مرکزی مواد پر جائیں

گردشِ دولت

زندگی کے ہر شعبے کے لیے قرآن و سنت کی رہنمائی، مستند حوالوں کے ساتھ — تاکہ آپ خود فیصلہ کریں۔

نظامِ معیشت

حلال کمائی، سود کی ممانعت اور تجارت کے شرعی اصول۔

انسان کی معاشی زندگی کو انصاف اور راستی پر قائم رکھنے کے لیے اِسلام نے چند اُصول اور چند حدود مقرر کر دیے ہیں تا کہ دولت کی پیدائش ،استعمال اور گردش کا سارا نظام انھی خطوط کے اندر چلے جو اس کے لیے کھینچ دیے گئے ہیں۔ دولت کی پیداوار کے طریقے اور اس کی گردش کی صورتیں کیا ہوں؟ اِسلام کو اس سوال سے کوئی بحث نہیں ہے۔ یہ چیزیں تو مختلف زمانوں میں تمدن کے نشوونما کے ساتھ ساتھ بنتی اور بدلتی رہتی ہیں۔ ان کا تعین انسانی حالات و ضروریات کے لحاظ سے خود بخود ہو جاتا ہے اِسلام جو کچھ چاہتا ہے وہ یہ ہے کہ تمام زمانوں اور حالات میں انسان کے معاشی معاملات جو شکلیں بھی اختیار کریں ان میں یہ اصول مستقل طور پر قائم رہیں اور ان حدود کی لازماً پابندی کی جائے۔
— مولانا سید ابوالاعلیٰ مودودیؒ، «اسلام کا نظام حیات»، باب: اِسلام کا اقتصادی نظاممکمل باب پڑھیں

گردشِ دولت

4 آیات1 احادیث

قرآنِ مجید

مَا أَفَاءَ اللَّهُ عَلَى رَسُولِهِ مِنْ أَهْلِ الْقُرَى فَلِلَّهِ وَلِلرَّسُولِ وَلِذِي الْقُرْبَى وَالْيَتَامَى وَالْمَسَاكِينِ وَابْنِ السَّبِيلِ كَيْ لَا يَكُونَ دُولَةً بَيْنَ الْأَغْنِيَاءِ مِنْكُمْ وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانْتَهُوا وَاتَّقُوا اللَّهَ إِنَّ اللَّهَ شَدِيدُ الْعِقَابِ
جو کچھ بھی اللہ اِن بستیوں کے لوگوں سے اپنے رسُول کی طرف پلٹا دے وہ اللہ اور رسُول اور رشتہ داروں اور یتامٰی اور مساکین اور مسافروں کے لیے ہے تاکہ وہ تمہارے مالداروں ہی کے درمیان گردش نہ کرتا رہے، جو کچھ رسُولؐ تمہیں دے وہ لے لو اور جس چیز سے وہ تم کو روک دے اس سے رُک جاؤ۔ اللہ سے ڈرو، اللہ سخت سزا دینے والا ہے۔
وَلَا يَحْسَبَنَّ الَّذِينَ يَبْخَلُونَ بِمَا آتَاهُمُ اللَّهُ مِنْ فَضْلِهِ هُوَ خَيْرًا لَهُمْ بَلْ هُوَ شَرٌّ لَهُمْ سَيُطَوَّقُونَ مَا بَخِلُوا بِهِ يَوْمَ الْقِيَامَةِ وَلِلَّهِ مِيرَاثُ السَّمَاوَاتِ وَالْأَرْضِ وَاللَّهُ بِمَا تَعْمَلُونَ خَبِيرٌ
جن لوگوں کو اللہ نے  اپنے فضل سے نوازا ہے اور پھر  وہ بخل  سے کام لیتےہیں وہ اس خیال  میں نہ رہیں کہ یہ بخیلی ا ن کےلیے اچھی ہے۔ نہیں، یہ ان کے حق میں نہایت بری ہے۔ جو کچھ وہ اپنی کنجوسی سے جمع  کررہے ہیں وہی قیامت  کے روز ان کے گلے کا طوق بن جائے گا۔ زمین اور آسمانوں کی میراث اللہ ہی کے لیے ہے اور تم جو کچھ کرتے ہو اللہ اس سے باخبر ہے۔  ؏١۸
وَلَا تَجْعَلْ يَدَكَ مَغْلُولَةً إِلَى عُنُقِكَ وَلَا تَبْسُطْهَا كُلَّ الْبَسْطِ فَتَقْعُدَ مَلُومًا مَحْسُورًا
(۶)نہ تو اپنا ہاتھ گردن سے باندھ رکھو اور نہ اسے بالکل ہی کُھلا چھوڑ دو کہ ملامت زدہ اور عاجز بن کر رہ جاوٴ۔
وَالَّذِينَ إِذَا أَنْفَقُوا لَمْ يُسْرِفُوا وَلَمْ يَقْتُرُوا وَكَانَ بَيْنَ ذَلِكَ قَوَامًا
“ جو خرچ کرتے ہیں تو نہ فضُول خرچی کرتے ہیں نہ بُخل،  بلکہ اُن کا خرچ دونوں انتہاوٴں کے درمیان اعتدال پر قائم رہتا ہے۔

احادیث

صحیح بخاری 1442

… نے کہ نبی کریم صلی اللہ علیہ وسلم نے فرمایا، کوئی دن ایسا نہیں جاتا کہ جب بندے صبح کو اٹھتے ہیں تو دو فرشتے آسمان سے نہ اترتے ہوں۔ ایک فرشتہ تو یہ کہتا ہے کہ اے اللہ! خرچ کرنے والے کو اس کا بدلہ دے۔ اور دوسرا کہتا ہے کہ اے اللہ! «ممسك» اور بخیل کے مال کو تلف کر دے۔

مولانا مودودیؒ کی تحریروں سے

جو جائیدادیں اور اموال اور آمدنیاں حکومت کی ملک ہوں، ان کے بارے میں قرآن ہدایت کرتا ہے کہ ان کا صَرف محض دولت مند طبقوں کے مفاد میں نہیں بلکہ عام لوگوں کے مفاد میں ہونا چاہیے، اور خصوصیت کے ساتھ ان کے صَرف میں معاشرے کے کمزور طبقات کی بھلائی کا زیادہ لحاظ رکھا جانا چاہیے:
— مولانا سید ابوالاعلیٰ مودودیؒ، «معاشیات اسلام»، باب: ۲۱۔ سرکاری املاک میں اجتماعی مفاد کا لحاظمکمل باب پڑھیں
دوسری صورت یہ ہے کہ آدمی اس کا کم و بیش کوئی حصہ بچالے اور اس کو روک رکھے۔ اسلام اس کو پسند نہیں کرتا۔ وہ چاہتا ہے کہ جو دولت بھی کسی کے پاس پہنچ گئی ہے وہ رک کر نہ رہ جائے بلکہ جائز طریقوں سے گردش میں آتی رہے۔ رکی ہوئی دولت پر ایک خاص قانون کے مطابق اسلام زکوٰۃ عائد کرتا ہے تا کہ اس کا ایک حصہ لازماً محروم طبقات اور اجتماعی خدمات کے لیے استعمال ہو۔ قرآن مجید میں آپ دیکھیں گے کہ جن افعال کی اس میں سخت مذمت کی گئی ہے ان میں سے ایک یہ کہ آدمی خزانے جمع کرنے کی کوشش کرے۔ وہ کہتا ہے کہ جو لوگ سونے اور چاندی کے ذخیرے جمع کرتے ہیں ان کا جمع کیا ہوا سونا اور چاندی جہنم میں ان کو داغنے کے لیے استعمال کیا جائے گا۔ اس کی وجہ یہ ہے کہ دولت خدا نے نوعِ انسانی کے فائدے کے لیے پیدا کی ہے۔ اسے بند کر کے رکھ لینے کا کسی کو حق نہیں ہے۔ آپ جائز ذرائع سے کمایئے، اپنی ضروریات پر خرچ کیجئے اور پھر جو کچھ بچے اسے کسی نہ کسی طرح جائز طریقے سے گردش میں لایئے۔
— مولانا سید ابوالاعلیٰ مودودیؒ، «اسلامی نظمِ معیشت کے اُصول اور مقاصد»، باب: استعمالِ دولت کے طریقوں میں حلال و حرام کی تمیزمکمل باب پڑھیں
پھر جو دولت ان جائز حدود کے اندر فراہم ہو اسے بھی اِسلام زیادہ دیر تک سمٹا نہیں رہنے دیتا بلکہ اپنے قانونِ وراثت کے ذریعے سے ہر پشت کے بعد دوسری پُشت میں اسے پھیلا دیتا ہے۔ اس معاملے میں اسلامی قانون کا رُجحان دُنیا کے تما م دوسرے قوانین کے رُجحانات سے مختلف ہے۔ دوسرے قوانین کوشش کرتے ہیں کہ جو دولت ایک دفعہ سمٹ چکی ہے وہ پُشت در پُشت سمٹی رہے۔ برعکس اس کے اِسلام ایسا قانون بناتا ہے کہ جو دولت ایک شخص نے اپنی زندگی میں فراہم کی ہو وہ اس کے مرتے ہی اس کے قریبی عزیزوں میں بانٹ دی جائے۔قریبی عزیز نہ ہوں تو دُور کے رشتہ دار بحصّۂ رسدی اس کے وارث ہوں اور اگر کوئی دُور پرے کا رشتہ دار بھی نہ ہو تو پھر پوری مسلم سوسائٹی اس کی حق دار ہے۔ یہ قانون کسی بڑی سرمایہ داری و زمین داری کو مستقل اور دائم نہیں رہنے دیتا۔ پچھلی ساری پابندیوں کے باوجود اگر دولت کے سمٹائو سے کوئی خرابی پیدا ہو بھی جائے تو یہ آخری ضرب اس کا ازالہ کر دیتی ہے۔
— مولانا سید ابوالاعلیٰ مودودیؒ، «اسلام کا نظام حیات»، باب: اِسلام کا اقتصادی نظاممکمل باب پڑھیں

تحقیق و تجزیہ

ذیل کے حصے ادارے کی تحریر ہیں، مولانا مودودیؒ یا کسی اور مصنف کا اقتباس نہیں۔ ہر حصے کے ساتھ اس کے ماخذ — آیت، حدیث، سیرت یا کتاب — درج ہیں تاکہ آپ خود جانچ سکیں۔

سوال
دولت چند ہاتھوں میں کیوں سمٹ جاتی ہے؟
ادارہ

دولت جب جمع ہو کر رک جائے تو منڈی میں خریدنے والے کم اور محتاج زیادہ ہو جاتے ہیں۔ قرآن نے مالِ فے کی تقسیم بیان کرتے ہوئے اس کا مقصد صاف بتایا: «کَیْ لَا یَکُوْنَ دُوْلَۃً بَیْنَ الْاَغْنِیَآءِ مِنْکُمْ» — تاکہ یہ مال صرف تمہارے مال داروں ہی میں گردش نہ کرتا رہے۔ یہ آیت صرف ایک واقعے کا حکم نہیں بلکہ اسلامی معیشت کا ایک رہنما مقصد ہے۔

اصول
نہ بخل، نہ اسراف — دولت کو چلنے دو
ادارہ

قرآن ہاتھ گردن سے باندھ لینے اور بالکل کھول دینے دونوں سے روکتا ہے، اور اللہ کے بندوں کی صفت یہ بتاتا ہے کہ وہ خرچ میں نہ اسراف کرتے ہیں نہ تنگی۔ بخل کو بھلائی سمجھنے والوں کو خبردار کیا گیا ہے کہ ان کا روکا ہوا مال طوق بنے گا، اور حدیث میں ہے کہ ہر صبح ایک فرشتہ خرچ کرنے والے کے لیے بدلے اور روکنے والے کے لیے تلف کی دعا کرتا ہے۔ اصول یہ ہے: حلال کماؤ، ضرورت پر خرچ کرو، اور جو بچے اسے جائز طریقے سے گردش میں لاؤ۔

طریقِ کار
گردش کے ادارے: زکوٰۃ، وراثت، انفاق اور سود کی ممانعت
ادارہ

اسلام دولت کو گردش میں رکھنے کے لیے کئی ادارے ایک ساتھ چلاتا ہے: جمع شدہ مال پر سالانہ زکوٰۃ جو مال داروں سے لے کر محتاجوں کو لوٹائی جاتی ہے؛ وراثت کا قانون جو مرنے والے کی دولت کو بہت سے وارثوں میں بانٹ دیتا ہے اور اسے ایک وارث یا ایک وصیت میں سمٹنے نہیں دیتا؛ رشتہ داروں، مسکینوں اور مسافروں کا حق؛ اور سود کی حرمت، جو سرمائے کو محنت کے نقصان میں شریک ہوئے بغیر بڑھنے نہیں دیتی۔

معاشی اثرات
معاشی اثر: طلب، روزگار اور استحکام
عصری تجزیہ

ادارے کے تجزیے میں، جب کمزور طبقات تک قوتِ خرید پہنچتی ہے تو اشیا کی کھپت بڑھتی ہے اور پیداوار و روزگار کو سہارا ملتا ہے۔ OECD کی ۲۰۱۵ء کی تحقیق کے مطابق آمدنی کی بڑھتی ہوئی ناہمواری معاشی ترقی کو نقصان پہنچاتی ہے، اور World Inequality Report 2022 کے مطابق دنیا کی امیر ترین ۱۰ فیصد آبادی کل دولت کے ۷۶ فیصد کی مالک ہے جبکہ غریب ترین آدھی آبادی کے پاس صرف ۲ فیصد ہے۔ یہ اعداد و شمار ریاستوں اور عالمی معیشت کو ناپتے ہیں، کسی «اسلامی نظام» کو نہیں؛ یہاں ان کا ذکر صرف اس مسئلے کی شدت دکھانے کے لیے ہے جس کا جواب قرآن کا اصولِ گردش دیتا ہے۔

ماخذ (2)
عصرِ حاضر میں
آج کے لیے: پالیسی کے سوالات
عصری تجزیہ

قرآن نے مقصد مقرر کیا ہے، طریقے ہر دور کی شوریٰ پر چھوڑے ہیں۔ آج کی ریاست کے لیے سوالات یہ ہو سکتے ہیں: سرکاری املاک اور آمدنی کا فائدہ کمزور طبقات تک کیسے پہنچے؛ وراثت کے قانون پر عمل — خصوصاً خواتین کے حصے — کیسے یقینی ہو؛ زکوٰۃ کی وصولی و تقسیم شفاف کیسے ہو؛ اور قرض پر مبنی مالیات کی جگہ شراکت کی مالیات کیسے بڑھے۔ یہ انتظامی اور اجتہادی میدان ہیں، ان میں کوئی ایک ماڈل دائمی حکم نہیں۔

اس موضوع پر آپ کے پاس معلومات ہیں؟ رجسٹرڈ ممبر کی حیثیت سے مضمون شامل کریں — نظرِ ثانی کے بعد شائع ہوگا۔

معاون کیلکولیٹرز

کوئی بھی حساب لگا سکتا ہے — مفتی صاحب کو بھیجنے کے لیے صرف لاگ ان درکار ہے
مفتی کی توثیق درکار

زکوٰۃ کیلکولیٹر

اپنے نصاب کے مطابق نقدی، سونا، چاندی اور مالِ تجارت کی بنیاد پر واجب الادا زکوٰۃ معلوم کریں۔

مفتی کی توثیق درکار

میراثِ کیلکولیٹر

ورثاء کی تفصیل درج کریں اور شرعی اصولوں کے مطابق میراث کی تقسیم کا مسودہ حاصل کریں۔