میں تقرری کے لیے بصورتِ دیگر اہل کسی شہری کے ساتھ ایسی کسی تقرری کے سلسلے میں محض نسل، مذہب، ذات، جنس، سکونت یا مقامِ پیدائش کی بنیاد پر کوئی امتیاز روا نہیں رکھا جائے گا: بشرطیکہ دستور کے نفاذ کے دن سے پندرہ سال کی مدت کے لیے، پاکستان کی ملازمت میں کسی طبقے یا علاقے سے تعلق رکھنے والے افراد کی مناسب نمائندگی یقینی بنانے کے لیے آسامیاں محفوظ کی جا سکیں گی: مزید بشرطیکہ مذکورہ ملازمت کے مفاد میں، مخصوص آسامیاں یا خدمات کسی ایک جنس کے افراد کے لیے محفوظ کی جا سکیں گی۔
(2) شق (1) میں کوئی امر کسی صوبائی حکومت یا کسی مقامی یا دیگر حکام کو، اس حکومت یا حکام کے تحت کسی طبقۂ خدمت کے سلسلے میں، اس حکومت یا حکام کے تحت تقرری سے قبل صوبے میں سکونت کی شرائط مقرر کرنے سے مانع نہیں کرے گا۔